Ads by Exprox

ޚަބަރު

ސުޕްރީމް ކޯޓުގެ ފަނޑިޔާރުކަމަށް ކުރިމަތިލާން ހުޅުވާލައިފި

ސުޕްރީމް ކޯޓުގެ ފަނޑިޔާރުކަމަށް ކުރިމަތިލާން ހުޅުވާލައިފި

ސުޕްރީމް ކޯޓު/ ފޮޓޯ: ދަ ވޮއިސް

10 މާރިޗު 2025، 03:33

ސުޕްރީމް ކޯޓުގެ ފަނޑިޔާރުކަމަށް ކުރިމަތިލާން ހުޅުވާލައިފި

 

ރާއްޖޭގެ އެންމެ މަތީ ކޯޓް، ސްޕްރީމް ކޯޓުގެ ފަނޑިޔާރުކަމުގެ މަޤާމަށް ކުރިމަތިލުމުގެ ފުރުސަތު ޖުޑީޝަލް ސާވިސް ކޮމިޝަން (ޖޭއެސްސީ)ން މިއަދު ހުޅުވާލައިފިއެވެ.

މިއަދު ކުރި އިއުލާނެއްގައި ޖޭއެސްސީން ވިދާޅުވެފައި ވަނީ، ސްޕްރީމް ކޯޓުގެ ހުސްވެފައިވާ ފަނޑިޔާރުކަމުގެ މަޤާމަށް ކުރިމަތިލުމުގެ ފުރުސަތު އަންނަ ބުދަދުވަހުގެ 11:00 ނިޔަލަށް ހުޅުވާލާފައިވާކަމަށެވެ. 

ސްޕްރީމް ކޯޓަށް ފަނޑިޔާރަކު ހޯދުމަށް ޖޭއެސްސީން އިއުލާނުކޮށްފައި ވަނީ އެ ކޯޓުގެ ފަނޑިޔާރެއްގެ ގޮތުގައި ހުންނެވި ހުސްނުއް ސުއޫދު އިސްތިއުފާ ދިނުމާ ގުޅިގެންނެވެ. ސުއޫދު ފަނޑިޔާރުކަމުން އިސްތިއުފާދެއްވީ މިދިޔަ ހަފްތާގެ އަންގާރަދުވަހުއެވެ. މަޤާމުން އިސްތިއުފާ ދެއްވިއިރު ސުއޫދު ހުންނެވީ ސަސްޕެންޝަނުގައެވެ. އޭނާ އާ އެކު ފަނޑިޔާރު ޑރ. އަޒްމިރަލްދާ ޒާހިރާއި، ފަނޑިޔާރު މަހާޒް އަލީ ޒާހިރުވެސް ސަސްޕެންޑްކުރިއެވެ. ޖޭއެސްސީން އެ ތިން ފަނޑިޔާރުންގެ މައްސަލަ ބަލަން ފަށާފައިވާއިރު، އެސީސީން ގެންދަނީ އެބޭފުޅުންގެ ޖިނާއީ ތަހުގީގެއް ކުރައްވަމުންނެވެ.

ރައްޔިތުންގެ މަޖިލީހުގެ މެންބަރުން ޕާޓީން ވަކިވެއްޖެ ނަމަ ނުވަތަ ވަކިކޮށްފި ނަމަ ގޮނޑި ގެއްލޭ ގޮތަށް ގެނައި އިސްލާހު ބާތިލް ކޮށްދިނުމަށް އެދި ސުޕްރީމް ކޯޓަށް ހުށަހަޅާފައިވާ މައްސަލަ ބެލުމުގެ އިހުތިސާސް އެ ކޯޓަށް ލިބިގެންވާ ކަމަށް ނިންމުމާ އެކު، ސަރުކާރުން ގާނޫނުއަސާސީއާ ހިލާފަށް ސުޕްރީމް ކޯޓަށް ނުފޫޒު ފޯރުވަމުންދާކަމަށް ފަނޑިޔާރުކަމުން ސުއޫދު އިސްތިއުފާދެއްވިއިރު، އިސްތިއުފާގެ ސިޓީގައި ވިދާޅުވެފައިވާކަން ފާހަގަކޮށްލެވެއެވެ. 

ސްޕްރީމް ކޯޓުގެ ހުސްވެފައިވާ ފަނޑިޔާރުކަމުގެ މަޤާމަށް ކުރިމަތިލުމުގެ ފުރުސަތު އަންނަ ބުދަދުވަހުގެ 11:00 ނިޔަލަށް ވަނީ ހުޅުވާލެވިފައެވެ. އެ މަޤާމަށް ކުރިމަތިލުމުގެ ޝަރުތުތަކުގެ ތެރޭގައި އުމުރުން 30 އަހަރުވުމާއި، އިސްލާމީ ޝަރީއާ ނުވަތަ ގާނޫނު ނުވަތަ ގާނޫނާއި އިސްލާމީ ޝަރީއާގެ ރޮނގުން ފުރަތަމަ ޑިގްރީއެއް އޮތުން ހިމެނެއެވެ. މީގެ އިތުރުން ފަނޑިޔާރުކަން ނުވަތަ ގާނޫނީ ވަކީލުކަން ނުވަތަ މި ދެކަމުގައި މަދުވެގެން 7 އަހަރު ދުވަހުގެ ތަޖްރިބާ ހުރުން ވެސް ފުރިހަމަވާންޖެހޭ ޝަރުތުތަކުގެ ތެރޭގައި ހިމެނެއެވެ.

މި ލިޔުން ކިޔާލުމުން

Ads by MSS