"މަގޭ ސާފުރާއްޖެ ޕްރޮގްރާމް" ގެ ތެރެއިން 32 ރަށެއްގައި ކުނި މެނޭޖްކުރުމުގެ އެއްބަސްވުމުގައި ސޮއިކޮށްފި

"މަގޭ ސާފުރާއްޖެ ޕްރޮގްރާމް" ގެ ތެރެއިން ރާއްޖޭގެ 32 ރަށެއްގައި ކުންޏާއި ކުނި މެނޭޖްކުރާ ވަޞީލަތްތައް މެނޭޖް ކުރުމުގެ އެއްބަސްވުމުގައި މިއަދު ސޮއިކޮށްފިއެވެ.

މިއެއްބަސްވުމުގައި ސޮއި ކޮށްފައިވަނީ ފަތުރުވެރިކަމާ ތިމާއްވެއްޓާ ބެހޭ ވުޒާރާއާއި ވޭސްޓް މެނޭޖްމަންޓް ކޯޕަރޭޝަން(ވެމްކޯ) އާއި ދެމެދުއެވެ.

މިކަމާގުޅޭގޮތުން ތިމާވެއްޓާއި ބެހޭ ވުޒާރާއިން ބުނެފައިވަނީ މިއަހަރުގެ ރިޔާސީ ބަޔާނުގައި ރައީސުލްޖުމްހޫރިއްޔާ ޑރ މުޙައްމަދު މުޢިއްޒު މިއަހަރުގެ ރިޔާސީ ބަޔާނުގައި މި ހިނގާ 2025 ވަނަ އަހަރު ނިންމުމުގެ ކުރިން ރާއްޖޭގެ ހުރިހަ ރަށެއްގައި އެރަށަކަށް އެކަށޭނެ ކުނި މެނޭޖްކުރާނޭ ނިޒާމާއި ވަޞީލަތް ޤާއިމްކޮށްދެއްވާނެ ކަމަށް އިޢުލާނުކުރައްވައިފައި ކަމަށެވެ.

އެގޮތުން އެއަމާޒަށް ވާޞީލް ވުމަށްޓަކައި އެވުޒާރާގެ ދަށުން ހިންގާ “މަގޭ ސާފު ޕްރޮގްރާމް”ގެ ދަށުން މިއަދު ވެމްކޯއާއި އެކު ސޮއިކުރީ ރާއްޖޭގެ 32 ރަށެއްގައި ކުންޏާއި ވަޞީލަތްތައް މެނޭޖްކުރާ މަރުކަޒުތައް ޤާއިމްކުރުުމުގެ ކޮންޓްެރެކްޓްތައް އެކުންފުންޏާއި ހަވާލުކުރުމަށް ކަމަށް އެވުޒާރާއިން ބުނެއެވެ. 

 އެވުޒާރާއިން އިތުރަށް ބުނީ މިއަހަރުގެ ފެބްރުވަރީ މަހުގެ ތެރޭގައިވެސް 2 ރަށެއްގައި ކުންޏާއި ވަޞީލަތްތައް މެނޭޖްކުރާ މަރުކަޒުތައް ޤާއިމްކުރުމުގެ މަސައްކަތް ވެމްކޯއާއި ހަވާލުކުރެވިފައިވާކަމަށެވެ.

އަދި މިއަދު ހަވާލުކުރެވުނު 32 ރަށާއި އެކު 34 ރަށެއްގައި ވޭސްޓް މެނޭޖްމަންޓް އިންފްރާސްޓްރަކްޗަރ ޤާއިމްކުރުމުގެ މަސައްކަތް ވެމްކޯއިން ކުރިއަށް ގެންދާނެކަމަށެވެ. މިމަސައްކަތްތައް މިއަހަރުގެ ތިންވަނަ ކުއާޓަރުގެ ތެރޭގައި ނިންމުމަށް ހަމަޖެހިފައިވާކަމަށްވެސް އެވުޒާރާއިން ބުނެއެވެ. 

ހަމަމިއާއި އެކު އެވުޒާރާއިން ބުނެފައިވަނީ އެވުޒާރާއިން ހަދާފައިވާ އެސެސްމަންޓްތަކުން ދައްކާގޮތުގައި ރައީސް ޑރ މުޢިއްޒު އިޢުލާނު ކުރައްވައިފައިވާ އަމާޒަށް ވާސިލްވުމަށްޓަކައި، 128 ރަށެއްގައި ކުނި މެނޭޖްކުރުމަށް ބޭނުންވާ އިންފްރާސްޓްރަކްޗަރ ޤާއިމްކުރުމަށް ނުވަތަ އަޕްގްރޭޑް ކުރަންޖެހޭކަމަށެވެ. 

އަދި ވަރަށް ކައިރި މުސްތަޤްބަލެއްގައި ބާކީ ހުރި ރަށްތަކުގެ މަސައްކަތްވެސް ސަރުކާރު ހިއްސާވާ އެހެން ކުންފުނިތަކާއި ހަވާލުކުރުމުގެ މަސައްކަތް އެވުޒާރާއިން ދަނީ ކުރަމުންކަމަށެވެ.

މީގެއިތުރުން ރައްކާތެރި އަދި ދެމެހެއްޓެނިވި ގޮތެއްގައި ކުނި މެނޭޖްކުރުމުގެ ނިޒާމްތައް މުޅިރާއްޖޭގައި ޤާއިމްކުރުމަކީ ރައީސް ޑރ މުޢިއްޒު ވަރަށް ބޮޑަށް އިސްކަންދެއްވައިގެން ވަރަށް ގާތުން ބައްލަވަމުން ގެންދާ މަސައްކަތެއް ކަމަށްވެސް ތިމާވެއްޓާއި ބެހޭ ވުޒާރާއިން ބުނެއެވެ.