ޚަބަރު
ރާއްޖޭގެ ޚާރިޖީ ވަޒީރު މޮރިޝަސްގެ މިނިވަން ދުވަހުގެ ތަހުނިޔާ ފޮނުއްވައިފި
ރާއްޖޭގެ ޚާރިޖީ ވަޒީރު/ފޮޓޯ: އަވަސް އެމްވީ
ދިވެހިރާއްޖޭގެ ޚާރިޖީ ވަޒީރު ޑރ. ޢަބްދުﷲ ޚަލީލް މޮރިޝަސްގެ މިނިވަން ދުވަހުގެ ތަހުނިޔާ އެ ޤައުމުގެ ޚާރިޖީ ވަޒީރު، އޮނަރަބަލް ދަނަންޖޭ ރާމްފުލްއަށް ފޮނުއްވައިފިއެވެ.
ތަޙުނިޔާ ދެންނެވުމުގެ ގޮތުން ޚާރިޖީ ވަޒީރު ފޮނުއްވި މެސެޖުގައި ވިދާޅުވީ، މޮރިޝަސްގެ މިނިވަން ދުވަހުގެ އުފާވެރި މުނާސަބަތުގައި ތަހުނިޔާއާއި ހެޔޮ އެދުންތައް އަރިސްކުރާ ކަމަށެވެ. އެގޮތުން، ވަޒީރު ވަނީ މޮރިޝަސްގެ ސަރުކާރަށާއި އެންމެހާ ރައްޔިތުންނަށް ތަހުނިޔާ ފޮނުއްވާފައެވެ. މީގެ އިތުރުން ވަޒީރު ވިދާޅުވީ، މޮރިޝަސްގެ ޚާރިޖީ ވަޒީރު އޮނަރަބަލް ދަނަންޖޭ ރާމްފުލްއަށް ދުޅަހެޔޮ ޞިއްހަތެއް އަބަދުވެސް ދެއްވުމަށް އެދިލައްވާ ކަމަށެވެ. ހަމަ އެހެންމެ، މޮރިޝަސްގެ އެންމެހާ ރައްޔިތުންނަށް އަބަދުވެސް އުފާވެރިކަމާއި ފާގަތިކަން މިންވަރު ކުރެއްވުމަށް ވަޒީރު ވަނީ އެދިވަޑައިގެންފައެވެ.
މި ފުރުޞަތުގައި ވަޒީރު ވަނީ އެ މަނިކުފާނު މޮރިޝަސްގެ ޚާރިޖީ ވަޒީރަށް ކުރައްވާ މަތިވަރު ޤަދަރު އާކުރައްވާ، އަބަދުވެސް އެކުގައި މަސައްކަތް ކުރެއްވުމުގައި ދެމިހުންނަވާނެ ކަމުގެ ޔަޤީންކަން ދެއްވާފައެވެ.
