ޒަކާތު ފަންޑުން މަތީ ތަޢުލީމުގެ ސްކޮލަރޝިޕަށް ހުޅުވާލަނީ

ޒަކާތު ފަންޑުން މަތީ ތަޢުލީމަށް ކިޔެވުމަށް ދޫކުރާ ސްކޮލަރޝިޕަށް އެދުމުގެ ފުރުޞަތު ހުޅުވާލަން ތައްޔާރުވެފައިވާކަމަށް ދިވެހި ރާއްޖޭގެ ޒަކާތު ހައުސްއިން ވިދާޅުވެއްޖެއެވެ.

 ޒަކާތު ފަންޑުން މަތީ ތަޢުލީމަށް އެހީ ދިނުމުގެ ފުރުސަތު ހުޅުވައިލުމުގެ އަސޫލު، މިދިޔަ އަހަރުގެ ޑިސެމްބަރު މަހު އެކުލަވާލެވިފައިވާއިރު، މި ފަންޑުން، މަތީ ތަޢުލީމުގެ އިތުރުން ބޭސްފަރުވާއަށް ވެސް ގިނަ އެހީތަކެއް މިހާރު ވެސް ދަނީ ފޯރުކޮށްދެވެމުންނެވެ.

ޒަކާތު ފަންޑުން މަތީ ތަޢުލީމަށް ކިޔެވުމަށް ދޫކުރާ ސޮކޮލަރޝިޕަށް އެދުމުގެ ފުރުޞަތު ހުޅުވާލަން ތައްޔާރުވެފައިވާކަމަށް ދިވެހި ރާއްޖޭގެ ޒަކާތު ހައުސްއިން ވިދާޅުވެއްޖެއެވެ. ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަފުޅުދައްކަވަމުން ޒަކާތު ހައުސްގެ ޑިރެކްޓަރ ޖެނެރަލް ފަޟީލަތުއްޝައިޚް ޢިއްޒުއްދީން ޢަދްނާން ވިދާޅުވީ ޒަކާތު ހައުސްއިން މީހުން ބިނާކުރުމަށްޓަކައި އެހީތެރިކަން ފޯރުކޮށްދިނުމަކީ މުހިއްމު ކަމެއްކަމަށެވެ.
ދީނީ އަދި އިޖުތިމާޢީ ދާއިރާއިން މީހުން ބިނާކުރުމުކަމީ މުހިއްމުކަމެއް. އިޢުލާން ކުރުމުގެ ކުރިން ކޮމެޓީން ބަލަންޖެހޭ ކަންކަން ބަލަމުން ދަނީ. މިއީ ޝަރީޢާ ހުއްދަކުރާ އުޞޫލުގެ މަތިން ކުރާ މުހިއްމުކަމެއް.

ޒަކާތު ހައުސްގެ ޑިރެކްޓަރ ޖެނެރަލް ފަޟީލަތުއްޝައިޚް ޢިއްޒައްދީން ޢަދުނާން ވިދާޅުވިއެވެ.

ޒަކާތު ފަންޑުން މަތީ ތައުލީމަށް އެހީ ދިނުމުގެ އުސޫލުގައިވާގޮތުން ސްކޯލަރޝިޕް ދިނުމުގައި އިސްކަމެއްދޭނީ ފަގީރުންނާއި މިސްކީނުންގެ ދަފްތަރުގައި ރަޖިސްޓްރީކޮށްފައިވާ ފަރާތްތަކާއި މާލީ ފުދުންތެރިކަން ނެތް މިންވަރާއި، ތައުލީމީ ފެންވަރާއި، ގައުމަށް ޚިދުމަތްކޮށްފައިވާ މުއްދަތަށެވެ. ނަމަވެސް ހާސިލްކޮށްފައިވާ ތައުލީމީ ސަނަދަށްވުރެ މަތީ ފެންވަރެއްގެ ކޯހެއްގައި ތައުލީމު ހާސިލްކުރުމަށް އެދޭ ދަރިވަރުންނާއި ކިޔަވައިފައިވާ ދާއިރާއާ ގުޅޭ އިސްލާމިކް ކޮންސެޕްޓް ހިމެނޭ ކޯހެއް ހެދުމަށް ބޭނުންވާ ދަރިވަރުން މި ބައިން އިސްތިސްނާވާނެއެވެ.

ސަރުކާރުގެ، ނުވަތަ އެހެން މުޢައްސަސާއެއްގެ، ނުވަތަ އާންމު ފަރާތެއްގެ ހިލޭ އެހީގައި ކިޔެވުމުގެ ފުރުސަތު ލިބިފައިވާ އެއްވެސް ކުއްޖަކަށް ޒަކާތު ފަންޑުން މަތީ ތަޢުލީމުގެ އެހީއެއް ނުލިބޭނެކަމަށް ޒަކާތު ފަންޑުން މަތީ ތައުލީމަށް އެހީ ދިނުމުގެ އުސޫލުގައި ބަޔާންކޮށްފައިވެއެވެ.