އިސްރާއީލު ޕާސްޕޯޓު މަނާކުރުމަށް އިމިގްރޭޝަންގެ ޤާނޫނަށް އިސްލާހު ގެންނަންޖެހޭ: ޚާރިޖީ ވަޒީރު

އިސްރާއީލު ޕާސްޕޯޓު މަނާކުރުމަށް މޯލްޑިވްސް އިމިގްރޭޝަންގެ ޤާނޫނަށް އިސްލާހު ގެންނަންޖެހޭ ކަމަށް ޚާރިޖީ ވަޒީރު ޑރ. އަބްދުﷲ ޚަލީލް ވިދާޅުވެއްޖެއެވެ.

ވަޒީރު މިފަދައިން ވިދާޅުވީ، ރައްޔިތުންގެ މަޖިލީހުގައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ލިޔުމުން ޖަވާބު ހޯއްދެވުމަށް އެދި ކުރެއްވި ސުވާލަކަށް ޖަވާބު ދެއްވަމުންނެވެ.

މެންބަރު މުހައްމަދު އިބްރާހިމް ވަނީ، ދިވެހިރާއްޖޭގެ ފޮރިންގ ސަރވިސަސް ގައި އޮންނަ ޤާނޫނުގައި ބުނާގޮތުން ދިވެހި ދައުލަތުން ބޭރު ދައުލަތްތައް ޤަބޫލުކުރުމާއި، އެ ޤަބޫލުކުރުންތައް އަނބުރާ ގެންދިޔުމާއި ގުޅިގެން ބޭރު ޤައުމުތަކާއެކު ރާއްޖެއިން ސިޔާސީ ގުޅުން ޤާއިމްކުރުމާއި، އެ ބަދަހިކޮށްފައި އޮތް ސިޔާސީ ގުޅުން ކަނޑާލުމާއި ގުޅޭގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ލަފާދެއްވި ކަން ފާހަގަކުރައްވާފައެވެ.  އަދި މިކަމާއި ގުޅިގެން ނިންމަވަން ޖެހޭ އެންމެހާ ނިންމުންތައް ތަންފީޒު ކުރުމަކީ ޚާރިޖީ ވަޒީރުގެ މަސްއޫލިއްޔަތެއް ކަމަށް ވާއިރު، އިސްރާއީލުގެ ޕާސްޕޯޓު ރާއްޖެއިން މަނާކުރުމަށް މިދިޔަ އަހަރުގެ ޖޫން މަހުގެ 2 ވަނަ ދުވަހު ނިންމާފައިވާ ނިންމުން އަދިވެސް ތަންފީޒު ނުވަނީ ކީއްވެގެންތޯ މެންބަރު ވަނީ ސުވާލު ކުރައްވާފައެވެ.

މި ސުވާލަށް ޖަވާބު ދެއްވަމުން ރާއްޖޭގެ ޚާރިޖީ ވަޒީރު ޑރ. އަބްދުﷲ ޚަލީލް ވިދާޅުވީ، އިސްރާއީލްގެ ޕާސްޕޯޓުު ރާއްޖެއިން މަނާކުރުމަށް ވަޒީރުންގެ މަޖިލީހުގައި ރައީސުލްޖުމްހޫރިއްޔާ ނިންމަވާފައިވާ ކަމަށެވެ. ނަމަވެސް، އެ ނިންމުން ތަންފީޒުކޮށް، މިކަމުގެ އެންމެ ފަހު މަރުޙަލާ އަށް ދިއުމަށްޓަކައި ރާއްޖޭގެ އިމިގްރޭޝަންގެ ޤާނޫނަށް އިސްލާހު ގެންނަންޖެހޭ ކަމަށް ވަޒީރު ވަނީ ވިދާޅުވެފައެވެ. މީގެ އިތުރުން ވަޒީރު ވިދާޅުވީ، އިމިގްރޭޝަންގެ ޤާނޫނު އިސްލާހުކުރުމަށް ހުށައަޅާފައިވާ ކަމަށާއި، އެ އިސްލާޙު މި ވަގުތު އޮތީ މަޖިލީހުގެ ސަލާމަތީ ހިދުމަތްތަކާއި ބެހޭ ކޮމިޓީ (241) ގައި ކަމަށެވެ. އަދި ރައްޔިތުންގެ މަޖިލީހުން ދަނީ ކަމާ ގުޅުންހުރި ފަރާރްތައް ހާޒިރުކޮށް، މި މަރުޙަލާ ދިރާސާކުރަމުން ކަމަށް ވަޒީރު  ވިދާޅުވިއެވެ.

 ވަޒީރު ވިދާޅުވީ، އިމިގްރޭޝަންގެ ޤާނޫނަށް އިސްލާހު ގެނައުމާއިއެކު އިސްރާއީލުގެ ޕާސްޕޯޓު ދިވެހިރާއްޖެއިން މަނާކުރުމަށް މަގުފަހިވެގެންދާނެ ކަމަށެވެ. މީގެ އިތުރުން ވަޒީރު ވަނީ، އިސްރާއީލުން ފަލަސްޠީނާއި ދެކޮޅަށް ހިންގަމުންދާ ނިރުބަވެރި ހަމަލާތައް ކުށްވެރިކޮށް، ދިވެހި ސަރުކާރުން ގޮވާލާ ގޮވާލެއްވުން ތަކުރާރު ކުރައްވާފައެވެ. އަދި މިކަމާއި ގުޅިގެން، ބައިނަލްއަޤްވާމީ ފޯރަމްތަކުގައި އިސްލާމީ ޤައުމުތަކާއި ގުޅިގެން ގިނަ މަސައްކަތްތަކެއް ކުރަމުންދާ ކަމަށް ވަޒީރު ވަނީ ވިދާޅުވެފައެވެ.