ﷲގެ ހިޔާވަހިކަން ނޫން އެހެން ހިޔާވަހިކަމެއްނުވާ ދުވަހު ހިޔާވަހިކަން ލިބިގެންދާ 7 މީހުން

ﷲގެ ހިޔަވަހިކަން ނޫން އެހެން ހިޔާވަހިކަމެއް ނުވާ ދުވަހު އެއިލާހުގެ ހިޔާވަހިކަން ލިބިގެންދާ 7 ބާވަތެއްގެ ބަޔަކު ވެއެވެ. 

އިމާމް ބުޚާރީ ރަޟިޔަﷲ ޢަންހުގެ އަރިހުން ވާރިދުވެފައިވާ ޙަދީޘް ފުޅެއްގައި ވެއެވެ. ރަސޫލާ ޞައްލަﷲ ޢަލައިހި ވަސައްލަމް ޙަދީޘް ކުރެއްވިއެވެ. ޤިޔާމަތް ދުވަހު ﷲ ސުބްޙާނަހޫ ވަތަޢާލާ އެއިލާހުގެ ހިޔާވަހިކަމުގައި 7 ބާވަތެެއްގެ ބައެއް ލައްވަވައެވެ. އެއީ ޢަދުލުވެރި އިމާމު، ﷲ ތަޢާލާއަށް އަޅުކަންކުރުމުގައި ދެމިހުރި ޒުވާނާ، ކޮންމެ ޙާލަތެއްގައިވެސް ﷲއަށް ބިރުވެތިވާ މީހާ، އެމީހެއްގެ ހިތުގައި މިސްކިތައް ލޯބިޖެހިފައިވާ މީހާ، ﷲއަށް ޓަކައި އެކަކު އަނެކަކު ދެކެ ލޯބިވީ ދެމީހުން، އަދި ރީތި ކަމާއި ނަޞަބުގެ ގޮތުން އަރައިހުރި އަންހެނަކު ނުބައި ކަމަކަށް ދައުވަތު ދޭ ހިނދު ތިމަން ﷲއަށް ބިރުވެތިވަމޭ ބުނެ އެކަމަށް ނޫނެކޭ ބުނާ ފިރިހެނާ، އޭނާގެ ކަނާތުން ދޭ ޞަދަޤާތް އޭނާގެ ވާތައްވެސް ނޭނގޭހާވެސް ސިއްރުން ދޭ މީހާއެވެ.

މިޙަދީޘް ބަސްފުޅުގެ ފުރަތަމަ ބައިގައިވާ ޢަދުލުވެރި އިމާމޭ ބުނެވޭ ބަހުގެ މާނައަކީ މުސްލިމުންގެ ތެރޭގައި ޢަދުލުވެރިކަމާއި އެކު ކަންކުރާ މުސްލިމުންގެ ވެރިޔާއެވެ. އެހެނީ ކޮރަޕްޝަނާއި ފަސާދައިން ދުރުވެ ހަމަހަމަ ކަމާއި ޢަދުލުވެރިކަމުގެ ތަރާދުން ރައްޔިތުންގެ ކަންކަން ނިންމައި ކިރާ ޢަދުލުވެރި ވެރިޔާއެވެ.

ދެވަނަ އަށް ބުނެފައިވާ އަޅުކަން ކުރުމުގައި ދެމި ހުންނަ ޒުވާނާއަކީ ޅަދުވަހުން ފެށިގެން ﷲތަޢާލާއަށް އަޅުކަން ކުރުމުގައި ދެގޮތެއް ނުވެ ދެމިހުންނަ ޒުވާނާއެވެ. އަދި އެއީ ﷲއަށް ޓަކައި ދުނިޔޭގެ ލައްޒަތާއި ފޮނި މީރުކަން ދޫކޮށްލާ ޒުވާނާއެެވެ.

ތިންވަނަ މީހާއަކީ ސިއްރިއްޔާތުގައިވެސް ނުބައި ކަމަކަށް އަރައިގަތުމަށް ބިރުވެތިވާ މީހާއެވެ. އެމީހާއީ ކޮންމެ ޙާލަތެއްގައިވެސް ފާފަތަކަށް އަރައިގަތުމަށް ބިރުވެތިވާނެއެވެ.

ހަތަރުވަނައީ އޭނާގެ ހިތް މިސްކިތާއި ގުޅިފައިވާ މީހާއެވެ. އެހެނީ ނަމާދުވަގުތު ތަކުގެ ކުރިން މިސްކިތައް އަރައި ޖަމާޢަތުގައި ނަމާދުކޮށް އެމީހެއްގެ ޙަޔާތް މިސްކިތާއި ގުޅިފައިވާ މީހާއެވެ.

ފަސްވަނައީ ﷲއަށް ޓަކައި އެކަކު އަނެކަކު ލޯބިވީ ދެމީހުންނެވެ. ﷲ އަށްޓަކައި ވެވޭ ލޯބި، ޤިޔާމަތް ދުވަހު އެކަލާނގެ ހިޔާގައި ތިބުމުގެ ސަބަބަކަށް ވާނެއެވެ. އެއީ އެކަކު އަނެކަކުގެ ކިބައިން މަންފާއެއް ހޯދުމުގެ މައްޗަށް ބިނާވެފައިވާ ލޯތްބެއް ނޫނެވެ. އަދި އެކަކު އަނެކަކުގެ ކިބައިން ބޭނުންވާ އެއްޗެއް ލިބުމުން އޭނާ ދޫކޮށްލާ ފަދަ ލޯއްބެއްވެސް ނޫނެވެ. އެމީހުން އެކަކު އަނެކަކު ދެކެ ލޯބިވަނީ އެމީހުންގެ ﷲ އާއި އޮންނަ ގުޅުމާއި އެކަލާނގެއަށް ކިޔަމަންތެރިވުމުގެ ސަބަބުންނެވެ.

