ރެޖިސްޓަރ އޮފް ކޮމްޕެނީސްގެ މަޤާމަށް ޝަމްޢާ އައްޔަނުކޮށްފި

ރެޖިސްޓަރ އޮފް ކޮމްޕެނީސްގެ މަޤާމަށް މަރިޔަމް ޝަމްޢާ އައްޔަނުކުރައްވައިފިއެވެ. 

ޝަމްޢާ އެމަޤާމަށް އައްޔަނު ކުރި ކަން އިޢުލާނު ކުރައްވައި އިޤްތިޞާދާއި ބެހޭ ވަޒީރު މުޙައްމަދު ސަޢީދު ވަނީ އޭނާއަށް މަރުޙަބާ ދަންނަވައިފައެވެ. 

މިހާތަނަށް ޝަމްޢާ ހުންނެވީ އިޤްތިޞާދާއި ބެހޭ ވުޒާރާގެ ލީގަލް ކޮންސަލްޓަންޓްގެ މަޤާމުގަ އެވެ. ޝަމްޢާ މަތީ ތަޢުލީމް ހާސިލްކުރައްވައިފައިވަނީ އިނގިރޭސިވިލާތުން ނެވެ. އިޤްތިޞާދާއި ބެހެ ވުޒާރާގެ އިތުރުން ސަރުކާރުގެ ބައެއް އެހެން އިދާރާތަކުގައިވެސް ޝަމްޢާ މަސައްކަތް ކުރައްވައިފައިވެއެވެ. 

ރެޖިސްޓްރާ އޮފް ކޮމްޕެނީސްގެ މަޤާމަށް ޝަމްޢާ އައްޔަނުކުރެއްވީ ކުރިން އެމަޤާމުގައި ހުންނެވި މަރިޔަމް ވިސާމް އެ މަޤާމުން އިސްތިއުފާ ދެއްވުމުންނެވެ. އޭނާ އިސްތިއުފާ ދެއްވެވީ މި މަހުގެ ފުރަތަމަ ދުވަހު އެވެ. ވިސާމް ވަނީ ރެޖިސްޓްރާ އޮފް ކޮމްޕެނީސްގެ މަޤާމުގައި 11 އަހަރު ޚިދުމަތް ކުރައްވާފަ އެވެ.