އިންޑިއާގައި އިންސާނީ ވަގުފާރީގެ ބޮޑު ނެޓްވޯކެއް: 8 މީހުން ހައްޔަރުކޮށް 200 އަށްވުރެ ގިނަ ކުދިން ސަލާމަތްކޮށްފި!

އިންޑިއާގެ ބިހާރު ސްޓޭޓުގައި ފުލުހުން ކުރިއަށް ގެންދިޔަ ޚާއްޞަ އޮޕަރޭޝަނެއްގައި، އެ ސްޓޭޓުގެ ސިތާމަރީ ޖިލާގައި ހިންގަމުންދިޔަ ބޮޑު އިންސާނީ ވަގުފާރީގެ ނެޓްވޯކެއް ހޯދައި، 200 އަށްވުރެ ގިނަ ކުޑަކުދިން ސަލާމަތްކޮށްފިއެވެ. މި އޮޕަރޭޝަނުގައި 8 މީހުން ވަނީ ހައްޔަރުކޮށްފައެވެ.

މި އޮޕަރޭޝަން ފަށާފައިވަނީ ބިހާރު ސްޓޭޓުގެ ފުލުހުންނަށް ލިބުނު ސިއްރު މަޢުލޫމާތަކާ ގުޅިގެންނެވެ. އެގޮތުން، ފުލުހުންނަށް ލިބުނު މަޢުލޫމާތުގައި ބުނާގޮތުން، ސިތާމަރީ ޖިލާގެ ބާޒާރު ސަރަޙައްދުގައި ހުރި އިމާރާތެއްގައި ގިނަ ޢަދަދެއްގެ ކުޑަކުދިން ބަންދުކޮށްފައި ތިއްބެވެ. މި މަޢުލޫމާތުގެ އަލީގައި ފުލުހުން ވަނީ އެ ސަރަޙައްދަށް ގޮސް އިމާރާތް ބަލައި ފާސްކޮށްފައެވެ.

މި އިމާރާތް ބަލާ ފާސްކުރުމުން ފުލުހުންނަށް ފެނުނީ، ގިނަ އަދަދެއްގެ ކުޑަކުދިންތަކެއް އެ އިމާރާތުގެ ތެރޭގައި ވަރަށް ކުޑަ ޖާގައެއްގައި ތޮއްޖެހިފައި ތިބި މަންޒަރެވެ. މީގެ ތެރެއިން، ގިނަ ކުދިން ތިބީ ބަނޑުހައިހޫނުކަމާއި ބަލި ޙާލުގައިކަމަށް ފުލުހުން މަޢުލުމާތުދެއެވެ. އަދި ބައެއް ކުދިންގެ ހަށިގަނޑުން އަނިޔާކޮށްފައި ހުރި ނިޝާންތައް ފެންނަށް ހުރި ކަމަށާއި، މި އިމާރާތުގައި އެއްވެސް އަސާސީ ޚިދުމަތެއް ނެތްކަމަށް ފުލުހުން ބުނެއެވެ. މީގެ އިތުރުން ފުލުހުން ބުނެފައިވަނީ، މި ކުދިންތައް ކޮޓަރިތަކުގައި ބަންދުކޮށްފައި ތިބީ ވަރަށް ނިކަމެތި ޙާލުގައި ކަމަށެވެ. އަދި ބަންދުކޮށްފައި ތިބި ގިނަ ކުދިން ނިސްބަތްވަނީ، ނޭޕާލް އަދި ބަންގްލަދޭޝް އަށް ކަމަށް ފުލުހުން މަޢުލޫމާތުދެއެވެ.

މި އޮޕަރޭޝަންގައި ބިހާރުގެ ފުލުހުން ސަލާމަތްކުރި ކުދިންގެ ތެރޭގައި، 5 އަހަރާއި 17 އަހަރާއި ދެމެދުގެ އުމުރުފުރައިގެ ކުދިން ހިމެނެއެވެ. މީގެ ތެރޭގައި، ބަންގްލަދޭޝް އާއި ނޭޕާލް އަށް ނިސްބަތްވާ ކުދިންގެ އިތުުރުން، ބިހާރު ސްޓޭޓު އަދި އުއްތަރު ޕްރަދޭޝްގެ ކުދިންވެސް ހިމެނޭކަމަށް ފުލުހުން ބުނެއެވެ. ފުލުހުން މަޢުލޫމާތުދޭ ގޮތުގައި، މި ކުދިންނަކީ އެކި ގޮތްގޮތުން އޮޅުވާލައިގެން އެ ޢިމާރާތް ތެރެއަށް ގެނެވިފައިވާ ކުދިންނެވެ.

