ޚަބަރު
ސަލާމާތީ ބާރުތަކުން ހިންގި އޮޕަރޭޝަނާއި ގުޅިގެން ކަންބޮޑުވާން ޖެހޭ ކަމެއް ނެތް: ޚާރިޖީ ވުޒާރާ
ރޭ ސަލާމަތީ ބާރުތަކުން ހިންގި އޮޕަރޭޝަންގެ ތެރެއިން. ފޮޓޯ: މިހާރު
ރޭ ރާއްޖޭގެ ސަލާމަތީ ބާރުތަކުން ހިންގި ކައުންޓަރ ޓެރަރިޒަމާއި ގުޅޭ އޮޕަރޭނާއި ގުޅިގެން ކަންބޮޑުވާން ޖެހޭ ހާލަތެއް ނެތް ކަމަށް ދިވެހި ޚާރިޖިއްޔާއިން ބުނެފިއެވެ.
އެވުޒާރާައިން ނެރެފައިވާ ބަޔާނެއްގައި ބުނެފައިވަނީ އިންޓެލިޖެންސް ރިޕޯޓުތަކުގެ މައްޗަށް ބިނާކޮށް، ޤައުމާއި ރައްޔިތުންގެ ސަލާމަތަށްޓަކައި މިފަދަ އޮޕަރޭޝަންތައް އާންމުކޮށް ހިންގާ ކަމަށެވެ. އެ އޮޕަރޭޝަން އަދިވެސް ކުރިއަށްދާއިރު، ކަންބޮޑުވާންޖެހޭ ހާލަތެއް އަދި ނެތް ކަމުގެ ޔަޤީންކަން އެ ބަޔާނުގައި ވަނީ ދީފަ އެވެ.
މީގެ އިތުރުން، ދިވެހިންނަށާއި ރާއްޖެއަށް ޒިޔާރަތް ކުރާ މީހުންނަށް ވެސް ރައްކާތެރި ޤައުމަކަށް ހެދުމަށްޓަކައި ކަމާ ގުޅުން ހުރި އިދާރާތަކުން އަވަސް ފިޔަވަޅުތައް އަޅަމުންދާނެ ކަމުގެ ޔަޤީންކަންވެސް އެވުޒާރާއިން ވަނީ ދީފަ އެވެ.
މި އޮޕަރޭޝަނާ ގުޅޭ އިތުރު މަޢުލޫމާތެއް ރަސްމީގޮތެއްގައި ފުލުހުންވެސް އަދި ސިފައިންވެސް ހާމަކޮށްފައެއް ނުވެއެވެ.
މިއޮޕަރޭޝަންގައި މާލޭގެ އިތުރުން ހުޅުމާލޭގެ އެކި ސަރަހައްދުތަކުގައި ސިފައިންނާއި ފުލުހުން ހަރަކާތްތެރިވެ، ބައެއް ގެތަކާއި ވެހިކަލްތައް ވަނީ ބަލައި ފާސްކޮށްފަ އެވެ. އެ އޮޕަރޭޝަންގައި ތިން މީހަކު ހައްޔަރުކޮށްފައިވާ ކަމަށް ފުލުހުން ބުނެފައިވެ އެވެ.
