އަތޮޅު ތެރޭގައި ޓިވެޓް ސެންޓަރަކާއި ދަނާލެއް ޤާއިމުކުރުމަށް ބަޔަކާ ހަވާލުކޮށްވި

ޒަމާނީ ވަޞީލަތްތަކާއެކު ކުޅުދުއްފުށި ސިޓީގައި ޓެކްނިކަލް ވޮކޭޝަނަލް ސެންޓަރަކާއި ރ. ދުވާފަރުގައި ދަރިވަރުންގެ ދަނާލެއް ތަރައްޤީކުރުމަށް ކޮންޓްރެކްޓަރުންނާއި ޙަވާލުކޮށްފިއެވެ.

މިކަމަށްޓަކައި މާލޭގައި ބޭއްވި ޙައްސަ ރައްމިއްޔާތުގައި، މި އެއްބަސްވުންތަކުގައި ސަރުކާރުގެ ފަރާތުން ސޮއިކުރެއްވީ މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިންނެވެ. 

އެގޮތުން ކުޅުދުއްފުށި ސިޓީގެ ޓިވެޓު ސެންޓަރުގެ މަސައްކަތް ހަވާލުކުރީ ރޯޑް ދިވެލޮޕްމެންޓް ކޯޕަރޭޝަނާއެވެ. ޓިވެޓު ސެންޓަރުގެ އިތުރުން އެ ސިޓީގައި ދަރިވަރުންގެ ދަނާލެއް ޤައިމު ކުރުމަށް ވެސް ވަނީ ނިންމާފައެވެ. އަދި ރ. ދުވާފަރުގައި ޓްރެއިނިންގ އޭރިއާއަކާއެކު ދަނާލެއް ޤާއިމުކުރުމުގެ މަސައްކަތް ޙަވާލުކޮށްފައިވަނީ ފެނަކަ ކޯޕަރޭޝަނާއެވެ.

މި މަސައްކަތްތަކާ ގުޅިގެން މަތީ ތަޢުލީމާ ބެހޭ ވުޒާރައިން ވިދާޅުވީ، މިއީ ރާއްޖޭގެ އެކި ސަރަޙައްދުތަކަށް އަމާޒުކޮށް މަތީ ތަޢުލީމާއި ތަމްރީނު ދޭ މަރުކަޒުތައް ބިނާކޮށް ހިންގުމަށް ކުރިޔަށްގެންދާ މަޝްރޫޢުގެ ތެރެއިން ކުރިޔަށް ގެންދިއުމަށް ނިންމާފައިވާ ދެ މަޝްރޫޢު ކަމަށެވެ.

މީގެ އިތުރުން، ކުޅުދުއްފުށީގައި ޤާއިމް ކުރުމަށް ނިންމާފައިވާ ޓިވެޓު ސެންޓަރަކީ ރާއްޖޭގައި ކުރިއަށްދާ އެކިކަހަލަ ސިނާޢީ މަސައްކަތަށް ބޭނުންވާ ފަންނު ބިނާ ކުރުމަށް އެޅޭ ވަރަށް މުޙިއްމު ފިޔަވަޅެއްގެގޮތުގައި މަތީ ތަޢުލީމާބެހޭ ވުޒާރާއިން ފާހަގަކުރައްވައެވެ. 

މި ޓިވެޓް ސެންޓަރު ޤާއިމް ކުރުމަށް ނިންމާފައިވަނީ 35،777.88  އަކަފޫޓްގެ ޖާގައެއްގައެވެ. އަދި މި ތަނުގައި މަލްޓި-ޕާޕަސް ވޯކްޝޮޕެއްގެ އިތުރުން 7 ކްލާސް ރޫމާއި އައި.ސީ.ޓީ ލެބޯޓަރީއެއް ހުންނާނެއެވެ. އަދި އިދާރީ ޚިދުމަތްތަކަށް ޚާއްޞަ އޭރިއާއަކާއި ސްޓާފް ރޫމަކާއި ދަރިވަރުންގެ ޚިދުމަތްތަކަށް ޚާއްޞަ އޭރިއާގެ އިތުރުން އޮޑިޓޯރިއަމަކާއި މީޓިންގ ރޫމްތަކާއި ސްޓަޑީ ރޫމްތަކާއި ލައިބްރަރީވެސް ހުންނާނެކަމަށް މަތީ ތަޢުލީމާ ބެހޭ ވުޒާރާއިން މަޢުލޫމާތު ދެއެވެ. 

އެ ސިޓީގައި ޤާއިމްކުރާ ދަރިވަރުންގެ ދަނާލުގައި ޝެއަރިންގ 32 ރޫމް ހުންނައިރު ދަރިވަރުންގެ ކެއިން ބުއިމުގެ ކަންކަން ހަމަޖެއްސުމަށް ކިޗަން އަދި ޑައިނިންގ އޭރިއާއަކާއި، ލޯންޑަރީ ފަދަ ޚިދުމަތްތަކުގެ އިތުރުން ދަރިވަރުންގެ ސިއްހީ ދުޅަހެޔޮކަމަށް އެކި ކަހަލަ ކުޅިވަރުކުޅެވޭނެ އެކްޓިވިޓީ އޭރިއާއަކާއެކު ޖިމެއްވެސް ހުންނާނެއެވެ. އަދި މީގެ އިތުރުން ނަމާދުކުރާނެ ތަނަކާއި ފާޚާނާއާއި ލިފްޓް ފަދަ ކަންކަން ހިމެނިފައިވާނެކަމަށް މަތީ ތަޢުލީމާބެހޭ ވުޒާރާއިން ވިދާޅުވިއެވެ.

ރ. ދުވާފަރުގައި ޓްރެއިނިންގ އޭރިއާއަކާއެކު އެކަމަޑޭޝަން ޚިދުމަތްތައް ބިނާ ކުރުމަށް 15،000 އަކަފޫޓްގެ ބިމެއް ހަމަޖެހިފައެވެ. މިތަނުގައި ޝެއަރިންގ 31 ރޫމް ހުންނައިރު ދަރިވަރުންގެ ކެއިން ބުއިމުގެ ކަންކަން ހަމަޖެއްސުމަށް ކިޗަން އަދި ޑައިނިންގ އޭރިއާއަކާއި، ލޯންޑަރީ ފަދަ ޚިދުމަތްތަކުގެ އިތުރުން ދަރިވަރުންގެ ސިއްހީ ދުޅަހެޔޮކަމަށް އެކި ކަހަލަ ކުޅިވަރުކުޅެވޭނެ އިންތިޒާމުތައްވެސް ހަމަޖެހިފައިވާނެކަމަށް އެ ވުޒާރާއިން ވިދާޅުވިއެވެ.