ޚަބަރު
މޯލްޑިވްސް މަނިޓަރީ އޮތޯރިޓީގެ ބޯޑުން ޝުހާދު އިސްތިއުފާ ދެއްވައިފި

އެމްއެމްއޭ ގެ ބޯޑުން އިސްތިއުފާދެއްވި ޝުހާދު އިބްރާހިމް/ފޮޓޯ: އެމްއެމްއޭ
މޯލްޑިވްސް މަނިޓަރީ އޮތޯރިޓީ، އެމްއެމްއޭ ގެ ބޯޑުން ޝުހާދު އިބްރާހިމް އިސްތިއުފާ ދެއްވައިފިއެވެ.
މޯލްޑިވްސް މަނިޓަރީ އޮތޯރިޓީގެ ބޯޑުގައި ޝުހާދު އިބްރާހިމް މެމްބަރެއްގެ ގޮތުގައި އިންނަވަނީ އިކޮނޮމިކް މިނިސްޓްރީގެ ފަރާތުންނެވެ.
ޝުހާދު މަޤާމުން އިސްތިޢުފާ ދެއްވާފައި މިވަނީ، މޯލްޑިވްސް މަނިޓަރީ އޮތޯރިޓީގެ ފައިނެންޝަލް ސެންޓަރު އެޅުމަށްޓަކައި ބިން ގަތުމުގެ ޕްރޮޕޯސަލްއާއި ގުޅިގެންނެވެ. މި ޕްރޮޕޯސަލްގެ ދަށުން ހުޅުމާލެއިން ބިމެއް ގަތުމަށް އެމްއޭއިން، ހައުސިންގ ޑިވެލޮޕްމެންޓް ކޯޕަރޭޝަން، އެޗްޑީސީއަށް 14 ބިލިއަން ރުފިޔާ ދައްކަވަން މިދިޔަ ހަފްތާގައި ބޯޑުން ނިންމަވާފައިވާކަމަށް އަޑުތައް ވަނީ ފެތުރިފައެވެ. ނަމަވެސް، މިކަމާއި ގުޅިގެން އެމްއެމްއޭގެ އަދި ސަރުކާރުގެ ރަސްމީ ބަހެއް ވެސް އަދި ލިބިފައެއް ނުވެއެވެ.
ޝުހާދު އިސްތިއުފާ ދެއްވުމާއި ގުޅިގެން އެމްއެމްއޭގެ ބޯޑުގައި މިވަގުތު ތިއްބެވި މެންބަރުންނަކީ:
- ގަވަރުނަރު - އަހުމަދު މުނައްވަރު
- ޑެޕިއުޓީ ގަވަރުނަރު - އަހުމަދު އިމާދު
- އެމްއެމްއޭގެ އެޑްވައިޒަރު - އިދުހާމް ހުސެއިން
- ޕްރައިވެޓް ސެކްޓާރ ތަމްސީލް ކުރާ - މަހްޒޫމް ސަލީމް
- ޕްރައިވެޓް ސެކްޓާރ ތަމްސީލް ކުރާ - ފާތިމަތު ޝަފީގާ
ޝުހާދު އިބްރާހިމްގެ އިތުރުން، ފިނޭންސް މިނިސްޓްރީގައި އެމެއެމްއޭ ގެ ބޯޑު ތަމްސީލުކުރައްވަމުން ގެންދަވާ އަހުމަދު ޒަޔާން ވަނީ އިކޮނޮމިސްޓް މަޤާމުން ވަކިވުމަށް ނޯޓިސް ފޮނުއްވައިފައެވެ. އޭނާގެ ނޯޓިސް ހަމަވާނީ އަންނަ މެއި މަހުގެ 15 އިން ފެށިގެންނެވެ.