އޮޑި ސްޕޯޓްސް ކްލަބަށް އޮސްޓްރޭލިއާގެ ކޯޗެއް ހަމަޖައްސައިފި

ފުރަތަމަ ޑިވިޝަނުގައި މުޅިން އަލަށް ވާދަކުރާ އޮޑި ސްޕޯޓްސް ކްލަބުގެ ކޯޗަކަށް އޮސްޓްރޭލިއާއަށް ނިސްބަތްވާ އިއަން އެންޑްރޫ ގިލަން ހަމަޖައްސައިފިއެވެ. 

އޮޑި ސްޕޯޓްސް ކްލަބަށް އައު ކޯޗެއް އައްޔަނުކޮށްފައި މިވަނީ، އެ ޓީމުން ފުރަތަމަ ޑިވިޝަނަށްކުރި ދަތުރުގައި، ދެވަނަ ޑިވިޝަނުގެ ޗެމްޕިއަންކަން ހޯދިއިރު ޓީމުގެ ކޯޗަކަށް ހުރި މުހައްމަދު އާތިފް (އާތީ) ވިކްޓަރީ ސްޕޯޓްސް ކްލަބާއި ހަވާލުވުމާ ގުޅިގެންނެވެ.

މަޢުލޫމާތު ލިބިފައިވާ ގޮތުގައި، އޮޑިއަށް މި ގެނައި އުމުރުން 60 އަހަރުގެ ގިލަން ވަނީ އޭޝިއާގެ ގިނަ ޤައުމުތަކެއްގައި މަސައްކަތްކޮށްފައެވެ. އަދި އޭނާގެ ކޯޗިން ކެރިއަރުގައި 25 އަހަރުގެ ތަޖުރިބާ ހޯދާފައިވެއެވެ.

ޔޫއެފާ ޕްރޯ ލައިސަންސް ވެސް ހޯދާފައިވާ ގިލަން މަސައްކަތްކޮށްފައިވާ އޭޝިއާގެ ޤައުމުތަކުގެ ތެރޭގައި އިންޑޮނޭޝިއާ، މެލޭޝިއާ، ފިލިޕީންސް، އިންޑިއާ އަދި ނޭޕާލް ހިމެނެއެވެ.

މީގެ އިތުރުން، އިންގްލެންޑާއި އޮސްޓްރޭލިއާގައި ވެސް ކޯޗިން މަސައްކަތްތަކެއް ގިލަން ކޮށްފައިވެއެވެ. މީގެ އިތުރުން، ޓެކްނިކަލް ޑިރެކްޓަރުގެ މަގާމާއި ޔޫތު ޑިވެލޮޕްމަންޓްގެ ރޯލުތަކުގައި ވެސް އޭނާ މަސައްކަތްކޮށްފައި ވެއެވެ.

ގިލަންގެ އެސިސްޓެންޓުންގެ ގޮތުގައި މަސައްކަތް ކުރާނީ، ކުޅުންތެރިންގެ ގޮތުގައި ފުރަތަމަ ޑިވިޝަނުގެ ގިނަ ކްލަބުތަކުން ފެނުނު އަހުމަދު ފައްރާހު (ފައްރަ) އާއި ފަރުހާދު އިސްމާއިލް (ފަރޭ)އެވެ. 

އޮޑި ސްޕޯޓްސް ކްލަބުން ފުރަތަމަ ޑިވިޝަނަށް ތައްޔާރުވުމަށް މިހާރު ޕްރެކްޓިސް ފަށާފައިވާއިރު، އެ ޓީމުގައި ނަން މަޝްހޫރު ގިނަ ކުޅުންތެރިން ހިމެނެއެވެ. އެގޮތުން ދެ ވަނަ ޑިވިޝަނުގައި އެ ޓީމަށް ކުޅުނު، އިބްރާހިމް ވަހީދު ހަސަން (އިއްބެ) އެ ޓީމުގައި މަޑުކުރަން ނިންމާފައިވާއިރު، ރިޓަޔަމެންޓް ދޫކޮށްލައި، އަލުން ކުޅުމަށް އެނބުރި އައި މުހައްމަދު ރަޝީދު (ހޮކޭ) ވެސް އެ ޓީމުގެ ސްކޮޑުގައި ހިމެނެއެވެ.

މީގެ އިތުރުން ގައުމީ ޓީމުގެ މިޑްފީލްޑަރު، ހުސެއިން ނިހާން (ނިހާޓް) އާއި ތަޖުރިބާކާރު ގޯލްކީޕަރު، މުހައްމަދު ޝަފީއު (ޗެކް) ވެސް ފެންނާނީ އޮޑި ސްޕޯޓްސް ކްލަބުންނެވެ. 

ދިވެހި ފުޓުބޯޅަ ސީޒަން ފެށުމަށް މިހާރު ކަނޑައަޅާފައިވަނީ އަންނަ އެޕްރީލް މަހުގެ 8 ވަނަ ދުވަހެވެ.