ސިވިލް ސަރވިސް ކޮމިޝަނުގެ މެންބަރުކަމަށް ކުރިމަތުލުމުގެ ފުރުޞަތު ހުޅުވާލައިފި

ސިވިލް ސަރވިސް ކޮމިޝަން، ސީއެސްސީގެ މެންބަރުކަމަށް ކުރިމަތުލުމުގެ ފުރުޞަތު ހުޅުވާލައިފިއެވެ.

ސީއެސްސީގެ މެންބަރުކަމަށް ކުރިމަތިލުމުގެ ފުރުޞަތު ހުޅުވާލާފައި މިވަނީ އެ ކޮމިޝަނުގެ ނައިބު ރައީސްގެ މަޤާމުގައި ހުންނެވި އިބްރާހިމް ރަޝީދު މަޤާމުން އިސްތިއުފާ ދެއްވުމާއި ގުޅިގެންނެވެ. 

އިބްރާހިމް ރަޝީދު އިސްތިއުފާ ދެއްވާފައިވަނީ، އޭނާ މަޤާމުން ވަކިކުރުމުގެ މަސައްކަތް ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ފަށާފައިވަނިކޮށެވެ. އެ ކޮމެޓީން ބަލަމުންދިޔައީ މުވައްޒަފުން ރެކްރޫޓް ކުރުމުގައި ހުރި ބައެއް މައްސަލަތަކާއި އޭނާގެ މައްޗަށް ކުރެވޭ އިތުރު ބައެއް ތުހުމަތުތަކުގެ މައްސަލައެވެ. އިބްރާހިމް ރަޝީދު އިސްތިއުފާ ދެއްވުމާ ގުޅިގެން ސީއެސްސީން ވަނީ އޭނާގެ ޚިދުމަތަށް ޝުކުރު އަދާކުރައްވާފައެވެ.

ސިވިލް ސަރވިސް ކޮމިޝަނުގެ މެންބަރުކަމަށް ކުރިމަތިލުމާއި ގުޅޭގޮތުން ރައީސް އޮފީހުން ވަނީ އިޢުލާނެއް ނެރުއްވާފައެވެ. މި އިޢުލާނުގައި ވިދާޅުވެފައިވަނީ، ސިވިލް ސާވިސް ކޮމިޝަނުގައި މިހާރު ތިއްބެވި މެމްބަރުންގެ ތެރެއިން މެމްބަރެއް އިސްތިއުފާ ދެއްވާފައިވާ ކަމަށެވެ. އެހެންކަމުން މިކަމާއި ގުޅިގެން، އެ ކޮމިޝަނަށް މެންބަރަކު އައްޔަންކުރެއްވުމަށްޓަކައި މެމްބަރުކަމުގެ މަޤާމަށް ކުރިމަތިލުމުގެ ފުރުސަތު މިއަދުން ފެށިގެން 19 މާރިޗު ވާ ބުދަ ދުވަހުގެ 13:00 ގެ ނިޔަލަށް ހުޅުވާލާފައިވާ ކަމަށް އެ އިޢުލާނުގައި ބަޔާންކުރައްވާފައިވެއެވެ.

ސީއެސްސީއިން ވިދާޅުވީ، މެންބަރުކަމަށް ކުރިމަތިލުމަށް އެދޭ ފޯމާއި، އިޤުރާރާއި، ކުށާއި ދަރަނީގެ ރެކޯޑް ފޯމު ބަލައިގަތުމަށް ހަމަޖެހިފައިވަނީ، 19 މާރިޗު ބުދަ ދުވަހުގެ ހެނދުނު 09:30 އިން މެންދުރު 13:00 އަށް ރައީސުލްޖުމްހޫރިއްޔާގެ އޮފީހުގައި ކަމަށެވެ. އަދި މި ފޯމުތަކާއި އިގްރާރު، ރައީސުލްޖުމްހޫރިއްޔާގެ އޮފީހުގެ ވެބްސައިޓުން ޑައުންލޯޑް ކުރެވޭނެއެވެ.