ޚަބަރު
ކިއުބާގައި މެޑިސިންގެ ދާއިރާއިން ބެޗްލަރސް ޑިގްރީ ހެދުމަށް ސްކޮލަރޝިޕްގެ ފުރުޞަތު ހުޅުވާލައިފި

އެމްއެންޔޫގެ މަތީ ތަޢުލީމު ހޯދި ދަރިވަރުންތަކެއްގެ ދަސްވެނިވުމުގެ ރަސްމިއްޔާތުގެ ތެރެއިން/ފޮޓޯ: އެމްއެންޔޫ
މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ކިއުބާގައި މެޑިސިންގެ ދާއިރާއިން ބެޗެލަރސް ޑިގްރީ ހެދުމަށް ސްކޮލަރޝިޕްގެ ފުރުޞަތު ހުޅުވާލައިފިއެވެ.
މަތީ ތަޢުލީމާއި ބެހޭ ވުޒާރާއިން ވިދާޅުވީ، މި ސްކޮލަރޝިޕް އަށް އެދި ކުރިމަތިލެވޭނީ ޢުމުރުން 25 އަހަރުން ދަށުގެ ފަރާތްތަކަށް ކަމަށެވެ. އަދި މި ސްކޮލަރޝިޕްގެ ދަށުން ކޯހަށް ހޮވޭ ބައިވެރިންނަށް ކޯސް ފެށުމުގެ ކުރިން ސްޕެނިޝް ބަސް ދަސްކޮށްދިނުމަށް ހަމަޖެހިފައިވާކަމަށް އެ ވުޒާރާއިން މަޢުލޫމާތުދެއެވެ.
މި ވުޒާރާއިން ވިދާޅުވީ، ކިއުބާގެ މި ސްކޮލަރޝިޕްގެ ދަށުން ދެކޮޅު ޓިކެޓު ފިޔަވައި އެހެން ހުރިހާ ޚަރަދެއް ކުރަމުންގެންދާނީ، ސްކޮލަރޝިޕް ދޭ ފަރާތުން ކަމަށެވެ. ހަމަ އެހެންމެ، މި ސްކޮލަރޝިޕަށް ހޮވޭ ދަރިވަރުން މިއަހަރުގެ އޯގަސްޓް މަހުގައި ކިއުބާއަށް ފުރަންޖެހޭނެ ކަމަށާއި، ކޯސްތަކަށް ބޭނުންވާ ޕްލޭސްމަންޓް ދިނުމާއި، ފައިނަލް ސެލެކްޝަންގެ އެންމެފަހުގެ ނިންމުންތައް ނިންމާނީ ކިއުބާ ސަރުކާރުން ކަމަށް މަތީ ތަޢުލީމާއި ބެހޭ ވުޒާރާއިން ވިދާޅުވިއެވެ.
މީގެ އިތުރުން އެ ވުޒާރާއިން ވިދާޅުވީ، މި ސްކޮލަރޝިޕަށް ހޮވޭ ދަރިވަރުން ކޯސް ފުރިހަމަކުރުމަށްފަހު، ރާއްޖެއަށް އެނބުރި އަންނަން ޖެހޭނެ ކަމަށެވެ. އަދި ރާއްޖޭގެ ޞިއްޙީ ދާއިރާގައި ވަކި މުއްދަތެއް ވަންދެން ޚިދުމަތް ކުރަންޖެހޭނެ ކަމަށް ވެސް އެ ވުޒާރާއިން ވަނީ ހާމަކުރައްވާފައެވެ. މިކަމުގެ ސަބަބުން ރާއްޖޭގައި މަސައްކަތްކުރާ މި ޤައުމުގެ މަސައްކަތްތެރީން އިތުރުވެ، ރާއްޖޭގެ ޞިއްޙީ ދާއިރާ އަށް އިތުރު ކުރިއެރުމެއް ލިބިގެންދާނެއެވެ. އަދި މިއީ ރާއްޖޭގެ ޞިއްޙީ ދާއިރާ ހަރުދަނާކުރުމަށް އެޅިގެންދާނެ މުހިންމު ފިޔަވަޅެއް ކަމަށް އަދުގެ ސަރުކާރުނެ ދެކެއެވެ.
މި ސްކޮލަރޝިޕް އަށް ކުރިމަތިލުމަށް ޝައުގުވެރިވާ ފަރާތްތަކުން މާރިޗު 13 ވާ ބުރާސްފަތި ދުވަހުގެ 14:00 ގެ ކުރިން އެކަމަށް އެދި ހުށައަޅަންޖެހޭ އެންމެހާ ލިޔެކިތުންތަކާއެކު އެޕްލިކޭޝަން ހުށައެޅުމަށް މަތީ ތަޢުލީމާއި ބެހޭ ވުޒާރާއިން ވަނީ އަންގަވާފައެވެ. މީގެ އިތުރުން އެ ވުޒާރާއިން ވިދާޅުވީ، ސްކޮލަރޝިޕަށް ކުރިމަތިލާ ފަރާތްތަކުގެ ތެރެއިން ނޮމިނޭޓްކުރެވޭ ކެނޑިޑޭޓުން އެ ވުޒާރާގެ އިރުޝާދުގެ ދަށުން އިތުރު މަސައްކަތްތައް ކުރަންޖެހޭނެ ކަމަށެވެ.