މިދިޔަ އަހަރު އެންމެ ގިނައީ ގައިދީންގެ ސިއްޙީ ޙައްޤުގެ މައްސަލަތައް

މިދިޔަ އަހަރު ހިއުމަން ރައިޓްސް ކޮމިޝަން އޮފަ ދަ މޯލްޑިވްސް، އެޗްއާރުސީއެމްއިން އެންމެ ގިނައިން ތަޙުޤީޤުކޮށްފައި ވަނީ ގައިދީންގެ ސިއްޙީ ޙައްޤުގެ މައްސަލަތައްކަމަށް، އެ ކޮމިޝަނުގެ ތަފާސް ހިސާބުތަކުން ދައްކައިފިއެވެ.

އެގޮތުން ނިމުނު 2024 ވަނަ އަހަރު އެ ކޮމިޝަނުގައި 797 މައްސަލައެއް ރެޖިސްޓްރީ ކޮށްފައިވާއިރު، މީގެ ތެރެއިން 2023 ވަނަ އަހަރު ހުށަހެޅުނު 38 ޝަކުވާއެއް ހިމެނޭހެން 487 މައްސަލައެއް ވަނީ ތަޙުޤީޤު ކުރަން ނިންމާފައެވެ. އަދި މީގެ ތެރެއިން 158 މައްސަލައަކީ ގައިދީންނާއި ބަންދުގައި ބަހެއްޓުނު މީހުންގެ ސިއްޙީ ހައްޤާ ގުޅުންހުރި މައްސަލަތައްކަމަށް އެ ކޮމިޝަނުގެ ތަފާސް ހިސާބުތަކުން ދައްކައެވެ. އެއީ ތަޙުޤީޤު ކުރަން ނިންމި މައްސަލަތަކުގެ %32 އެވެ.

މިދިޔަ އަހަރު ކޮމިޝަނުގައި ރެޖިސްޓްރީކުރި މައްސަލަތަކުގެ ތެރެއިން 692 މައްސަލައަކީ އެ ކޮމިޝަނަށް ހުށަހެޅުނު މައްސަލަތައް ކަމަށާއި އަދި އިތުރު 105 މައްސަލައެއް ކޮމިޝަނުން އިސްނަގައިގެން ވެސް ރެޖިސްޓަރކޮށްފައިވާކަމަށް އެ ރިޕޯޓުގައި ހާމަކޮށްފައި ވެއެވެ.

މީގެ އިތުރުން، އެ ކޮމިޝަނުން ތަޙުޤީޤުކުރަން ނިންމި 487 މައްސަލައިގެ ތެރެއިން 380 މައްސަލައަކީ ހިއުމަން ރައިޓްސް ޤާނޫނުގެ ދަށުން، އަދި އަނެއް 107 މައްސަލައަކީ އެންޓީ ޓޯޗަރ ޤާނޫނުގެ ދަށުން ތަޙުޤީޤުކުރަން ނިންމި މައްސަލަތައްކަމަށް އޭސީސީން ހާމަކޮށްފައިވެއެވެ.

ތަޙުޤީޤުކުރަން ނިންމި މައްސަލަތަކުގެ ތެރެއިން އެންމެ ގިނައިން ހުށައެޅުނު މައްސަލަތަކުގެ ބާވަތް:

• ގައިދީން އަދި ބަންދުގައި ތިބޭ މީހުންގެ ޞިއްޙީ ޙައްޤުގެ 158 މައްސަލަ
• ޓޯޗަރއާ ގުޅުންހުރި 107 މައްސަލަ
• ގައިދީން އަދި ބަންދުގައި ތިބޭ މީހުންގެ އެހެނިހެން ޙައްޤުގެ 58 މައްސަލަ
• އިޖުތިމާޢީ އިޤްތިސާދީ އަދި ސިޔާސީ ގޮތުން ލިބިދޭ ޙައްޤުގެ 31 މައްސަލަ
•  އާއިލާއާއި ކުޑަކުދިންގެ ހައްގުތަކާ ގުޅުންހުރި 33 މައްސަލަ
  

އަދި ގައިދީންނާއި ބަންދުގައި ތިބޭ މީހުންގެ ޞިއްޙީ ޙައްޤުގެ 158 މައްސަލަތަކުގެ ތެރޭގައި ތަފާތު 188 މައްސަލައެއް ހިމެނޭކަމަށް އޭސީސީން ވަނީ ހާމަކޮށްފައެވެ. އޭގެ ތެރޭގައި އެންމެ ގިނައީ ބޭސްފަރުވާ ލިބުން ލަސްވެފައިވާކަމަށް ބުނާ މައްސަލައެވެ.

ގައިދީން އަދި ބަންދުގައި ތިބޭ މީހުންގެ ޞިއްޙީ ޙައްޤުގެ މައްސަލަތަކުގެ ތެރެއިން އެންމެ ގިނައިން ހުށަހެޅުނު މައްސަލައިގެ ބާވަތްތައް:

• ބޭސްފަރުވާ ލިބުން ލަސްވެފައިވާކަމަށް ބުނާ 59 މައްސަލަ
• ހާއްސަ ޑޮކްޓަރަށް ރިފަރކުރުމާއި ދެއްކުން ލަސްވެފައިވާކަމަށް ބުނާ 39 މައްސަލަ
• ބަލިކޮއްތު ދިނުމާ ގުޅޭ 18 މައްސަލަ
• ބޭސްފަރުވާ ލިބުން ލަސްވުމާ ގުޅިގެން ދިމާވެފައިވާ އިތުރު ސިއްހީ މައްސަލަތަކާއި ގުޅޭ 15 މައްސަލަ
• ބޭހަށް ރިފަރ ކޮށްފައިވިނަމަވެސް ބޭސް ނުލިބޭ 9 މައްސަލަ

މީގެ އިތުރުން، 2024 ވަނަ އަހަރު އެ ކޮމިޝަނުން ތަޙުޤީޤު ކުރަން ނިންމި މައްސަލަތަކުގައި ހިމެނޭ ހާދިސާތައް އެންމެ ގިނައިން ރިޕޯޓުކޮށްފައިވަނީ މާލެ އަތޮޅުންނެވެ. އެއީ ގްޜޭޓާ މާލޭ ރީޖަންއިން ހުށަހެޅުނު 105 މައްސަލައިގެ އިތުރުން، 255 މައްސަލައެވެ.