ދުނިޔެ
ޓެކްސާސް އަދި ނިއު މެކްސިކޯގައި ހަލުވިކަމާއިއެކު ހިމަބިހި ފެތުރެނީ

ޓެކްސާސް އަދި ނިއު މެކްސިކޯގައި ހަލުވިކަމާއިއެކު ހިމަބިހި ފެތުރެނީ
ޓެކްސާސްގެ ހުޅަނގު ސަރަހައްދާއި ނިއު މެކްސިކޯގެ އެއް ކައުންޓީގައި ހިމަބިހި ފެތުރެމުންދާކަމަށް އެމެރިކާގެ ސިއްހީ އިދާރާތަކުން ވަނީ އިއުލާނުކޮށްފައެވެ. މިހާތަނަށް 230 އާ ގާތްކުރާ މީހުންނަށް މިބަލި ޖެހިފައިވާކަމަށް ވަނީ ދެނެގަނެވިފައެވެ. އަދި މިބަލީގެ ސަބަބުން 2 މީހަކު މަރުވެފައިވާކަމަށްވެސް ވަނީ ރިޕޯޓުކޮށްފައެވެ.
ޓެކްސާސް ސްޓޭޓް ހެލްތު ޑިޕާޓްމަންޓުން ހުކުރު ދުވަހު ދީފައިވާ އަޕްޑޭޓެއްގައި ބުނެފައިވާ ގޮތުގައި ޓެކްސާސްގައި މިހާތަނަށް 198 މީހުންނަށް ހިމަބިހި ޖެހިފައިވެއެވެ. މީގެ ތެރެއިން 23 މީހުން ވަނީ ހޮސްޕިޓަލްގައި އެޑްމިޓްކުރެވިފައެވެ. އަދި 64 ކޭސްއަކީ 4 އަހަރުން ދަށުގެ ކުޑަކުދިންނަށް ޖެހިފައިވާ ކޭސްތަކެވެ.
ނިއު މެކްސިކޯގެ ލީ ކައުންޓީގައި 30 މީހުންނަށް މިބަލި ޖެހިފައިވާކަމަށް އެ ސްޓޭޓުގެ ހެލްތު ޑިޕާޓްމަންޓުން ވަނީ ހާމަކޮށްފައެވެ. މީގެ ތެރެއިން 11 ކޭސްއަކީ 17 އަހަރުން ދަށުގެ ކުދިންނަށް ޖެހިފައިވާ ކޭސްތަކެވެ.
މިބަލީގެ ސަބަބުން މަރުވެފައިވާ 2 މީހުންގެ ތެރޭގައި ހިމެނެނީ ޓެކްސާސްގެ ސްކޫލް އުމުރުގެ ކުއްޖަކާއި ނިއު މެކްސިކޯގެ ލީ ކައުންޓީގެ މީހެކެވެ. މި ދެމީހުންނަކީވެސް ހިމަބިހި ވެކްސިން ނުޖަހާ ތިބި މީހުންކަން ފާހަގަކުރެވެއެވެ.
ސީޑީސީން ވަނީ ހިމަބިހި ފެތުރެމުންދާތީ، އެމެރިކާގެ ހުރިހާ ރައްޔިތުންވެސް އެމްއެމްއާރު ވެކްސިން ޖަހައި، އަޕްޓުޑޭޓްކޮށްގެން ތިބުމަށް އިލްތިމާސްކޮށްފައެވެ. ޚާއްސަކޮށް ބޭރު ގައުމުތަކަށް ދަތުރުކުރާ ފަރާތްތަކުން މިކަމަށް ސަމާލުކަން ދިނުމަށް ވަނީ އެދިފައެވެ.