ދުނިޔެ
ޢައްޒާއަށް އެއްވެސް އިންސާނީ އެހީއެއް ނުވައްދާތާ 9 ދުވަސް: އދ
ޢައްޒާއަށް އެހީހިފައިގެން ދާ ބައެއް ޓްރަކް ފޮޓޯ:އިންޓަނެޓް
ޢައްޒާއަށް އެއްވެސް އިންސާނީ އެހީއެއް ނުވައްދާތާ 9 ދުވަސް ވެއްޖެ ކަމަށް އދ ގެ ޚާއްސަ ތަރުޖަމާނު ސްޓެފާން ދުޖާރިކް ވިދާޅުވެއްޖެއެވެ. އިސްރާއީލުން ޢައްޒާއަށް އަޅާފައިވާ ފިޔަވަޅުތަކުގެ ސަބަބުން އެއްވެސް އެހީއެއް ނުވައްދާ ކަމަށް އޭނާ ވިދާޅުވިއެވެ.
ދުޖާރިކް ވިދާޅުވި ގޮތުގައި އިސްރާއީލުން ޢައްޒާއަށް ތެޔޮ އަދި ބޮޑެތި މެޝިނަރީ އާއި މޯބައިލް ގެތައް ވެއްދުން ވެސް މަނާކޮށްފައިވެއެވެ. އިސްރާއީލުން ގައްޒާއަށް ވައްދަނީ ކޮން އެއްޗެއްތޯ ސުވާލު ކުރުމުން ދުޖާރިކް ވިދާޅުވީ
އެއްވެސް އެއްޗެއް ނޫން. އެއްވެސް މުދަލެއް ނުވަދެ. އެއްވެސް ޓްރަކެއް ނުވަދެ
ދުޖާރިކް
މިއާއެކު، އެމެރިކާގެ ކޮލެޖްތަކުގައި ފަލަސްތީނުގެ ޙައްޤުތަކަށް ތާއީދުކުރާ ދަރިވަރުންނާ މެދު އަޅަމުންދާ ފިޔަވަޅުތަކަކީ ޓްރަމްޕް އިދާރާގެ "ޙަޤީޤީ ފެސިސްޓް މޫނުމަތި" ދައްކުވައިދޭ ކަމެއް ކަމަށް ފަލަސްތީނު މިނިވަންކުރުމަށް މަސައްކަތްކުރާ ޕޮޕިއުލަރ ފްރަންޓުން (ޕީއެފްއެލްޕީ) ބުނެފިއެވެ. ދަރިވަރު އެކްޓިވިސްޓުން ހައްޔަރުކޮށް އަދި ޑިޕޯޓްކުރުމަށް ޓްރަމްޕް ކުރަމުންދާ މަސައްކަތަކީ "ސިސްޓަމެޓިކް އޮޕްރެޝަން ކެމްޕޭނެއް" ކަމަށް ވާއިރު، މިފަދަ އަނިޔާވެރި ޢަމަލުތަކުން މިނިވަން މީހުން ބިރުނުގަންނާނެ ކަމަށާއި، ފަލަސްތީނުގެ މައްސަލައަށް ތާއީދުކުރާ ހިތްވަރުގަދަ އަޑުތައް ހުއްޓުވޭނެ ކަމަށް ނުދެކޭ ކަމަށް ޕީއެފްއެލްޕީ އިން ބުނެފައިވެއެވެ.