 އެހެންކަމުން އެމީހުން އެއްވެއްޖެނަމަ އެއީ ކިޔަމަންތެރިކަމެވެ. އަދި ވަކިވެއްޖެނަމަވެސް އެއީ ކިޔަމަންތެރިކަމެވެ. އެހެންކަމުން ﷲ ސުބުޙާނަހޫ ވަތަޢާލާ އެމީހުންގެ ހިތްތައް އެއްކޮށްދެއްވައެވެ. އަދި އެކަލާނގެއަށް ކިޔަމަންތެރިވުމުގެ ލޯބި އެމީހުންނަށް ވާރުތަކޮށްދެއްވައެވެ. އަދި އެކަލާނގެ ޙަޟްރަތުގައިވާ ތަކެތި އެދި ހޯދުމުގެ ލޯބިވެސް ވާރުތަކޮށްދެއްވައެވެ.

ޙަދީޘްގައި ބަޔާންކުރެވިފައިވާ ބައިތަކުގެ ތެރެއިން ހަވަނަ ބަޔަކީ ޒިނޭއިން ދުރުހެލިވާ ފިރިހެނުންގެ ބައެވެ. މި ޙަދީޘްގައި ވަރަށް މުހިންމު މަންޒަރެއް ހުށަހަޅައިދެއެވެ. އެއީ ނަސަބާއި، މުއްސަނދިކަމާއި، ރީތިކަން ލިބިފައިވާ އަންހެނަކީ ގިނަ ފަހަރަށް ހުރިހާ ފިރިހެނުން ވެސް ކައިވެނިކުރަން އެދޭ ފަދަ މީހެކެވެ. ނަމަވެސް، މުސްލިމަކު މިފަދަ މީހަކާ އެކު ޒިނޭކުރުމަށް އިންކާރުކުރެއެވެ. އެއީ އޭނާގެ ހިތުގައި ﷲ ސުބުޙާނަހޫ ވަތަޢާލާއަށް އޮންނަ ބިރުވެތިކަން، ޙަރާމް ގުޅުންތަކަށް އޮންނަ ލޯތްބަށްވުރެ ބޮޑުވާތީއެވެ. އެހެންކަމުން، އޭނާގެ ކެތްތެރިކަމާއި ނަފްސާ ކުރާ ޖިހާދުގެ ސަބަބުން، ޤިޔާމަތް ދުވަހު ﷲ ސުބުޙާނަހޫ ވަތަޢާލާ އެކަލާނގެ ހިޔަލުގައި ހިޔާވައިދެއްވާނެ މީހުންގެ ތެރޭގައި ހިމެނުމުގެ ޙައްޤުވެރިއަކަށް އޭނާ ވެގެންދެއެވެ.

ޙަދީޘްގައި ބަޔާންކުރެވިފައިވާ ހަތް ބާވަތުގެ ތެރެއިން ހަތްވަނަ މީހާއީ މާތްﷲގެ މަގުގައި ހޭދަކުރާ މީހާއެވެ. މި ޙަދީޘްގައި ބަޔާންކުރެވިފައިވާ (މީހާ) މި ލަފްޒުން ޚާއްޞަކޮށް ފިރިހެނުންނަކަށް އިޝާރާތެއް ނުކުރެއެވެ. އެހެނެއްކަމަކު، އެއީ ފިރިހެނުންނާއި އަންހެނުންނަށް ޢާންމުކޮށް އިޝާރާތްކުރާ ލަފްޒެކެވެ. ޞަދަޤާތް ސިއްރުން ދިނުމުގެ މުހިންމުކަން ބަޔާންކޮށްފައިވަނީ އިޚްލާޞްތެރިކަން ބާރުއަޅައި، ރިޔާއާއި ނަމާއި ޝުހުރަތު އެދުމާއި މީސްތަކުންގެ ކުރިމަތީގައި ރަނގަޅު ސިފައެއްގައި ފެނުމަށް އެދުން ދޫކޮށްލުމަށްޓަކައެވެ. ސަބަބަކީ ރިޔާއަކީ މުސްލިމެއްގެ ހިތަށް ޖެހިދާނެ އެންމެ ނުރައްކާތެރި ބަލިތަކުގެ ތެރެއިން އެއް ބައްޔެވެ. އެހެނީ އިންސާނާ ލޯބިކުރަނީ އޭނާގެ ހެޔޮ ޢަމަލުތަކަށް ތަޢުރީފު ލިބުމަށެވެ. 

އަދި އޭނާގެ ނަފްސާ ކުރާ ޖިހާދު އޭނާ ހަދައިދެނީ މި ޙަދީޘްގައި ބަޔާންކުރެވިފައިވާ މީހުންގެ ތެރެއިން މީހަކަށެވެ. އަދި އެއީ އީމާންކަމުގެ ބާރުގަދަކަމާއި މާތްﷲއަށް އިޚްލާޞްތެރިވުމުގެ ނިޝާނެކެވެ.