ބްރޯޑްކޮމް ގެ ނައިބު ރައީސް މުހައްމަދު ފަޒީން ވަކިކުރަން ކޮމިޓީއިން ފާސްކޮށްފި

މޯލްޑިވްސް ބްރޯޑްކާސްޓިން ކޮމިޝަން، ބްރޯޑްކޮމް ގެ ނައިބު ރައީސް ގެ މަޤާމުގައި ހުރި މުހައްމަދު ފަޒީން އެ މަޤާމުން ވަކިކުުމަށް  ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ފާސްކޮށްފިއެވެ.

ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން މިކަން ނިންމަވާފައިވަނީ، ބްރޯޑްކޮމް އިން މުހައްމަދު ފަޒީން ވަކިކުރަން ހުށައަޅާފައިވާ މައްސަލަގައި އޭނާ ވަކިކުރުމާ މެދު ގޮތެއް ނިންމުމަށް އެ ކޮމިޓީއަށް ހުށައެޅުމާއި ގުޅިގެންނެވެ. 

ފަޒީންގެ މައްޗަށް ކޮށްފައިވާ ތުހުމަތަކީ، ބްރޯޑްކޮމްގެ އަންހެން މުވައްޒަފަކަށް ޖިންސީ ފުރައްސާރަކުރުމުގެ ތުހުމަތެވެ. މި މައްސަލަ މަޖިލީހަށް ހުށައަޅާފައިވަނީ މިއަހަރުގެ ޖެނުއަރީ މަހުގެ ތެރޭގައެވެ. މި މައްސަލައާ ގުޅިގެން ފަޒީން އެއްވެސް ވާހަކައެއް ދައްކަވަން ބޭނުމެއް ނުވާކަމަށް މީގެ ކުރިން ވަނީ ބުނެފައެވެ. ފަޒީން ހަމައެކަނި ވިދާޅުވީ އޭނާއާ ގުޅޭ މައްސަލައެއް މަޖިލީހުގެ ކޮމިޓީ އިން  ބަލަމުންދާ ކަމަށެވެ. އަދި މި މައްސަލަ ވަނީ ފުލުހުންނަށްވެސް ހުށަހަޅާފައެވެ.

މިނިވަން މުއައްސަސާތަކާ ބެހޭ ކޮމެޓީން ވަނީ މީގެ ކުރިން މުހައްމަދު ފަޒީން އާއި ޖިންސީ ފުރައްސާރައިގެ ޝިކާރައަކަށްވި މުވައްޒަފާއި ދެ މީހުން އެ ކޮމެޓީއަށް ހާޒިރުކޮށް، ސުވާލުކޮށްފައެވެ. މި ބައްދަލުވުމުގައި، ފަޒީން އިތުުރު ފުރުސަތަކަށް އެދުމުން އޭނާއާ ބައްދަލުކުރުމަށް މިއަދު އޮތީ ކޮމިޓީން ތާވަލުކޮށްފައެވެ. އެހެންކަމުން، މިއަދު ބޭއްވި ކޮމެޓީގެ ބައްދަލުވުމުގައި ފަޒީންގެ ވަކީލުގެ އަންހެނުން ބަލިކަމަށް ކޮމިޓީއަށް މެއިލްއަކުން އަންގައިފައިވާ ކަމަށާއި، އެކަން ފަޒީން ވެސް ސިޓީއަކުން ކޮމިޓީއަށް އެންގިކަން ކޮމިޓީގައި ވަނީ ފާހަގަކޮށްފައެވެ. އަދި 5 ދުވަސް ފަހުން ބައްދަލުވުން ބާއްވައިދިނުމަށް ފަޒީން އެދުނު ކަމަށް ކޮމެޓީ އިން ބުނެއެވެ.

މި މައްސަލައާއި ގުޅިގެން މިނިވަން މުއައްސަސާތަކާ ބެހޭ ކޮމެޓީން މަޖިލީހަށް ފޮނުވި ސިޓީ ތަޅުމަށް އިއްވަމުން އަމީންއާންމު ފާތިމަތު ނިއުޝާ ވިދާޅުވީ، ކޮމިޓީއަށް ފާހަގަކުރެވުނު ކަންކަމުގެ ތެރޭގައި އެކި ފަހަރު މަތިން ނުރުހުމުގައި ގައިގައި އަތްލާފައިވާ ކަމަށް އަންހެން މުވައްޒަފު ބުނެފައިވާ ކަމަށެވެ. އަދި ބްރޯޑްކޮމްގެ އިތުރު އެހެން އަންހެން މުވައްޒަފަކަށް ވެސް ބޭއަދަބީ ބަހުން ވާހަކަ ދައްކާފައިވާ ކަމަށް ކޮމިޓީއަށް އެ މުވައްޒަފު މަޢުލޫމާތު ދީފައިވާ ކަމަށްވެސް ވިދާޅުވިއެވެ. އެ މުވައްޒަފުންގެ މައުލޫމާތުތަކަށް ބެލުމަށްފަހު، ކޮމިޓީ އިން ނިންމާފައި ވަނީ ފަޒީން، ރަސްމީ މަސައްކަތުގެ ބޭރުން މުވައްޒަފަށް ގުޅައިގެން، ބޭއަދަބީ ބަހުން ވާހަކަ ދައްކާފައިވާކަން ކޮމިޓީއަށް ޤަބޫލުކުރެވޭކަމަށް ކަމަށް ފާތިމަތު ނިއުޝާ ވިދާޅުވިއެވެ.

މުހައްމަދު ފަޒީން މޯލްޑިވްސް ބްރޯޑްކާސްޓިން ކޮމިޝަންގެ މެންބަރުކަމަށް އައްޔަންކުރީ 7 މާރިޗު 2021 ގައެވެ. އަދި ކޮމިޝަންގެ ނައިބު ރައީސްގެ މަޤާމަށް އައްޔަންކޮށްފައިވަނީ 2023 ވަަނަ އަހަރުގެ ޖެނުއަރީ މަހުގެ 19 ވަނަ ދުވަހުއެވެ.