މައުމޫން ފައުންޑޭޝަންގެ އިޙްޔާ ފޯރަމްގައި މިރޭ ތަޤުރީރު ކުރައްވާނީ ވަޒީރު ޑރ. ޝަހީމް

މިއަހަރުގެ ރަމަޟާން މަހުގެ ރޭތައް އިޙްޔާ ކުރުމަށް މައުމޫން ފައުންޑޭޝަނުން ސިލްސިލާކޮށް ބާއްވަމުން އަންނަ އިޙްޔާ ފޯރްމަތްކުގެ ތެރެއިން މިރޭގެ ފޯރަމްގައި ތަޤުރީރު ކުރައްވާނީ، އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއްޖެއެވެ.

އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، މިރޭގެ ފޯރަމް ބޭއްވުމަށް ހަމަޖެހިފައިވަނީ އިސްލާމީ މަރުކަޒުގެ ޖަލްސާކުރާ މާލަމުގައި ކަމަށެވެ. އަދި މިރޭގެ އިޙްޔާ ފޯރަމް ފެށުމަށް ހަމަޖެހިފައިވަނީ 21:45 ގައި ކަމަށް އެ ވުޒާރާއިން މަޢުލޫމާތުދެއެވެ. މީގެ އިތުރުން އެ ވުޒާރާއިން ވިދާޅުވީ، މިރޭގެ ފޯރަމްގައި ވަޒީރު ތަޤުރީރު ކުރައްވުމަށް ހަމަޖެހިފައިވަނީ "އިޖްތިމާޢީ ޢަދާލަތު ޤާއިމު ކުރުމުގައި ޒަކާތުގެ ދައުރު" މި މަޢޫޟޫގެ މައްޗަށް ކަމަށެވެ.

ރަމަޟާން މަހުގެ ރޭތައް އިޙްޔާ ކުރުމުގެ ގޮތުންް އިސްލާމީ ކަންތައްތަކާ ބެހޭ ވުޒާރާއިން ވެސް އަންނަނީ ސިލްސިލާ ގޮތެއްގައި އިޙްޔާ ފޯރަމްތައް ބާއްވަމުންނެވެ. އެގޮތުން، އެ ވުޒާރާއިން ކުރިއަށްގެންދާ ފޯރަމްގެ ތެރެއިން ފުރަތަމަ އިޙްޔާ ފޯރަމްގައި ވެސް ތަޤުރީރުކުރެއްވީ އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދުއެވެ.