ޚަބަރު
ވިއްސާރާގައި މަގުމައްޗަށް ކުނި ނުނެރުމަށް ވެމްކޯއިން އިލްތިމާސްކޮށްފި

މާލޭ މަގުމަތީގައި ހުރި ކުނިތަކެއް ވެމްކޯގެ މުވައްޒަފުން ނަގަނީ/ފޮޓޯ: އެޑިޝަން އެމްވީ
ރާއްޖެއަށް މިހާރު ކުރަމުންދާ ވިއްސާރައާއި ގުޅިގެން މަގުމައްޗަށް ކުނި ނުނެރުމަށް ވޭސްޓް މެނޭޖްމަންޓް ކޯޕަރޭޝަން، ވެމްކޯއިން އިލްތިމާސްކޮށްފިއެވެ.
ވެމްކޯއިން މިފަދައިން އިލްތިމާސްކުރެއްވީ، މިކަމާއި ގުޅޭގޮތުން އެ ކޯޕަރޭޝަނުން ނެރުއްވި ބަޔާނެއްގައެވެ. މި ބަޔާނުގައި ވެމްކޯއިން ވިދާޅުވީ، މި ދުވަސްވަރަކީ މޫސުން ގޯސް ދުވަސްވަރެއް ނަމަވެސް ވެމްކޯގެ މުވައްޒަފުން ރައްޔިތުންނަށް ޚިދުމަތް ފޯރުކޮށްދިނުމުގައި އަވަދިނެތި މަސައްކަތްކުރާ ކަމަށެވެ. ނަމަވެސް، މިދުވަސްވަރު މޫސުން ގޯސްވުމުގެ ސަބަބުން ބައެއް ގޭގެއިން ކުނި ނުނެގިހުރުމަކީ މަދުން ނަމަވެސް ވެދާނެ ކަމެއްކަން ވެމްކޯއިން ވަނީ ފާހަގަކުރައްވާފައެވެ. އެހެންކަމުން، މިފަދަ ޙާލަތެއްގައިވެސް އުކާލާ ކުނި މަގުމައްޗަށް ނުވަތަ އާންމު ސަރަޙައްދުތަކަށް ނުނެރުމަށް ވެމްކޯއިން ވަނީ އެދިފައެވެ.
ވޭސްޓް މެނޭޖްމަންޓް ކޯޕަރޭޝަނުން ވިދާޅުވީ، ވިއްސާރަ ދުވަސްވަރު މަގުމައްޗަށް ކުނި ނެރުމުން މުޖްތަމަޢުގެ ޢާންމު ޞިއްޙީ ރައްކާތެރިކަމަށް ހުރަސްއެޅިގެންދާ ކަމަށެވެ. އަދި މިކަމުގެ ސަބަބުން މުޖްތަމަޢުގެ ތެރޭގައި އެކިކަހަލަ ބަލިތައް ހަލުވިކަމާއި އެކު ފެތުރުމުގެ ފުރުޞަތު ބޮޑުކަމަށް ވެސް އެ ކޯޕަރޭޝަނުން ވަނީ ބުނެފައެވެ. އެހެންކަމުން، އެއްވެސް ގެޔަކުން ކުނި ނުނެގިހުރިކަން ފާހަގަވެއްޖެނަމަ އެ ކޯޕަރޭޝަނުގެ ހޮޓްލައިން ނަންބަރު 1666 އަށް ގުޅުއްވައި އެ މަޢުލޫމާތު ހުށަހެޅުއްވުމަށް ވެމްކޯއިން ވަނީ އެދިފައެވެ.
މި ރަމަޟާން މަހާ ގުޅިގެންް ވެމްކޯއިން ކުނި ނަގާ ވަގުުތުތަކަށް ވަނީ ބަދަލު އައިސްފައެވެ. އެގޮތުން މިހާރު ކުނި ނަގާނީ:
- މާލެ: ރޭގަނޑު 8:30 އިން ދަންވަރު 2:30 އަށް
- ހުޅުމާލެ: ރޭގަނޑު 9:00 އިން ދަންވަރު 1:00 އަށް
- ވިލިމާލެ: ރޭގަނޑު 9:30 އިން ދަންވަރު 1:30 އަށް
ވެމްކޯއިން ވަނީ މިކަހަލަ ދަނޑިވަޅުތަކުގައި ރައްޔިތުންގެ ފަރާތުން ލިބެމުންދާ އެއްބާރުލުމަށް ޝުކުރު ދަންނަވާފައެވެ. އަދި މި ދުވަސްވަރަކީ މޫސުން ގޯސް ދުވަސްވަރެއްކަމުން، ހުރިހާ ރައްޔިތުންވެސް އާންމު ރައްކާތެރިކަން ކަށަވަރުކުރުމަށް އެ ކޯޕަރޭޝަނުން ވަނީ އިލްތިމާސްކުރައްވާފައެވެ.