ޚަބަރު
މިއަހަރުގެ ޖަނަވަރީ މަހު އެފްޕީއޭ އަށް އެންމެ ގިނައިން ހުށައަޅާފައިވަނީ ކުޑަކުދިންނަށް ކުރާ އަނިޔާއާ ގުޅޭ މައްސަލަތައް
ކުޑަކުދިންނަށް ލިބޭ އަނިޔާއާއި ދެކޮޅަށް ހަދާފައިވާ ޕޯސްޓަރެއް: ފޮޓޯ: ޔުނިސެފް
މިއަހަރުގެ ޖަނަވަރީ މަހު ފެމިލީ ޕްރޮޓެކްޝަން އޮތޯރިޓީ، އެފްޕީއޭއަށް އެންމެ ގިނައިން ހުށައަޅާފައިވަނީ ކުޑަކުދިންނަށް ކުރާ އަނިޔާއާ ގުޅޭ މައްސަލަތައް ކަމަށް އެ އޮތޯރިޓީގެ ތަފާސްހިސާބުތަކުން ދައްކާފިއެވެ.
ފެމިލީ ޕްރޮޓެކްޝަން އޮތޯރިޓީގެ ތަފާސްހިސާބުތަކުން ދައްކާގޮތުގައި، މިދިޔަ ޖަނަވަރީ މަހު އެ އޮތޯރިޓީއަށް ވަނީ ޖުމްލަ 258 މައްސަލައެއް ހުށައަޅައިފައެވެ. އެގޮތުން، މި މައްސަލަތަކުގެ ތެރެއިން އެނެމެ ގިނައީ ކުޑަކުދިންނަށް ކުރާ އަނިޔާ އާއި ގެެވެށި އަނިޔާ އާއި ގުޅޭ މައްސަލަތައްކަމަށް އެ އޮތޯރިޓީން ވަނީ ހާމަކޮށްފައެވެ.
އެގޮތުން، މިއަަހަރުގެ ޖަނަވަރީ މަހު އެފްޕީއޭއަށް ހުށައަޅާފައިވާ މައްސަލަތަކުގެ ތެރޭގައި:
- ކުޑަކުދިންނަށް ކުރާ އަނިޔާގެ 112 މައްސަލަ
- ގެވެށި އަނިޔާ އަދި ވަކި ޖިންސަކަށްވީތީ ކުރާ އަނިޔާގެ 57 މައްސަލަ
- ކުޑަކުދިންގެ އަޚުލާގާއި ގުޅުން ހުރި 26 މައްސަލަ
- އަމިއްލަ ނަފްސަށް އަނިޔާކުރުމާއި ފުރާނައަށް ގެއްލުން ދިނުމުގެ 26 މައްސަލަ
- ދަރިން ބެލުމާއި ޢާއިލީ 21 މައްސަލަ
- އަސާސީ ޚިދުމަތްތައް ފޯރުކޮށްދިނުުމުގެ 3 މައްސަލަ
- ކުޑަކުދިންގެ ޙައްޤުތަކަށް އުނިކަން ލިބޭފަދަ 1 މައްސަލަ
- ނުކުޅެދުންތެރިކަން ހުންނަ ފަރާތްތަކާއި އުމުރުން ދުވަސްވީ މީހުންގެ 11 މައްސަލަ
- އެހެނިހެން 1 މައްސަލަ
މީގެ އިތުރުން، ކުޑަކުދިންގެ އަޚުލާގާއި ގުޅުން ހުރި މައްސަލަތަކެއް ވެސް ޖަނަވަރީ މަހު ވަނީ އެފްޕީއޭ އަށް ހުށަހަޅާފަައެވެ. އޭގެ ތެރޭގައި، ރުޅިގަދަވެ އުޅުމުގެ 5 މައްސަލަ، ސްކޫލަށް ދާން ބޭނުން ނުވުމުގެ 5 މައްސަލަ، ގެއިން ނިކުމެގެން ދިއުމުގެ 5 މައްސަލަ، ކުށުގެ ވެއްޓަށް ހުށަހެޅިދާނެ ފަދަ ޢަމަލުތަކުގެ 4 މައްސަލަ، އަދި ސުލޫކީ މައްސަލައިގެ 1 މައްސަލަ ހުށަހަޅައިފައިވާކަމަށް އެ އޮތޯރިޓީ އިން މަޢުލޫމާތު ދެއެވެ.
ފެމިލީ ޕްރޮޓެކްޝަން އޮތޯރިޓޯ އިން ވިދާޅުވީ، މި މައްސަލަތަކުގެ ތެރޭގައި ހިމެނޭ އެއް ކުއްޖަކު ދައުލަތުގެ ބެލުމުގެ ދަށަށް ގެނެސްފައިވާ ކަމަށެވެ. މިއާއިއެކު، މިހާރު ދައުލަތުން ބަލަހައްޓަމުންދާ ކުދިންގެ އަދަދު ޖުމްލަ 145 އަށް އަރާފައިވާކަމަށް އެ އޮތޯރިޓީއިން ބުނެއެވެ. މީގެ ތެރޭގައި ހިމެނެނީ، 64 އަންހެން ކުދިންނާއި 81 ފިރިހެން ކުދިންނެވެ. އެފްޕީއޭއިން ވިދާޅުވީ، މިއަހަރުގެ ޖަނަވަރީ މަހު ދައުލަތުގެ ބެލުމުގެ ދަށުގައި ހުރި 5 ކުއްޖަކު އަލުން ވަނީ އެކުދިންގެ ޢާއިލާއާއި ހަވާލުކުރެވިފައި ކަމަށެވެ.
ކުޑަކުދިންނާއި ގުޅުންހުރި މިފަދަ މައްސަލަތައް ފަހަކަށް އައިސް ވަނީ ވަރަށް ޢާންމުވެފައެވެ. އަދި މި މައްސަލައަށް އެދެވޭ ޙައްލެއް ގެނައުމަށް ކަމާ ގުޅުންހުރި އިދާރާތަކުން ގިނަ މަސައްކަތްތަކެއް ކުރަމުން ދިޔަ ނަމަވެސް، އަދިވެސް މި މައްސަލައަށް ރަނގަޅު ޙައްލެއް ލިބިފައެއް ނުވެއެވެ.
