މީރާއަށް މިދިޔަ މަހު ލިބުނު އާމްދަނީ އޭގެ ކުރީ އަހަރުގެ އެ މުއްދަތަށް ވުރެ %5.4 އިތުރު

މޯލްޑިވްސް އިންލެންޑް ރެވެނިއު އޮތޯރިޓީ، މީރާއަށް މިދިޔަ މަހު ލިބުނު އާމްދަނީ އޭގެ ކުރީ އަހަރުގެ ފެބުރުއަރީ މަހަށް ވުރެ %5.4 އިތުރުކަމަށް، އެ އޮތޯރިޓީގެ ތަފާސް ހިސާބުތަކުން ދައްކައިފިއެވެ. އަދި މިއީ މީރާއިން އަންދާޒާ ކުރި މިންވަރަށް ވުރެ %5.1 މަތި އަދަދެއްކަމަށް ވެސް ހާމަކޮށްފައި ވެއެވެ.

އެގޮތުން މި އަހަރުގެ ފެބުރުއަރީގައި މީރާއަށް 2.47 ބިލިއަން ރުފިޔާ ލިބުނުއިރު، މިދިޔަ އަހަރުގެ އެ މުއްދަތުގައި ލިބިފައިވަނީ 2.33 ބިލިއަން ރުފިޔާއެވެ. 

ނަމަވެސް މި އަހަރުގެ ޖެނުއަރީ މަހާ އަޅާބަލާއިރު، ފެބުރުއަރީމަހު މީރާއަށް ލިބުނު އާމްދަނީ ވަނީ ދަށަށް ގޮސްފައެވެ. އެގޮތުން ޖެނުއަރީ މަހު 3.34 ބިލިއަން ރުފިޔާގެ އާމްދަނީއެއް ލިބިފައިވާއިރު، މިއީ ފެބުރުއަރީ މަހަށް ވުރެ %26 އިތުރު އަދަދެކެވެ. 

މީގެ އިތުރުން، ރާއްޖެއަށް އަންނަ ފަތުރުވެރިންގެ ބޮލަށް ނަގާ ޑޮލަރުގެ އަދަދުގެ ވެސް ޖެނުއަރީ މަހަށް ވުރެ ފެބުރުއަރީ މަހު ވަނީ ދަށަށް ގޮސްފައެވެ. އެގޮތުން 125.49 މިލިއަން ޑޮލަރު ޖެނުއަރީ މަހު ލިބުނުއިރު، މިދިޔަ މަހު ލިބުނީ 118 މިލިއަން ޑޮލަރެވެ. 

އާމްދަނީގެ ރިޕޯޓު - ފެބުރުއަރީ 2025

މި އަހަރުގެ ފެބުރުއަރީގައި މީރާއަށް އެންމެ ބޮޑު އާމްދަނީއެއް ލިބިފައިވަނީ ޖީއެސްޓީއިންނެވެ. އެގޮތުން ޖުމްލަ އާމްދަނީގެ 49.8% އަކީ ޖީއެސްޓީގެ ގޮތުގައި ލިބުނު ފައިސާއެވެ. އެއީ 1.23 ބިލިއަން ރުފިޔާއެވެ. ދެން އެންމެ ބޮޑު އާމްދަނީއެއް ލިބިފައި ވަނީ އިންކަމް ޓެކްސްގެ ގޮތުގައެވެ. އެއީ 402.61 މިލިއަން ރުފިޔާ ނުވަތަ އާމްދަނީގެ %16.3 އެވެ.

މީގެ އިތުރުން ލީސް ޕީރިއަޑް އެކްސްޓެންޝަން ފީގެ ގޮތުގައި 306.28 މިލިއަން ރުފިޔާ، ގުރީން ޓެކުހުގެ ގޮތުގައި 150.67 މިލިއަން ރުފިޔާ ލިބިފައިވެއެވެ. އަދި ޑިޕާޗަރ ޓެކުހުގެ ގޮތުގައި 103.74 މިލިއަން ރުފިޔާ އާއި އެއާޕޯޓް ޑިވެލޮޕްމަންޓް ފީގެ ގޮތުގައި 98.8 މިލިއަން ރުފިޔާ ވަނީ ލިބިފައެވެ.