ސުޕްރީމް ކޯޓުގެ ފަނޑިޔާރު އަޒްމިރަލްދާ އަށް ކުރާ ތުހުމަތުތަކަށް އޭނާ އިންކާރު ކުރައްވައިފި

ސުޕްރީމް ކޯޓުގެ އިސް ފަނޑިޔާރުންގެ ތެރޭގައި ހިމެނިވަޑައިގަންނަވާ ފަނޑިޔާރު ޑރ. އަޒްމިރަލްދާ ޒާހިރުއަށް ކުރާ ތުހުމަތުތަކަށް އޭނާ އިންކާރުކޮށްފިއެވެ.

ޑރ. އަޒްމިރަލްދާ ޒާހިރުގެ މައްޗަށް ކުރަމުން އަންނަނީ، ކްރިމިނަލް ކޯޓުގެ ފަނޑިޔާރުންނަށް ނުފޫޒު ފޯރުވިކަމުގެ ތުހުމަތުތަކެވެ. އެއީ އޭނާގެ ފިރިކަލުން ޑރ. އިސްމާއިލް ލަތީފް މަސާޖު ޕާލާއަކުން ހައްޔަރުކޮށްގެން ކްރިމިނަލް ކޯޓަށް ހާޒިރުކުރުމުން، އޭނާގެ ފިރިކަލުން ބަންދުން ދޫކޮށްލަން އެ ކޯޓުގެ ގާޒީންނަށް ނުފޫޒު ފޯރުވިކަމަށް ބުނާ މައްސަލައިގެ ތުހުމަތެވެ.

ފަނޑިޔާރުު އަޒްމިރަލްދާ ވަނީ މިއަދު ހެނދުނު 10:00 ހާއިރު ޖުޑީޝަލް ސަރވިސް ކޮމިޝަން، ޖޭއެސްސީއަށް ހާޒިރުކޮށްފައެވެ. އަޒްމިރަލްދާ ޖޭއެސްސީއަށް ވަޑައިގެންނެވީ އޭނާގެ ވަކީލު އިބްރާހިމް ޝަމީލް އާއި އެކުގައެވެ. މި މައްސަލައާއި ގުޅިގެން އަޒްމިރަލްދާގެ ވަކީލު އިބްރާހިމް ޝަމީލް ވިދާޅުވީ، މިއަދު ޖުޑީޝަލް ސަރވިސް ކޮމިޝަނުގައި ކުރިއަށް ގެންދިޔަ އަޑުއެހުމުގައި ފަނޑިޔާރަށް ކުރާ ތުހުމަތުތަކަށް ފަނޑިޔާރު އިންކާރު ކުރައްވާފައިވާ ކަމަށެވެ. އަދި މި ތުހުމަތުތަކަކީ އެއްވެސް އަސްލެއް ނެތް ދޮގު ތުހުމަތުތަކެއްކަމަށް އަޒްމިރަލްދާ ފާހަގަކޮށްފައިވާކަމަށް ވަކީލު ވަނީ ވިދާޅުވެފައެވެ.

ޖުޑީޝަލް ސަރވިސް ކޮމިޝަނުން ބަލަމުން އަންނަ މައްސަލައަކާއި ގުޅިގެން، އަޒްމިރަލްދާގެ އިތުރުން ސުޕްރީމް ކޯޓުގެ ފަނޑިޔާރު މަހާޒް އަލީ ޒާހިރާއި ފަނޑިޔާރު ހުސްނުއްސޫއޫދު ވެސް ވަނީ ސަސްޕެންޑްކޮށްފައެވެ. މި މައްސަލަ އާއި ގުޅިގެން މިދިޔަ އާދިއްތަ ދުވަހު މަހާޒް އަށް ޖޭއެސްސީ އަށް ހާޒިރުކޮށް ސުވާލުކޮށްފައިވާއިރު، ފަނޑިޔާރު ހުސްނުއްސުޢޫދު ވަނީ ފަނޑިޔާރު ކަމުން އިސްތިއުފާ ދެއްވައިފައެެވެ.

ސުޕްރީމް ކޯޓުގެ ފަނޑިޔާރުންނާއި ދެކޮޅަށް ބަލަމުންދާ މައްސަލަތަކަކީ، އެއްވެސް އަސްލެއް ނެތް، ފަނޑިޔާރުންގެ މަސައްކަތްތަކަށް ނުފޫޒު ފޯރުވުމަށް އުފައްދާފައިވާ މައްސަލަތަކެއް ކަމަށް އަޒްމިރަލްދާގެ ވަކީލު ނެރުއްވެވި ބަޔާނެއްގައި ވަނީ ވިދާޅުވެފައެވެ.