ހޫރުލްޢީނުންނާއި ގުޅުވައި ދެއްކި ވާހަކައަށް ރޮޒެއިނާ މަޢާފަށް އެދިއްޖެ

ހޫރުލްޢީނުންނާއި ގުޅުވައިގެން ޓީވީގައި ދެއްކެވި ވާހަކައަށް ކުރީގެ މަޖިލިސް މެމްބަރު ރޮޒެއިނާ އާދަމް މަޢާފަށް އެދިއްޖެއެވެ. 

މިކަމާ ގުޅިގެން ފޭސްބުކްގައި ރޮޒެއިނާ ނެރެފައިވާ ސްޓޭޓްމަންޓު ޙިއްސާކުރަމުން ބުނެފައިވަނީ އޭނާ ޓީވީގައި ދެއްކި ވާހަކަ މާނައޮޅޭ ގޮތައް ބަދަލުކޮށް ސޯޝަލްމީޑިއާގައި ފަތުރަމުންދާ ކަމަށް ބުނެފައެވެ. އޭނާގެ ސްޓޭޓްމަންޓައް ބަލާލާއިރު ހޫރުލްޢީނުންގެ ވާހަކަ ގެނައިރު “ބޭކާރު” މިބަސް ގެނެސް ވާހަކަދައްކައިފައިމުވުން އޭގެ މާނަ ބަޔަކަށް އޮޅުފައިވާ ކަމަށް އޭނާވަނީ ބުނެފައެވެ. 

އަދި ބޭކާރޭ ބުނެފައިވާނީ މިވަގުތާއި ޙާލަތައް ބަލާއިރު ދީނުގައި ކަންއޮތްގޮތް ބުނެދޭން ޖެހޭ މާމުހިންމު ކަންކަން އެބަހުރިކަމަށް އޭނާ ޤަބޫލުކުރާތީ ކަމަށްވެސް ވަނީ ބުނެފައެވެ.

ރޮޒެއިނާ ބުނެފައިވަނީ ދީނުގެ ހުރިހާ ކަންކަމަކީވެސް މުހިންމު ކަންކަން ކަމަށާއި ނަމަވެސް ވަގުތާ ޙާލަތައް ބަލައި އެވަގުތެއްގައި ހިނގާ ކަންކަމަށް ބަލައި ދީނުގައި އޮތްގޮތް ސާފުކޮށްދިނުމަށް ޢިލްމުވެރިން އިސްކަމެއް ދޭން ޖެހޭ ކަމަށް ޤަބޫލު ކުރާ ކަމަށެވެ.

މީގެއިތުރުން އޮޅޭ ގޮތަައް އެވާހަކަ ބުނެވިފައިވުމާ ގެނެވުނު މިސާލު ރަނގަޅު ނޫން ކަމުން އެކަމަށް މަޢާފަށްއެދޭ ކަމަށް ރޮޒެއިނާ ވަނީ ބުނެފައެވެ. އަދި އޭނާ ބުނި ބަހަކީ ދީނަށް ފުރައްސާރަ ކުރުމަށް ބުނިއެއްޗެއް ނޫން ކަމަށްވެސް މި ސްޓޭޓްމަންޓުގައި ބުނެފައިވެއެވެ.

ރޮޒެއިނާ ރޭ ޓީވީގައި ދެއްކި ވާހަކަ އާއި ގުޅިގެެން ރާއްޖޭގެ ދީނީ ޢިލްމުވެރިންގެ ތެރެއިން ގިނަ ބަޔަކު އެކަން ކުށްވެރިކޮށްފައިވެއެވެ.