އެއްލައްކައަށް ވުރެ ގިނަ ގޭބިސީއަށް މަސްދަޅު ކޭސް ބަހައިފި: އާދަމް ޝަރީފް އުމަރު

ރޯދަ ހަދިޔާގެ ގޮތުގައި ސަރުކާރުން ދޭ މަސްދަޅު ކޭސް، މިހާތަނަށް 110,127 ގޭބިސީއަށް ބަހާފައިވާކަމަށް ލޯކަލް ގަވަމެންޓް އޮތޯރިޓީގެ މިނިސްޓަރު އާދަމް ޝަރީފް އުމަރު ހާމަކުރައްވައިފިއެވެ.

މިގޮތުން މާލެ ސަރަހައްދުގެ 49,416 ގޭބިސީއަށާއި އަތޮޅުތެރޭގެ 60,711 ގޭބިސީއަށް މަސްދަޅު ކޭސް ބަހާފައިވެއެވެ. މާލޭގައި މި މަސައްކަތް ކުރިއަށްދަނީ ލޯކަލް ގަވަމެންޓް މިނިސްޓްރީގެ ބެލުމުގެ ދަށުން ކަމަށާއި، އަތޮޅުތެރޭގައި މި މަސައްކަތް ކުރިއަށްދަނީ ރަށު ކައުންސިލްތަކުގެ އިސްނެގުމުގެ ދަށުން ކަމަށް ވަޒީރު ފާހަގަކުރެއްވިއެވެ.

މިއަހަރުގެ ރޯދަ ހަދިޔާގެ ގޮތުގައި ކޮންމެ ގޭބިސީއަކަށް ދެމުންދަނީ 180 ގްރާމްގެ 48 ތެޔޮމަސް ދަޅު ހިމެނޭ ކޭހެކެވެ. ރާއްޖޭގެ ގިނަ ސަރަހައްދުތަކުގައި މިހާރު ވަނީ ރޯދަ ހަދިޔާ ބެހުމުގެ މަސައްކަތް ނިންމާފައި ކަމަށް މިނިސްޓަރުގެ ވާހަކަފުޅުގައި ވިދާޅުވެފައިވެއެވެ. ނުނިމި ހުރި މަދު ސަރަހައްދުތަކުގައި ވެސް ވީހާވެސް އަވަހަށް މަސައްކަތް ނިންމުމަށް މިނިސްޓާރ އާދަމް ޝަރީފް އުމަރު ވިދާޅުވެފައިވެއެވެ.