ޚަބަރު
އައިއޭސީ އާއި ދެކޮޅަށް ދައްކަމުންދާ ވާހަކަތަކަށް އެޖަމިއްޔާއިން ރައްދުދީފި

އައިއޭސީގެ އެހީގައި ތައްޔާރުކުރި އެހީގެ ފޮށިތަކެއް. ފޮޓޯ:އައިއޭސީ
ހުލާސާ
އިންޓަރނޭޝަނަލް އެއިޑް ކެމްޕެއިނާއި ދެކޮޅަށް ދައްކަމުންދާ ވާހަކަތަކަށް ރައްދުދީ އެޖަމިއްޔާއިން ބަޔާނެއް ނެރެފިއެވެ.
އެޖަމިއްޔާގެ ބަޔާނުގައި ބުނެފައިވަނީ އައިއޭސީއަކީ ދިވެހިންގެ އިތުބާރާއި ލޯތްބާއެކު، ބައިނަލްއަޤްވާމީ ފެންވަރުގައި ދިވެހިރާއްޖެ ތަމްސީލުކުރަމުން އަންނަ ޖަމިއްޔާއެއްކަމަށެވެ. އަދި އައިއޭސީގެ ކޮންމެ ހަރަކާތަކީ ވެސް އެ ހަރަކާތެއް ކުރިއަށް ގެންދާ ޤައުމެއްގައި ހެދިފައިވާ ޤާނޫނުތަކާއި ޤަވާއިދުތަކާ އެއްގޮތް ވާގޮތުގެ މަތީން އެންމެހައި ހުއްދަތަކާ އެކު ކުރިއަށް ގެންދާ ހަރަކާތްތަކެއްކަމަށްވެސް ބުނެފައިވެއެވެ.
އަދި އެންމެ ފުރަތަމަ ދުވަހުން ފެށިގެން ޖަމިއްޔާގެ އެންމެހައި މަސައްކަތްތައް ކުރެވެމުން އައީ ލިޔެކިޔުންތައް ބަރާބަރަށް ބެލެހެއްޓި، ޖަމިއްޔާގެ އަހަރީ ރިޕޯޓް ވެސް ޤަވާއިދުން މިނިސްޓްރީއަށް ހުށައެޅިގެންކަމަށެވެ.
ޖަމިއްޔާއެއްގޮތުގައި އައިއޭސީ 2020 ގައި ރަޖިސްޓްރީ ކުރެވި، 2021 ވަނަ އަހަރު ޖަމިއްޔާ އޯޑިޓް ކުރުމަށް ތާރޑް ޕާރޓީ އޮޑިޓަރާއެކު އެއްބަސްވެވި އެ މަސައްކަތް އައީ ކުރަމުން ކަމަށާއި 2020 ވަނަ އަހަރުގެ އޯޑިޓްކުރުމަށް "ކްރޯވއާއި" ހަވާލުކުރެވި، އަންކޮލިފައިޑް، ސާފު އޯޑިޓް ރިޕޯޓެއްވަނީ ކްރޯވ އިން ދީފައިވާ ކަމަށްވެސް އެޖަމިއްޔާއިން ވަނީ ބުނެފައެވެ.
އެއަށް ފަހު އައިއޭސީގެ ހަރަކާތްތައް ބައިނަލްއަޤްވާމީގޮތުން ފުޅާވެ ބޮޑުވަމުންދާތީ އެޖަމިއްޔާގެ ބޯޑުން ނިންމީ އޯޑިޓް ކުރުމުގެ ދުނިޔޭގެ އެންމެ ބޮޑު 4 ކުންފުނީގެ ތެރެއިން ކުންފުންޏަކާ ހަވާލުކުރުމަށްކަމަށްވެސް ބުނެފައިވެއެވެ.
މިގޮތަށް އިޚްތިޔާރުކުރި އެންމެ ބޮޑު ސަބަބަކީ އައިއޭސީއަށް ލިބޭ ފައިސާއަކީ ދިވެހި ލޮބުވެތި ރައްޔިތުންގެ މިންނެތް ބުރަ މަސައްކަތުގެ ފައިސާއަށް ވާތީ ކަމަށާއި، އެކަން އެހެން ކުރީ ރައްޔިތުންނަށް ވީހާވެސް ދެފުށް ފެންނަ ގޮތެއް ހެދުމުގެ މަޤްޞަދުގައިކަމަށްވެސް ބުނެފައިވެއެވެ.
