ފަހުދިހަ އާއި ގުޅިގެން ސަރުކާރު ބަންދުވިޔަސް މުހިންމު ޚިދުމަތްތައް ދޭނެ: ރައީސް އޮފީސް

ރަމަޟާން މަހުގެ ފަހުދިހަ އާއި ގުޅިގެން ސަރުކާރު ބަންދުވިޔަސް ރައްޔިތުންނަށް ދޭންޖެހޭ މުހިންމު ޚިދުމަތްތައް ދޭނެކަމަށް ރައީސް އޮފީހުން ބުނެފިއެވެ. 

ރައީސް އޮފީހުން ބުނެފައިވަނީ މިހިނގާ މާރިޗު މަހުގެ 20 ވާ ބުރާސްފަތި ދުވަހުން ފެށިގެން ރަމަޟާންމަހުގެ ފަހުދިހައިގައި ސަރުކާރުގެ އޮފީސްތައް ބަންދުވާނެކަމަށެވެ.  އެއީ، 1445ވަނަ އަހަރުގެ ރަމަޟާން މަހުން ފެށިގެން، ކޮންމެ އަހަރެއްގެ ރަމަޟާން މަހުގެ 20ވަނަ ދުވަހުން ފެށިގެން އެމަހުގެ ނިޔަލަށް ހިނގާ ދުވަސްތަކަކީ، ސަރުކާރު ބަންދު ދުވަސްތަކެއް ކަމަށް ރައީސުލްޖުމްހޫރިއްޔާގެ އޮފީހުން 4 ފެބުރުވަރީ 2024 ގައި ނެރުއްވި ދެންނެވުމުން ހަމަޖައްސަވައިފައިވާތީ ކަމަށްވެސް ރައީސް އޮފީހުން ބުނެފައިވެއެވެ.

 މިގޮތަށް ހަމަޖެއްސެވީ، އިސްލާމީ އުސޫލުތައް ޤާއިމުކުރެއްވުމަށާއި، ދީނީ ކަންކަމަށް ރައްޔިތުން ލޯބި ޖެއްސުމާއި، ދީނީ ކަންކަމަށް އިސްކަން ދިނުމަށް ފުރުސަތު ދެއްވުމުގެ ގޮތުން ކަމަށްވެސް ރައީސް އޮފީހުން ބުނެއެވެ.

ރަމަޟާންމަހުގެ ފަހުދިހައަކާ ގުޅިގެން ސަރުކާރު ބަންދުވާ ދުވަސްތަކުގައި، އެކިއެކި މުއައްސަސާތަކުން ރައްޔިތުންނަށް ކޮންމެހެން ދެއްވަންޖެހޭ ޚިދުމަތްތައް، އެ މުއައްސަސާތަކުން ކަނޑައަޅުއްވާ ގޮތެއްގެ މަތިން ދެއްވުމުގެ އިންތިޒާމު، އެ މުއައްސަސާއަކުން ހަމަޖެއްސެވުމަށްވެސް ރައީސުލްޖުމްހޫރިއްޔާގެ އޮފީހުގެ ދެންނެވުމުގައި އަންގަވައިފައިވާނެ ކަމަށް ރައީސް އޮފީހުން ބުނެފައިވެއެވެ.