ޚަބަރު
މިއަދު އަޞްރު ނަމާދަށްފަހު ހުޅުމާލެ ރަޝީދު މިސްކިތުގައި ވަޒީރު ޑރ. ޝަހީމްގެ ޚާއްޞަ ދަރުހެއް!
އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު/ފޮޓޯ: ދަ ޓައިމްސް އޮފް އައްޑޫ
މިއަދު އަޞްރު ނަމާދަށްފަހު ހުޅުމާލެ ރަޝީދު މިސްކިތުގައި އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދުގެ ޙާއްސަ ދަރުހެއް އޮންނާނެ ކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއްޖެއެވެ.
އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ މި ދަރުސްގައި ވަޒީރު ވާހަކަދައްކަވާނީ "ދުޢާކުރުން" މި މަޢުޟޫގެ މައްޗަށް ކަމަށެވެ. މިއަހަރުގެ ރަމަޟާން މަހު ވަޒީރު ޑރ. ޝަހީމް އިމާމުވެ ތަރާވިޙް ނަމާދު ކުރައްވަނީ ވެސް ހުޅުމާލޭގެ ރަޝީދު މިސްކިތުގައެވެ. މި މިސްކިތުގައި އެމަނިކުފާނު ޢާންމު ގޮތެއްގައި ކުރައްވަނީ 8 ރަކުޢަތެވެ.
އިސްލާމީ ކަންތައްތަަކާ ބެހޭ ވަޒީރު ޑރ މުޙައްމަދު ޝަހީމް ޢަލީ ސަޢީދަކީ ރާއްޖޭގެ އެންމެ އިސް ދީނީ ޢިލްމުވެރިންގެ ތެރެއިން ބޭފުޅެކެވެ. ވަޒީރު ވަނީ ފާއިތުވި އަހަރުތަކުގައިވެސް ރާއްޖޭގެ އެކި މިސްކިތްތަކުގައި އިމާމުވެ ތަރާވީޙް ނަމާދު ކުރައްވާ، ތަފާތު އެކިކަހަލަ ދަރުސްތައް ދެއްވާފައެވެ. އަދި އެމަނިކުފާނަކީ ރާއްޖޭގެ ގިނަ ރައްޔިތުންގެ މަޤުބޫލުކަން ލިބިފައިވާ ބޭފުޅެކެވެ.
މިއަދު ހަވީރު އޮންނަ ދަރުސްގެ އިތުރުން، މިރޭ މައުމޫން ފައުންޑޭޝަނުން ބާއްވާ އިޙްޔާ ފޯރަމްގައި ވެސް ވަޒީރު ޑރ. މުޙައްމަދު ޝަހީމް އަލީ ސަޢީދު ތަޤުރީރު ކުރައްވާ ގޮތަށް ހަމަޖެހިފައިވާކަމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ވިދާޅުވެފައެވެ. މިރޭގެ އިޙްޔާ ފޯރަމްގެ މަޢުޟޫއަކީ "އިޖްތިމާޢީ ޢަދާލަތު ޤާއިމު ކުރުމުގައި ޒަކާތުގެ ދައުރު" އެވެ.
