Ads by Exprox

ޚަބަރު

ބޭހުގެ މައްސަލައަށް ދާއިމީ ޙައްލެއް ހޯއްދަވާނެކަމަށް ސިއްޙީ ވަޒީރު ވިދާޅުވެއްޖެ

ބޭހުގެ މައްސަލައަށް ދާއިމީ ޙައްލެއް ހޯއްދަވާނެކަމަށް ސިއްޙީ ވަޒީރު ވިދާޅުވެއްޖެ

މާލޭގެ ބޭސް ފިހާރަތަކެއް، ފޮޓޯ: ދަ އެޑިޝަން

މިފްތާޙް މުޙައްމަދު

މިފްތާޙް މުޙައްމަދު

12 މާރިޗު 2025، 12:16

12 މާރިޗު 2025، 12:16

ރާއްޖޭގެ ބޭހުގެ ކަންކަން ހަމައަކަށް އެޅުވުމަށް މީގެކުރިން އެއްވެސް ސަރުކާރަކުން އިސްކަން ނުދެއްވާ މިންވަރަށް މި ސަރުކާރުން ދައުލަތެއްގެ ގޮތުގައި މަސައްކަތް ކުރައްވަމުން ގެންދަވާކަމަށާއި، މި މައްސަލައަށް ދާއިމީ ޙައްލެއް މި ސަރުކާރުން ހޯއްދަވާނެކަމަށް، ސިއްޙީ ވަޒީރު ޢަބްދުﷲ ނާޒިމް އިބްރާހީމް ވިދާޅުވެއްޖެއެވެ.

ޕީއެސްއެމް ނިއުސްއަށް ދެއްވި އިންޓަވިއުއެއްގައި ވަޒީރު ވިދާޅުވީ، އާސަންދަ ނިޒާމުގެ ތެރެއިން ބޭހަށް ކުރަމުން ދިޔަ އިސްރާފު ހުއްޓުވުމަށް ސަރުކާރުން ފިޔަވަޅުތަކެއް އެޅުމާ ގުޅިގެން، ބައެއް ފަރާތްތަކުން އެކަމަށް ހުރަސް އެޅުމުގެ މަސައްކަތްތަކެއް ކުރި ކަމަށެވެ. ނަމަވެސް މިކަމުގެ ޒިންމާ ވަކި ފަރާތެއްގެ ބޮލުގައި އެޅުވުމުގެ ބަދަލުގައި، ޤައުމެއްގެ ގޮތުގައި މިކަމަށް ހައްލެއް ހޯދުމަށް ސަރުކާރުން މަސައްކަތްކުރަމުންދާކަމަށް ވަޒީރު ވިދާޅުވިއެވެ. 

ވަޒީރު ވިދާޅުވީ، ބޭހުގެ މައްސަލަ ހައްލުކުރުމަށް އެޅި ފިޔަވަޅުތަކާއެކު ބޭސް ލިބުމަށް އައި ދަތިކަން ޙައްލުކޮށް، ރައްޔިތުންނަށް ބޭސް ލިބޭނެ އިންތިޒާމު ހަމަޖެއްސުމަށް ރައީސް އޮފީހާއި، ސިއްޙީ ވުޒާރާއާއި، މޯލްޑިވްސް ފުޑް އެންޑް ޑްރަގް އޮތޯރިޓީ، އެމްއެފްޑީއޭއާއި، އެސްޓީއޯ ގުޅިގެން މަސައްކަތްކުރަމުންދާ ކަމަށެވެ.

މީގެ އިތުރުން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވި ފަދައިން، މި އަހަރުގެ މެއި މަހުގެ 15ގެ ކުރިން ހުރިހާ ޒަރޫރީ ބޭހެއް ހުރިހާ ތަނަކުން ލިބޭނެ އިންތިޒާމު ހަމަޖައްސަވާނެކަމަށް ވަޒީރު ވަނީ ވިދާޅުވެފައެވެ. އަދި ރާއްޖޭގެ އެޕްރޫވްޑް ޑްރަގް ލިސްޓު، ނުވަތަ މޯލްޑިވްސް ފުޑް އެންޑް ޑްރަގް އޮތޯރިޓީން ރާއްޖޭގައި ވިއްކުމަށް ހުއްދަކޮށްފައިވާ ހުރިހާ ބޭހެއް އާންމު ބޭސްފިހާރަތަކުން ލިބޭނެ އިންތިޒާމު ހަރުދަނާ އުސޫލެއްގެ ތެރެއިން ހަމަޖައްސަވާނެކަމަށް ވަޒީރު ވަނީ ވިދާޅުވެފައެވެ.

ނިޒާމުގެ ގޯސްތަކަކާ ގުޅިގެން ސަރުކާރުން ބޭހަށް ކުރަމުން ދިޔަ އިސްރާފު ހުއްޓުމަށް ފެށި މަސައްކަތުގައި، ރާއްޖެއަށް ބޭސް އެތެރެކުރުމުގައި 2000 އިންސައްތައާއި ހަމައަށް ފައިދާ ލައިގެން ބޭސް ވިއްކަމުންދިޔަކަން ވަނީ ފާހަގަ ކުރެވިފައެވެ. މިކަން ހައްލުކޮށް އާސަންދަ ހަރުދަނާކުރުމަށް ބަލްކް ޕްރޮކިއުމަންޓް އުސޫލުން ރާއްޖެއަށް ކޮލިޓީ ބޭސް އެތެރެކުރުމުގެ މަސައްކަތް މިހާރުވަނީ ފަށާފައެވެ. ސަރުކާރުގެ މިހާރުގެ އަމާޒަކީ މިއަހަރުގެ މޭއި މަހުގެ ނިޔަލަށް ޒަރޫރީ ހުރިހާ ބޭހެއް ފާމަސީތަކުން ލިބެން ހުންނާނެ އިންތިޒާމު ހަމަޖެއްސުމަށްކަމަށް ސިއްޙީ ވުޒާރާއިން ވިދާޅުވެއެވެ. 

މި ލިޔުން ކިޔާލުމުން

Ads by MSS