ޑިޒާސްޓާ އޮފީހަށް ގިނަ އަދަދެއްގެ ނައިލޯނު ގޯނި ހޯދުމުގެ މަސައްކަތް ފަށައިފި

ނޭޝަނަލް ޑިޒާސްޓަރ މެނެޖްމަންޓް އޮތޯރިޓީ (އެންޑީއެމްއޭ) އިން ގިނަ އަދަދެއްގެ ނައިލޯނު ގޯނި ސަޕްލައިކޮށްދޭނެ ފަރާތެއް ހޯދުމަށް އިއުލާނުކޮށްފިއެވެ.

މި އިއުލާނުގައި ބަޔާންކޮށްފައިވާ ގޮތުން، މި އޮތޯރިޓީއަށް 70،000 ނައިލޯނު ގޯނި ވަނީ ބޭނުންވެފައެވެ. މިގޮތުން، ނައިލޯނު ގޯނި ސަޕްލައިކޮށްދިނުމަށް ޝައުޤުވެރިވާ ފަރާތްތަކުން މި މަހުގެ 19 ވާ ބުދަދުވަހުގެ 11:00 ގެ ކުރިން އޮތޯރިޓީއަށް ވަޑައިގެން، އަންދާޒީ ހިސާބު ހުށައެޅުމަށް އެ އޮތޯރިޓީއިން ވިދާޅުވެއެވެ.

ޑިޒާސްޓާރ މެނޭޖްމެންޓުން، ހޯދުމަށް އުލާންކޮށްފައި ވަނީ 22 އިންޗި ފުޅާ، 36 އިންޗި ދިގުމިން ހުންނަ ގޯންޏެކެވެ. މި ގޯނީގެ ބޭނުމަކީ، ވެލިއެޅުމަށްފަހު ފެންބޮޑުވާ ދުވަސްވަރު ޖެހުމަށްކަމަށާއި، ސަޕްލައިކޮށްދޭ ގޯނިތައް ވާންޖެހޭނީ ހުދު ގޯނިތަކަށް ކަމަށްވެސް އެ އިއުލާނުގައި ބަޔާންކޮށްފައިވެއެވެ.

އެންޑީއެމްއޭ އިން  އެންމެފަހުން މާލެއަށްކުރި ވިއްސާރައިގައި ވެސް އެކި ސަރަހައްދުތަކަށް ދެހާހަށްވުރެ ގިނަ ވެލިބަސްތާ ޖެހުމަށް ފޯރުކޮށްދީފައިވާކަން ފާހަގަކޮށްލެވެއެވެ.