ދުނިޔެ
ހަމަލާތައް ހުއްޓާލުމާއި ގުޅޭ މަޝްވަރާތައް ކުރިއަށްގެންދިޔުމަށް އިޒްރާއިލްގެ ޓީމެއް ޤަޠަރަށް ދަނީ

އިޒްރާއިލްގެ ހަމަލާއެއްގައި ހަލާކުވެފައިވާ އިމާރާތެއް
ހަމަލާތަައް ހުއްޓާލުމާއި ގުޅޭ މަޝްވަރާތައް ކުރިއަށް ގެންދިޔުމަށް އިޒްރާއިލްގެ ޓީމެެއް ޤަޠަރަށް ދިޔުމަށް ނިންމައިފިއެވެ.
މިކަމާއި ގުޅޭ ގޮތުން އިޒްރާއިލްގެ ބޮޑުވަޒީރު ބެންޖަމިން ނަތަންޔާހޫ ބުނެފައިވަނީ ހަނގުރާމަ ހުއްޓާލުމާ ގުޅޭ މަޝްވަރާތައް ކުރިއަށްގެންދިޔުމަށް މިހަފްތާގެ ހޯމަދުވަހު އިޒްރާއިލްގެ ޓީމެއް ޤަޠަރަށް ފޮނުވާނެ ކަމަށެވެ.
އިޒްރާއިލުން މިފަދަ އިޢުލާނެއް ކޮށްފައިމިވަނީ ހަމަލާތައް ހުއްޓާލުމުގެ މަޝްވަރާގެ ދެވަނަ ބުރުގެ މަޝްވަރާތައް ހަމާސްގެ ޓީމަކާއި މިޞްރުގެ އޮފިޝަލުންނާއި އެކު ހޮނިހިރުދުވަހު ކުރިއަށްގެންގޮސްފައިވަނިކޮށެވެ.
މަޝްވަރާތަކުގެ ދެ ވަނަ ފިޔަވަހީގައި ޝަރުތުތަކަށް ވަގުތުން ތަބާވުމާއި، ބޯޑަރު ހުރަސްތައް ހުޅުވުމާއި، އެއްވެސް ހުރަހެއް ނުވަތަ ޝަރުތުތަކާ ނުލައި ޣައްޒާއަށް ރިލީފް މެޓީރިއަލް ވެއްދުމުގެ ހުއްދަ ދިނުމުގެ މުހިންމުކަމަށް ހަމާސްގެ ޓީމުން ބާރުއަޅައިފައިވާ ކަމަށް މަޝްވަރާތަކާއި ގުޅިގެން ނެރެފައިވާ ބަޔާނުގައި ބުނެފައިވެއެވެ.
މީގެ ކުރިން ހަމާސްގެ ތަރުޖަމާނު އަބްދުލް ލަތީފް އަލް ގަނޫއާ ވިދާޅުވެފައި ވަނީ ދެވަނަ ފިޔަވަހީގެ މަޝްވަރާތައް ފެށުމަށް އޮތީ ތައްޔާރަށް ކަމަށެވެ.
ހަނގުރާމަ ހުއްޓާލުމުގެ އެއްބަސްވުމުގެ ފުރަތަމަ މަރުހަލާ ނިމުނީ މާޗް މަހުގެ އެއްވަނަ ދުވަހު އެވެ. އެފަހަރު އެއްބަސްވެވުނީ އިޒްރާއީލުގެ ޖަލުތަކުގައި ތިބި ފަލަސްތީނުގެ 1،800 މީހުން ދޫކޮށްލުމަށާއި، ޣައްޒާގައި ބަންދުކޮށްފައި ތިބި އިޒްރާއީލުގެ 25 އަސީރުން ދޫކޮށްލުމަށެވެ.
ހަނގުރާމަ މުޅިން ނިމުމަކަށް ގެނެސް، ޣައްޒާއިން ސިފައިން ފުރިހަމައަށް ފޭބުން ހިމެނޭ އެއްބަސްވުމުގެ ދެވަނަ މަރުހަލާއަށް ދިއުމަށް އިޒްރާއިލުން ވަނީ ދެކޮޅު ހަދައިފައެވެ. އަދި އިޒްރާއިލުންވަނީ އެއްބަސްވުމުގެ ފުރަތަމަ މަރުހަލާ އޭޕްރީލް މަހުގެ މެދުތެރެއަށް އިތުރުކުރަން ބޭނުންވާ ކަމަށް ބުނެފައެވެ. މިއާ ޚިލާފަށް ހަމާސްއިން ބުނެފައިވަނީ އެޖަމާޢަތުން ބޭނުންވަނީ ކުރިން ދެފަރާތުން އެއްބަސްވިގޮތައް ކުރިއަށްގެންދާން ކަމަށެވެ.