ސިވިލް ސާވިސް ކޮމިޝަންގެ ނައިބު ރައީސް މަޤާމުން އިސްތިއުފާ ދެއްވައިފި

ސިވިލް ސަރވިސް ކޮމިޝަން، ސީއެސްސީގެ ނައިބު ރައީސް ގެ މަޤާމުގައި ހުންނެވި އިބްރާހިމް ރަޝީދު އެ މަޤާމުން އިސްތިއުފާ ދެއްވައިފިއެވެ.

އިބްރާހިމް ރަޝީދު އެ މަޤާމުން އިސްތިއުފާ ދެއްވާފައި މިވަނީ އޭނާ މަޤާމުން ވަކިކުރުމަށްޓަކައި ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން މަސައްކަތް ފަށާފައިވަނިކޮށެވެ. އޭނާ މަޤާމުން އިސްތިއުފާދިނުމާއި ގުޅިގެން ސިވިލް ސަރވިސް ކޮމިޝަނުން ވަނީ އޭނާގެ ޚިދުމަތަށް ޝުކުރު އަދާކުރައްވާފައެވެ.

އިބްރާހިމް ރަޝީދު ސިވިލް ސަރވިސް ކޮމިޝަނަށް އައްޔަންކުރައްވާފައި ވަނީ، 2020 ވަނަ އަހަރުގެ ސެޕްޓެމްބަރު މަހުގެ ތެރޭގައެވެ. އޭނާގެ މައްޗަށް ވަނީ، އެމްޑީޕީގެ ވެރިންނާއި ގާތް ގުޅުމެއް ބާއްވާކަމަށް ތުހުމަތުތަކެއް ކޮށްފައެވެ. މީގެ އިތުރުން، ރެކްރޫމަންޓުގައި ހުރި ބައެއް މައްސަލަތަކާއި ގުޅިގެން ސީއެސްސީގެ ބައެއް މުވައްޒަފުން ވަނީ ޝަކުވާ ހުށައަޅާފައެވެ. މިކަމާއި ގުޅިގެން، މައްސަލަ ބެލުމަށް މަޖިލީހުގެ ތަޅުމަށް ވަނީ ފޮނުއްވާފައެވެ. ރައްޔިތުންގެ މަޖިލީހުގެ ޤަވާއިދުގައިވާ ގޮތުން، މިނިވަން މުއައްސަސާއެއްގެ މެންބަރަކު ވަކިކުރުމާ މެދު ވަކި ގޮތެއް ނިންމުމުގެ ކުރިން އެ މައްސަލައެއް ކޮމިޓީގައި ކުރިއަށް ގެންދަން ފެނޭތޯ ބަލަން ޖެހޭނެއެވެ. އަދި އެ މައްސަލައެއް ބަލަން ފެނިއްޖެ ޙާލަތެއްގައި އެކަން މަޖިލީހުގެ ތަޅުމަށް ފޮނުވަން ޖެހޭނެއެވެ.

މަޖިލީހުގެ ތަޅުމަށް މައްސަލަ ފޮނުވުމުން، މަޖިލީހުގެ ރިޔާސަތުން މައްސަލަ އިޢުލާނުކުރުމަށް ފަހު މައްސަލަ ދިރާސާ ކުރަން ކޮމިޓީއަށް ފޮނުވަން ޖެހޭނެކަމަށް މަޖިލީހުގެ ޤަވާއިދުގައި ބަޔާންކުރައްވާފައި ވެއެވެ.