ޚަބަރު
މޯލްޑިވްސް މީޑިއާ ކައުންސިލްގެ ބައި-އިލެކްޝަނަށް ކުރިމަތިލުމަށް ހުޅުވާލައިފި

2024 ވަނަ އަހަރުގެ މޯލްޑިވްސް މީޑިއާ ކައުންސިލްގެ ބައި-އިލެކްޝަންގެ ތެރެއިން/ފޮޓޯ: ޔޫތު މިނިސްޓްރީ
މޯލްޑިވްސް މީޑިއާ ކައުންސިލްގެ ބައި-އިލެކްޝަނަށް ކުރިމަތިލުމަށް, ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާއިން ހުޅުވާލައިފިއެވެ.
އެ ވުޒާރާއިން ވިދާޅުވީ، މޯލްޑިވްސް މީޑީއާ ކައުންސިލްގެ ޤާނޫނުގެ ދަށުން އެކުލަވާލާފައިވާ މީޑީއާ ކައުންސިލްގެ މީޑީއާތައް ތަމްސީލުކުރާ މެންބަރެއްގެ މަޤާމު ހުސްވާކަމަށެވެ. އެހެންކަމުން، މިކަމާއި ގުޅިގެން މީޑީއާ ތަމްސީލު ކުރާނެ މެންބަރަކަށް ކުރިމަތިލުމަށް ހުޅުވާލެވިފައިވާކަމަށް އެ ވުޒާރާއިން ވިދާޅުވިއެވެ.
މޯލްޑިވްސް މީޑިއާ ކައުންސިލްގެ ޤާނޫނުގެ 7 ވަނަ މާއްދާގައިވާ ގޮތުން މީޑިއާ ކައުންސިލްގެ މެންބަރުންގެ ކިބައިގައި ވަކި ޝަރުތުތަކެއް ހުންނަން ޖެހެއެވެ. އޭގެ ތެރޭގައި، އުމުރުން 18 އަހަރު ފުރިފައިވާ ދިވެހި ރައްޔިތެއް ކަމުގައިވުމާއި، އިސްލާމް ދީނުގައި ޙައްދެއް ކަނޑައެޅިފައިވާ ކުށެއް ކުރިކަން އިސްލާމީ ޝަރީޢަތަށް ސާބިތުވެފައިވާ މީހަކު ކަމުގައި ނުވުމާއި، މަސްތުވާ ތަކެތީގެ ވިޔަފާރި ކުރުމުގެ ކުށް ސާބިތުވެފައިވާ މީހެއްކަމުގައި ނުވުމާއި، ކުޑަކުދިންނަށް ޖިންސީ ގޯނާ ކުރުމުގެ ކުށް ޝަރީއަތަށް ސާބިތުވެފައިވާ މީހެއްކަމުގައި ނުވުން ހިމެނެއެވެ.
މީގެ އިތުުރުން، ކައުންސިލްގެ މެންބަރުކަމަށް ކުރިމަތިލާ ފަރާތަކީ ފާއިތުވެދިޔަ 2 އަހަރުގެތެރޭގައި ޖިނާއީ ކުށެއް ކުރިކަން ޝަރީއަތަށް ސާބިތުވެފައިވާ މީހެއްކަމުގައި ވެގެން ނުވާނެއެވެ. އަދި ޚިޔާނާތުގެ ނުވަތަ ރިޝްވަތުގެ ކުށެއް ކުރިކަން ޝަރީޢަތަށް ސާބިތުވެފައިވާ މީހެއްކަމުގައި ނުވުމާއި، މުޖްތަމަޢު ގަބޫލުކުރާ މިންގަނޑުތަކުން އަބުރުވެރި، އަޚުލާގު ރަނގަޅު މީހެއް ކަމުގައިވުމަކީ ވެސް މީޑިއާ ކައުންސިލްގެ މެންބަރުކަމަށް ކުރިމަތިލާ ފަރާތްތަކުގެ ހުންނަން ޖެހޭ ޝަރުތުތަކެވެ. ހަމަ އެހެންމެ، ފާއިތުވެދިޔަ 12 މަސްދުވަހުގެ ތެރޭގައި އެއްވެސް ނޫހެއްގައި އެމީހަކު ލިޔުނު އެއްޗަކާއި ބެހޭގޮތުން ޝަރީޢަތަށް ކުށެއް ސާބިތުވެފައިވާ މީހެއްކަމުގައި ވެގެން ނުވާނެކަމަށް ވެސް މި ޝަރުތުތަކުގެ ތެރޭގައި ބަޔާންކޮށްފައި ވެއެވެ.
މޯލްޑިވްސް މިޑިއާ ކައުންސިލްގައި މަސައްކަތްކުރާ މެންބަރުންގެ މުއްދަތަކީ މީލާދީ 2 އަހަރެވެ. އެއްވެސް މެންބަރަކަށް ކައުންސިލުގެ މެންބަރުކަމުގައި ވިދިވިދިގެން 2 ދައުރު އަދާ ނުކުރެވޭނެއެވެ. އެހެންކަމުން މި އިންތިޚާބުގައި ވާދަކުރަން އެދޭ، ޝަރުތުހަމަވާ ފަރާތްތަކުން މާރިޗް މަހުގެ 18 ވަނަ ދުވަހުގެ 14:00 ގެ ކުރިން ކުރިމަތިލެވޭނެއެވެ.