ބިހާރު ސްޓޭޓުގެ ފުލުހުންގެ އިސް އޮފިސަރު ޖިތެންދްރަ ކުމާރު ބުނި ގޮތުގައި، މި ކުޑަކުދިންތައް ގެންގުޅެމުން އައީ މަސައްކަތު ކުދިންގެ ގޮތުގައެވެ. އަދި ކުޑަކުދިންލައްވާ މަސައްކަތްކުރަން ނުވާމިންވަރަށް މި ކުދިން ލައްވާ މަސައްކަތް ކުރުވާފައިވާކަން ފާހަގަކުރަމުން ޖިތެންދްރަ ކުމާރު ބުންޏެވެ. އަދި އެ ކުދިންނަށް މަސައްކަތުގެ އެއްވެސް އުޖޫރައެއް ވެސް ދީފައި ނުވާ ކަމަށް ބުނެފައި ވެއެވެ. މީގެ އިތުރުން، އޭނާ ބުނި ގޮތުގައި އެ އިމާރާތުގެ ތެރޭގައި ބައެއް ކުދިންނަށް ވަނީ ޖިންސީ ގޯނާ ކޮށްފައެވެ. އަދި މިކަމުގެ ހެކި ފުލުހުންގެ އަތުގައި އެބަ ހުރިކަމަށް އޭނާ ވަނީ ބުނެފައެވެ.

މި މައްސަލައާއި ގުޅިގެން 8 މީހުން ހައްޔަރުކޮށް ފުލުހުންގެ ބެލުމުގެ ދަށަށް ގެންގޮސްފާވާއިރު، މި އެންމެނަކީ ވެސް އިންސާނީ ވަގުފާރިކުރާ ނެޓްވޯކެއްގެ އިސް މެންބަރުންކަމަށް ފުލުހުން ބުނެއެވެ. އަދި މި ނެޓްވޯކުން ކުޑަކުދިން ގަތުމަށްފަހު، އެ ކުދިން އެކި ސަރަޙައްދުތަކަށް ފޮނުވާ، އެކި ބާވަތުގެ މަސައްކަތްތައް އެކުދިން މެދުވެރިކޮށް ކުރުއްވައެވެ. ބިހާރުގެ ފުލުހުން ބުނި ގޮތުގައި، މި އޮޕަރޭޝަންގައި ހައްޔަރުކުރި މުޙައްމަދު ޝަފީޤް އަދި ސަންޖޭ ކުމާރު އަކީ މި ނެޓްވޯކުގެ އެންމެ އިސް ދެ މީހުންނެވެ. އަދި މި ދެ މީހުންނާއި، ބާކީ ތިބި 6 މީހުންނާއި ދެކޮޅަށް އިތުރު ހެކި ހޯދުމުގެ މަސައްކަތް ކުރިއަށްދާކަމަށް ފުލުހުން މަޢުލޫމާތުދެއެވެ.

ބިހާރު ސްޓޭޓުގެ ފުލުހުން ބުނި ގޮތުގައި، މި އޮޕަރޭޝަނަކީ އިންސާނީ ވަގުފާރި ހުއްޓުވުމަށް ކުރެވޭ އެކި މަސައްކަތްތަކަށް ލިބިގެންދިޔަ ބޮޑު ކުރިއެރުމެކެވެ. އަދި މިފަދަ ޢަމަލުތައް ހުއްޓުވުމަށް މުސްތަޤްބަލުގައި ވެސް  އިތުރު ތަޙުޤީޤުތައް ކުރިއަށްދާނެކަމަށް ފުލުހުން ވަނީ  ބުނެފައެވެ.