ފްލެޓް ލިސްޓާއި ގުޅިގެން އެމްޑީޕީ އިން ދެއްކި ވާހަކަތަކަކީ ރައްޔިތުންނަށް އޮޅުވާލަން ދެއްކި ވާހަކަތަކެއް

ގެދޮރުވެރިޔާ ސްކީމްގެ ދަށުން އިމާރާތް ކުރެވޭ 4000 ފްލެޓަށް ޝަރުތުހަމަވާމީހުންގެ ލިސްޓާއި ގުޅިގެން އިދިކޮޅު އެމްޑީޕީ އިން ދެއްކި ވާގަކަތަކަކީ ރައްޔިތުންނަށް އޮޅުވާލަން ދެއްކިވާހަކަތަކެއް ކަމަށް އިމާރާތްކުރުމާ ގެދޮރުވެރިކަމާއި ބިނާރާބެހޭ ވުޒާރާއިން ބުނެފިއެވެ.

އެވުޒާރާއިން މިހެން ބުނެފައިވަނީ އެވުޒާރައިން ނެރުނު ނޫސްބަޔާނެއްގައެެވެ. 

އެވުޒާރާއިން ބުނެފައިވަނީ 27 ފެބްރުއަރީ 2025 ގައި ނެރެފައިވާ ލިސްޓަކީ 15 ނޮވެމްބަރު 2023 ގައި ސަރުކާރުގެ ގެޒެޓުގައި ޝާއިޢު ކުރެވުނު ލިސްޓުގައި ފްލެޓް ލިބޭ ފަރާތްތަކުގެ ގޮތުގައި ކަނޑައަޅައިވާ ފަރާތްތަކުގެ ފޯމުތަކާއި ގުޅޭގޮތުން އޭސީސީއިން ހިންގެވި ތަހުޤީޤަށްފަހު ދެއްވާފައިވާ ލަފަޔާއި ގުޅިގެން ފްލެޓް ލިބޭނެ ކަމަށް ކަނޑައަޅައިފައިވާ ފަރާތްތަކުގެ ފޯމުތަކުގައި ހުރި މަޢުލޫމާތު ބަލައި ސައްޚަކަން ކަށަވަރުކުރުމަށް ކުރެވުނު މަސައްކަތަށްފަހު ނެރެވުނު ލިސްޓެއްކަމަށެވެ. 

މީގެއިތުރުން އިޢުލާނުކޮށްފައިވާ ލިސްޓުގައި ވާނީ 2023 ވަނައަހަރު ނެރުނު ފްލެޓް ލިސްޓުގައި 3ކޮޓަރި ފްލެޓަށް ހުށައަޅައި 76 ޕޮއިންޓް ލިބި ފްލެޓް ލިބޭނެ ކަމަށް ބުނެފައިވާ މީހުންނާއި 75 ޕޮއިންޓް ލިބި ގުރުއަތަށްދާނެ ކަމަށް ބުނެފައިވާ މީހުންނާއި 2 ކޮޓަރީގެ ފްލެޓަށް ހުށައަޅައި 73 ޕޮއިންޓް ލިބި ފްލެޓްލިބޭނެ ކަމަށް އިޢްލާނުކުރި މީހުންގެ ނަންތައް ކަމަށާއި، މިމަރުހަލާގައި އިތުރު އެއްވެސް މީހެއްގެ ފޯމު ބަލައި ޗެކްކޮށްފައިނުވާނެކަމަށެވެ. އަދި ފްލެޓް ދިނުމުގެ އައު އުސޫލެއް އެކަށައަޅައިފައިނުވާކަމަށެވެ. 

މީގެއިތުރުން ފްލެޓް ލިބިފައިވާ އެއްވެސް ފަރާތެއްގެ ފްލެޓެއް އެހެން އެއްވެސް ފަރާތަކަށް ހަމަޖައްސައިފައިނުވާނެކަމަށްވެސް އެވުޒާރާއިން ވަނީ ބުނެފައެވެ. އަދި ހުށައަޅާ ޝަކުވާ ބެލުމަށްފަހުގައި މެނުވީ އެފަދަ ކަމެއް ނުކުރާނެ ކަމަށްވެސް ވަނީ ބުނެފައެވެ. 

ހަމަމިއާއިއެކު އެއްވެސް ފަރާތަކަށް ލިބިފައިވާ ޕޮއިންޓަކަށް ބަދަލެއް އައިސްފައިވާނަމަ އެބަދަލެއް އައިސްފައިވާނީ ފޯމުލީ ފަރާތުން ހުށައަޅައިފައިވާ މަޢުލޫމާތާއި ޚިލާފަށް ކުރިން ޕޮއިންޓް ދީފައިވާނަމަ ކަމަށްވެސް އެވުޒާރާއިން ހާމަކޮށްފައިވެއެވެ. 

އެއްވެސް ދެމަފިރިއަކަށް އެއްސްކީމެއްގެ ދަށުން ފްލެޓް ދިނުމަކީ މިސަރުކާރުގެ ސިޔާސަތެއް ނޫންކަމަށާއި އެއްވެސް ދެމަފިރިއަކަަށް 2 ފްލެޓެއް ނުލިބޭނެ ކަމަށްވެސް ގެދޮރުވެރިކަމާ ބެހޭ ވުޒާރާއިން ބުނެއެވެ. 

މި 4000 ފްލެޓް ލިބުމުގެ ފުރުސަތު ނުލިބޭ ފަރާތްތައް އަލުން ބޯހިޔާވަހިކަމަށް ހުށައެޅުމުގެ ތަކުލީފު ތަހައްމަލް ކުރަން ނުޖެހޭނެ ކަމަށާއި، ބޯހިޔާވަހިކަމާއި ގެދޮރުވެރިކަމަށް ބޭނުންޖެހިފައިވާ ކޮންމެ ދިވެހި ރައްޔިތަކަށް އެފުރުސަތު ކަށަވަރުކޮށްދިނުމަށް ރައީސް ޑރ މުޙައްމަދު މުޢިއްޒު ވެވަޑައިގެންފައިވާ ވަޢުދުފުޅުގެ ދަށުން މިފަރާތްތަކަށްވެސް މިދައުރުގައި ބޯހިޔާވަހިކަން ކޖަށަވަރުވެގެންދާނެ ކަމަށް އެވުޒާރާގެ ނޫސްބަޔާނުގައި ބުނެފައިވެއެވެ.