ނިއުޒީލޭންޑު ބަލިކޮށް އިންޑިއާއިން ތިންވަނަ ފަހަރަށް ޗެމްޕިއަންސް ޓްރޮފީ ކާމިޔާބުކޮށްފި

ފައިނަލުގައި ނިއުޒީލޭންޑު ބަލިކޮށް އިންޑިއާއިން ތިންވަނަ ފަހަރަށް އިންޓަރނޭޝަނަލް ކްރިކެޓް ކައުންސިލް (އައިސީސީ) ޗެމްޕިއަންސް ޓްރޮފީ ކާމިޔާބުކޮށްފިއެވެ.

މި މުބާރާތް ރަސްމީކޮށް ޕާކިސްތާނުގައި ބޭއްވި ނަމަވެސް، ދުބާއީގައި ކުޅުނު ފައިނަލް މެޗު އިންޑިއާއިން ކާމިޔާބުކުރީ ހަތަރު ވިކެޓުންނެވެ. 

މިފަހަރުގެ ޗެމްޕިއަންސް ޓްރޮފީ އިންޑިއާއިން މި ކާމިޔާބުކުރީ، އެ ޓީމު ކުޅުނު ހުރިހާ މެޗެއް ކާމިޔާބުކުރުމަށްފަހުއެވެ. 

ފައިނަމް މެޗުގައި ގުރު ދިމާވެގެން ނިއުޒީލެންޑުން ނިންމީ ކުޅެން އެރުމަށެވެ. އަދި ހުރިހާ ކުޅުންތެރިން ނުބައިވެގެން އެ ޓީމަށް ހެދިފައިވަނީ 251 ލަނޑެވެ. އެ ޓީމުން އެންމެ ރަނގަޅަށް ކުޅުނީ 101 ބޯޅައިން 63 ލަނޑު ހެދި ޑެރީލް މިޗެލް އާއި، ނުބައިނުވެ 40 ބޯޅައިން 53 ލަނޑު އެއްކުރި މައިކަލް ބްރޭސްވެލްއެވެ. އަދި މި އިނިންގްސްގައި އިންޑިއާގެ ވަރުން ޗަކަރަވަރަތީ އާއި ކުލްދީޕް ޔާދަވް ވަނީ ކޮންމެ އުކުންތެރިއަކު ދެ ވިކެޓް ނަގާފައެވެ.

އިންޑިއާއިން މެޗު ކާމިޔާބުކުރީ، ބާކީ ހަ ބޯޅަ އޮއްވައި ހަ ކުޅުންތެރިން ނުބައިވެގެން 254 ލަނޑު ހަދައިގެންނެވެ. އިންޑިއާއިން އެންމެ ރަނގަޅަށް ކުޅެފައިވަނީ 83 ބޯޅައިން 76 ލަނޑު ހެދި ކެޕްޓަން ރޯހިތު ޝަރްމާ އާއި، 62 ބޯޅައިން 48 ލަނޑު އެއްކުރި ޝްރެޔާސް އައްޔަރެވެ. 

މި މެޗުގައި ވިރާތު ކޯލީއަށް ރަގަޅު ކުޅުމެއް ދެއްކޭ ގޮތެއް ނުވިއެވެ. އޭނާއަށް ދެ ބޯޅައިން ހެދުނީ އެންމެ ލަނޑެކެވެ. އަދި ތިން ވަނަ ބޯޅައިގައި އޭނާ ވަނީ ނުބައިވެފައެވެ.

އިންޑިއާގެ ކްރިކެޓު ޓީމަށް 2023ގައި އޮތް ވޯލްޑް ކަޕް ނާކާމިޔާބުވި ނަމަވެސް، އޭގެ ފަހުން އެ ޓީމުން މިވަނީ ޗެމްޕިއަންސް ޓްރޮފީގެ އިތުރުން، ޓީ20 ވޯލްޑް ކަޕް ވެސް ކާމިޔާބުކޮށްފައެވެ.