ނަރަކަ ވަށާލާފައިވަނީ ހިތް އެދޭ ކަންތައްތަކުން

ނަރަކަ ވަށާލާފައިވަނީ ހިތް އެދޭ ކަންތައްތަކުން ކަމަށާއި އަދި ސުވަރުގެ ވަށާލާފައިވަނީ ހިތް ނޭދޭ ކަންތައްތަކުންކަމަށް ކީރިތި ރަސޫލާ  صـلّى الله علـيـه وسـلّمގެ ހަދީޘް ބަސްފުޅެއްގެ މާނައިގައި ވެއެވެ. 

މި ހަދީޘްފުޅުގެ މާނައަށް އަލިއަޅުވާލައްވަމުން ފަރުދުން މީޑިއާގެ "ބަރަކާތް" ޕްރޮގްރާމުގައި އައްޝައިޚާ އަރޫޝާ މާހިރު ވިދާޅުވީ، އިންސާނާގެ ޠަބީޢަތުގައި ހުންނަ ގޮތުން، އިންސާނާ ބޮޑަށް ބޭނުންވާނީ ދުނިޔަވީ ކަންތައްތަކުގައި މަސްއޫލު ވާށެވެ. އެގޮތުން، ދީނުގައި ކުދި ފާފަ އާއި ބޮޑެތި ފާފަތަކުގެ ތެރޭގައި ހިމެނޭ ޢަމަލުތައް ހިމެނޭހެން، އިންސާނާގެ ނަފްސު ބޭނުންވާނީ ނަރަކަ އާއި ކައިރިއަށް ތިމާގެ ނަފްސު ގެންދާ ކަންކަން ހާސިލް ކުރުމަށް، ނުވަތަ އެފަދަ ކަންކަމުގައި މަސްއޫލުވާށެވެ.

އަނެއްކޮޅުން، ސުވަރުގެއާ އިންސާނާ ކައިރިވާނީ، ކެތްތެރިކަމާއެކު، ﷲ އެންގެވި މަގުގައި ސާބިތުވެ ހުރުމުންކަމަށާއި، ދީނީ ވާޖިބުތައް އަދާކުރުމުގައި ފަރުވާ ކުޑަކުރުމެއް ނެތި ދެމިހުރުމުންކަމަށް ވީނަމަވެސް، މިއީ ގިނަ ބަޔަކަށް ފަސޭހަ ކަމަކަށް ނުވުމަކީ، ރަސޫލާގެ އެ ޙަދީޘް ބަސްފުޅުން ބުނެދޭ ބުނެދިނުންކަމަށް އައްޝައިޙާ އަރޫޝާ ވިދާޅުވިއެވެ.

އެހެންކަމުން ސުވަރުގެ ހާސިލްކުރުމަށް މަސައްކަތް ކުރާއިރު، ﷲގެ ރުއްސެވުމާއި ފުއްސެވުން ލިބޭ މަގުގައި ސާބިތުވެ ހުރެ ދުނިޔޭގެ ދުވަސްތައް ވޭތުކުރުމަށް އަހަރެމެން ސަމާލުކަން ދޭންޖެހެއެވެ.