މަސްތުވާތަކެތީގެ އޮޕަރޭޝަނެއްގައި ވިލިމާލެއިން ތިން މީހަކު ހައްޔަރުކޮށްފި

މޯލްޑިވްސް ޕޮލިސް ސާރވިސަސްގެ އިންޓެލިޖެންސްއަށް ލިބުނު މަޢުލޫމާތަކާ ގުޅިގެން ވިލިމާލޭގައި ހިންގި މަސްތުވާތަކެތީގެ އޮޕަރޭޝަނެއްގައި ތިން މީހަކު ހައްޔަރުކޮށްފިއެވެ.

މި މަހުގެ 9 ވަނަ ދުވަހު ހިންގި މި އޮޕަރޭޝަނުގައި އެމީހުންގެ އަތުން 57.78 ގްރާމުގެ މަސްތުވާތަކެތި ފެނިފައިވެއެވެ. އަދި މަސްތުވާތަކެތި ވިއްކައިގެން ހޯދާފައިވާކަމަށް ބެލެވޭ، 241،000ރ. އަށް ވުރެ ގިނަ ފައިސާ ވެސް އެމީހުންގެ އަތުން ވަނީ ފެނިފައެވެ.

މި މައްސަލައާ ގުޅިގެން ހައްޔަރުކޮށްފައިވަނީ ތ. ގާދިއްފުށި / ކެނެރީގެ، އިބްރާހީމް އިމާދު (30އ) އާއި މއ. ވިންޑްސްޓަރ 1 / މާލެ، މުޙައްމަދު ސިމްރާޙް (43އ) އަދި ގދ. ރަތަފަންދޫ / ޒަމާނީއާގެ، ޞަލާޙު ޝިހާބް (45އ) އެވެ.

މި ތިން މީހުންގެ ބަންދާމެދު ގޮތެއް ނިންމުމަށް ކޯޓަށް ގެންދިއުމުން، އިބްރާޙިމް އިމާދު ވަނީ ދޫކޮށްލާފައެވެ. އެހެންކަމުން، އޭނާ ދޫކޮށްލި މައްސަލަ އިސްތިއުނާފުކޮށްދިނުމަށް އެދި ފުލުހުން ވަނީ ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައެވެ.

މި މައްސަލައިގައި ދެން ހިމެނޭ މުޙައްމަދު ސިމްރާޙް  އާއި ޞަލާޙު ޝިހާބް ވަނީ 15 ދުވަހަށް ބަންދުކުރުމަށް ކޯޓުން އަމުރުކޮށްފައެވެ.

މި މައްސަލަ އިތުރަށް ތަޙުޤީޤު ކުރަމުން އަންނަކަމަށް ފުލުހުން ވަނީ ހާމަކޮށްފައެވެ.