ޚަބަރު
ޓޫރިޒަމްގެ ބޭނުމަށް ތަރައްޤީކުރެވޭ ސަރަޙައްދުތައް ކަނޑައެޅުމުގެ ބާރު ރައީސަށް!
ރަށު ފަތުރުވެރިކަން/ ފޮޓޯ: ނޮވަ މޯލްޑިވްސް
ޓޫރިޒަމްގެ ބޭނުމަށް ތަރައްޤީކުރެވޭ ސަރަޙައްދުތައް ކަނޑައެޅުމުގެ ބާރު ރައީސަށް ލިބިދޭ ގޮތަށް ޓޫރިޒަމް ޤާނޫނަށް ބޮޑެތި ބަދަލުތަކެއް ގެނައުމަށް ސަރުކާރުން މަޖިލީހަށް ހުށައަޅައިފިއެވެ.
ސަރުކާރުގެ ފަރާތުން ތިމަރަފުށި ދާއިރާގެ މެންބަރު އަޙްމަދު ރިޔާޟް މަޖިލީހުގެ މިއަދުގެ ޖަލްސާއަށް ހުށައަޅާފައިވާ އިޞްލާޙުގައި ވަނީ މީހުން ދިރިއުޅޭ ރަށްރަށް ނުވަތަ ސިޓީތަކައް ނިސްބަތްވާ ރަށު ނުވަތަ ސިޓީ ކައުންސިލްގެ އިޙްތިޞާޞްގައި ހިމެނޭ ފަޅު ރަށްރަށާއި ފަޅުތައް ޓޫރިޒަމްގެ ބޭނުމަށް ތަރައްޤީކުރެވޭ ސަރަޙައްދުގެ ގޮތުގައި ކަނޑައަޅާނީ ރައީސުލްޖުމްހޫރިއްޔާ ކަމަށެވެ.
މި ބިލުގައި، ރިސޯޓުތައް ކުއްޔަށް ދިނުމުގެ މުއްދަތު 99 އަހަރަށް އިތުރުކުރުމަށާއި، ފައިސާ ދެއްކުމުގެ މުއްދަތަށް ލުއިދިނުމަށްޓަކައި އިތުރު 6 މަސް ދުވަހުގެ މުހުލަތެއް ދިނުން ވެސް ހިމަނާފައިވެއެވެ.
މިއީ ދިވެހިރާއްޖޭގެ ޓޫރިޒަމާބެހޭ ގާނޫނަށް މި ސަރުކާރުން އިސްލާހު ހުށަހެޅި ތިން ވަނަ ފަހަރެވެ. އަދި މިއީ ދިވެހިރާއްޖޭގެ ޓޫރިޒަމާބެހޭ ގާނޫނަށް ގިނަ އަދިވެސް އިތުރު ގިނަ ބަދަލުތަކާއެކު އިސްލާޙު ގެންނަ 15 ވަނަ ފަހަރެވެ.
މިޤާނޫނުގައި މިހާރު އޮންނަގޮތުން، މީހުން ދިރިއުޅޭ ރައްރަށުގައި ފަތުރުވެރިކަމުގެ ހަރަކާތްތައް ބޭއްވުމުގެ ބާރު އޮންނަނީ އެ ރަށެއްގެ ކައުންސިލަށެވެ.