2020 ،2021 އަދި 2022 ވަނަ އަހަރުގެ އޯޑިޓަކީ ވެސް އަންކޮލިފައިޑް ސާފު އޯޑިޓް ރިޕޯޓްތަކެއް ކަމަށާއި އަދި ކުރިޔަށް ނުނިމި ހުރި އޯޑިޓްތައް ވެސް ވީ އެންމެ އަވަސް ގޮތެއްގައި އާއްމުކުރުމުގެ މަސައްކަތް ދަނީ ކުރެވެމުންކަމަށްވެސް އެޖަމިއްޔާއިން ބުނެއެވެ.
އޮޑިޓް ރިޕޯޓްތައް ނުނެރި ލަސްވަމުންދާ ސަބަބު ވަރަށް ތަފްޞީލުކޮށް ޖަމިއްޔާގެ މަދަދުވެރިންނަށް އަދި ކަމާބެހޭ ފަރާތްތަކަށް ޙިއްސާކުރަމުންދިޔަކަމަށްވެސް ބުނެފައިވެއެވެ.
“އަޅުގަނޑުމެން އަބަދުވެސް ޤަބޫލު ކުރާގޮތުގައި އަޅުގަނޑުމެން ޖަވާބުދާރީ ވާންޖެހޭ އެންމެ ބޮޑު ބަޔަކީ އަޅުގަނޑުމެން މެދުވެރިކޮށް އެހީފޯރުކޮށްދޭ ލޮބުވެތި ރައްޔިތުންނާއ،ި އަޅުގަނޑުމެންގެ ބެލެނިވެރިޔާ ކަމުގައިވާ ޖަމިއްޔާތަކާ ބެހޭ ވުޒާރާ، އެންމެ ފުރަތަމަ ދުވަހުން ފެށިގެން މިއަދާ ހަމަޔަށް އެފަރާތްތަކަށް ޖަވާބުދާރީވުމުގައި ދެމިތިބީމު، 2023 ވަނަ އަހަރު އައިއޭސީއާއި، އައިއޭސީގެ ބޯޑު މެމްބަރުންގެ ބޮލުގައި ގޮތްނޭނގޭ ފަރާތްތަކުން ބޮޑެތި ތުހުމަތުތަކެއް އަޅުވަމުން ދިޔައިރުވެސް ބަހެއް ބުނުމަށް ނުވަތަ ރައްދެއް ނުދިނުމަށް އަޅުގަނޑުމެން ނިންމި އެންމެ ބޮޑު ސަބަބަކީ ވެސް އެއީ” އައިއޭސީ އިން ބުނެފައިވެއެވެ.
ހަމަމިއާއިއެކު "ސޯޝަލް މީޑިއާ" ގައި ދައުރުވާ "ފޭކް އައިޑީ" ތަކަކީ ރައްޔިތުން ކަމަކަށް ނުވަތަ މީހުންކަމުގައި އެޖަމިއްޔާއިން ނުދެކޭކަމަށްވެސް ބުނެފައިވެއެވެ.
އައިއޭސީން ކޮށްފައިވާ އެންމެހާ ޚަރަދުތައް އޯޑިޓް ރިޕޯޓްތަކުގެ ފައިނޭންސް ސްޓޭޓްމެންޓްގައި ތަފްޞީލުކޮށް ފެންނަން ހުންނާ ކަމަށާއި، އައިއޭސީގެ އޯޑިޓަކާއި ބެހޭގޮތުން އެއްވެސް ސުވާލެއް އޮތްނަމަ ސޯސަލްމީޑިއާގެ ބަދަލުގައި ސީދާ އަޅުގަނޑުމެންނާ ގުޅުއްވައިގެން އޮޅުންފިލުވަން މަސައްކަތް ކުރުމަށް ވެސް ނަސޭހަތްތެރިވާކަމަށް އެޖަމިއްޔާއިން ބުނެއެވެ.
އައިއޭސީ އަކީ 2017 ވަނަ އަހަރު މަދަނީ ޖަމިއްޔާތަކެއް ގުޅިގެން އުފެދިގެން ސީރިޔާއަށް އެހީވުމަށްޓަކައި އެކުލަވާލި ޕްލެޓްފޯމެކެވެ. އަދި އައިއޭސީ ވަކި ޖަމިއްޔާއެއްގެ ގޮތުގައި، މަދަނީ ޖަމިއްޔާތަކުގެ ދަފްތަރުގައި ރަޖިސްޓްރީ ކުރެވިފައިވާނީ 2020 ވަނަ އަހަރުގެ ޖެނުވަރީ މަހުގެ 28 ވަނަ ދުވަހުއެވެ.