ދުނިޔެ
މަސްތުވާތަކެއްޗާ ދެކޮޅަށް ހަނގުރާމަ އިއުލާންކުރި ރައީސް ޑުޓާޓޭ އައި.ސީ.ސީ ގެ އަމުރަށް ހައްޔަރުކޮށްފި

ފިލިޕީންސްގެ ކުރީގެ ރައީސް ރޮޑްރިގޯ ޑުޓާޓޭ ފޮޓޯ:ސީއެންއެން
ފިލިޕީންސްގެ ކުރީގެ ރައީސް ރޮޑްރިގޯ ޑުޓާޓޭ އިންޓަނޭޝަނަލް ކްރިމިނަލް ކޯޓް (އައި.ސީ.ސީ) ގެ އަމުރަށް މިއަދު ހައްޔަރުކޮށްފިއެވެ. އިންސާނިއްޔަތާ ދެކޮޅު ކުށްތަކެއް ކުރިކަމުގެ ތުހުމަތުގައި އޭނާ ހައްޔަރުކުރުމަށް އައި.ސީ.ސީ އިން އަމުރެއް ނެރެފައިވާކަމަށް ފިލިޕީންސް ސަރުކާރުން ބުނެފިއެވެ.
79 އަހަރުގެ ޑުޓާޓޭ ހައްޔަރުކުރެވުނީ މެނީލާގެ މައި ވައިގެ ބަނދަރުގައި، ހޮންކޮންގުން އެނބުރި ފިލިޕީންސްއަށް އައުމަށްފަހުއެވެ. އިންޓަޕޯލްގެ މެނީލާ އޮފީހަށް އައި.ސީ.ސީ ގެ ހައްޔަރު އަމުރު ލިބުނު ކަމަށް ރައީސް އޮފީހުގެ ބަޔާނެއްގައި ބުނެފައިވެއެވެ.
ޑުޓާޓޭ ރައީސްކަމުގައި ހުރި ދުވަސްވަރު ހިންގި މަސްތުވާތަކެއްޗާ ދެކޮޅު ހަރުކަށި ހަމަލާތަކުގައި 6،000 އަށްވުރެ ގިނަ މީހުން މަރުވެފައިވާ ކަމަށް ފުލުހުންގެ ތަފާސްހިސާބުތަކުން ދައްކައެވެ. ނަމަވެސް މިނިވަން ފަރާތްތަކުން ބުނާ ގޮތުގައި މި އަދަދު މާ ބޮޑުވެދާނެއެވެ.
ޑުޓާޓޭ ވަނީ ހައްޔަރުކުރުމަށް ކުރެވުނު އަމުރުގެ ޞައްޙަކަމާމެދު ސުވާލު އުފައްދާފައެވެ. "ކޮން ޤާނޫނެއްގެ ދަށުން، އަދި ކޮން ކުށެއް ކުރީމަތޯ؟" އޭނާގެ ދަރިފުޅު ވެރޮނިކާ "ކިޓީ" ޑުޓާޓޭ އިންޓަނެޓުގައި ޝާއިޢުކުރި ވީޑިއޯއެއްގައި އޭނާ ބުނެފައިވެއެވެ.
2016 ގައި ރައީސްކަމަށް ހޮވުނު ޑުޓާޓޭ ވަނީ މަސްތުވާތަކެއްޗާ ދެކޮޅަށް ހަނގުރާމައެއް އިޢުލާނުކޮށްފައެވެ. އޭނާގެ މި ހަރުކަށި ސިޔާސަތުގެ ސަބަބުން ގިނަ އަދަދެއްގެ ޒުވާނުން މަރުވެފައިވެއެވެ. މިހާރު އޭނާ ވަނީ ފިލިޕީންސްގެ އިދާރާތަކުގެ ބެލުމުގެ ދަށުގައެވެ.