ފަސް އަހަރަށްފަހު ފުރަތަމަ ޑިވިޝަނުގެ ފުރަތަމަ ފެނިލުމަށް ވިކްޓަރީން ފަރިތަކުރުންތައް ފަށައިފި

ފަސް އަހަރަށްފަހު ފުރަތަމަ ޑިވިޝަނުގެ ފުރަތަމަ ފެނިލުމަށް ވިކްޓަރީ ސްޕޯޓްސް ކްލަބުން ފަރިތަކުރުންތައް ފަށައިފިއެވެ. މިއީ ސަސްޕެންޝަންގެ ސަބަބުން 2019 ވަނަ އަހަރުގެ ފުޓުބޯޅަ ސީޒަނަށްފަހު އަލުން އަނބުރާ ފުރަތަމަ ޑިވިޝަނަށް އެރުމަށް 2022ގައި އެ ޓީމުން ފެށި މަސައްކަތާއެކު، ދެވަނަ ޑިވިޝަނުގައި ދެ ފަހަރެއްގެ މަތިން ވާދަކޮށް ފުރަތަމަ ޑިވިޝަނަށް ކޮލިފައިވުމަށްފަހު، ވިކްޓަރީން އަނބުރާ ރާއްޖޭގެ މަތީ ފަންތީގެ ފުޓުބޯޅައަށް އެނބުރި އައުމެވެ.

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ވިކްޓަރީ ސަސްޕެންޑުކުރީ 12 ޑިސެމްބަރު 2019 ގައި، ކުޅުންތެރިންނަށް މުސާރަ ނުދޭ މައްސަލަ އާއި އެޑްމިނިސްޓްރޭޓިވް މައްސަލަތަކާ ހެދިއެވެ. 

ފުރަތަމަ ޑިވިޝަނަށް އެނބުރި އައުމަށް ވިންޓަރީއިން ދެވަނަ ޑިވިޝަނުގައި ފުރަތަމަ ވާދަކުރި ފަހަރު އެ ޓީމު ވަނީ ގްރޫޕް ސްޓޭޖުން މުބާރާތާ އަލްވަދާއު ކިޔަން ޖެހިފައެވެ. އެކަމުގެ އެއް ސަބަބަކީ، އެ ފަހަރުގެ ޓީމު ރަގަޅަށް އެކުލަވާލަން ފުރުސަތު ނުލިބުމެވެ.

ނަމަވެސް ޖެހިގެން އައި އަހަރު އެ ޓީމުން ދެވަނަ ޑިވިޝަނަށް ނިކުތީ، ފުރަތަމަ ޑިިވިޝަނަށް އެރުމުގެ އަޒުމުގައި، އެކަން ހާސިލްކުރުމަށް ފުރިހަމައަށް ތައްޔާރު ވެގެނެވެ. އެގޮތުން އެންމެ ފަހުން ބޭއްވި ދެވަނަ ޑިވިޝަން ފުޓުބޯޅަ މުބާރާތުގައި ފުރަތަމަ ޑިވިޝަނުން ޖާގަ ހޯދުމަށް ކުއާޓާ ފައިނަލުގައި އެ ޓީމަށް ބައްދަލުކުރަން ޖެހުނީ ނިއުރޭޑިއަންޓާއެވެ. ދެވަނަ ޑިވިޝަނުގެ ސެމީ ފައިނަލުގައި ކުޅޭ ޓީމުތަކަށް ފުރަތަމަ ޑިވިޝަނުގެ ފުރުސަތު ލިބޭއިރު، ވިކްޓްރީން އެ ފުރުސަތު ހޯދީ 2-0 އިން ނިއުރޭޑިއަންޓް ބަލިކުރުމަށްފަހުއެވެ.

ވިކްޓަރީގެ ފަރިތަކުރުންތައް ހޮނިހިރު ދުވަހުގެރޭ ފަށާފައިވާއިރު، އެ ޓީމުގެ ކޯޗަކަށް އައްޔަންކޮށްފައި ވަނީ ތަޖުރިބާކާރު މުހައްމަދު އާތިފް (އާތީ)އެވެ. އޭނާ އެންމެ ފަހުން ހުރީ އޮޑި ސްޕޯޓްސް ކްލަބުގައެވެ. އަދި އާތީގެ އިރުޝާދުގެ ދަށުން އޮޑިން ވަނީ ދެވަނަ ޑިވިޝަން ކާމިޔާބުކޮށްފައެވެ.

ކުރިޔަށް އޮތް ފުޓުބޯޅަ ސީޒަނަކީ ވިކްޓަރީގެ ވަރުގަދަ ސީޒަނަަކަށް ހެދުމަށް، އެ ޓީމުން ވަނީ ރަގަޅު ސްކޮޑެއް އެކުލަވާލާފައެވެ. އެގޮތުން ދެ ވަނަ ޑިވިޝަނުގައި ވެސް ވިކްޓަރީ އަށް ކުޅެދިން، ތަޖުރިބާކާރު ދެ ކުޅުންތެރިން ކަމަށްވާ އަކުރަމް އަބްދުލް ޣަނީ (އަކޫ) އާއި މުހައްމަދު އުމެއިރު މި ފަހަރު ވެސް ފެންނާނީ އެ ޓީމުންނެވެ. 

މީގެ އިތުރުން، ވިކްޓަރީ ހިމެނޭހެން ފުރަތަމަ ޑިވިޝަނުގެ ގިނަ ޓީމުތަކަކުން ފެނުނު އަލީ ޝާމިސް (ތޮއްޕޭ) އާއި ނިއު ރޭޑިއަންޓާއި ވިކްޓަރީ އަށް ކުރިން ކުޅުނު އަބްދުﷲ މިދުހަތު ފަހުމީ (ބިޗަޑް) އާއި ޓީސީ އަށް ކުޅުނު މުހައްމަދު ސާދު ނިޒާރާއި ނަޝާހު އަހުމަދު (ނައްޓު) އާއި ކްލަބް ވެލެންސިއާގައި ހުރި ހަސަން ސުފިޔާން (ސޫފީ) އަދި މާޒިޔާ އާއި ވެލެންސިއާ އަށް ކުޅުނު އަމްދާން އަލީ (އެންޑީ) ހިމެނެއެވެ.