ޅ. މާފިލާފުށީގައި ޢަސްކަރީ ތަމްރީނުތަކެއް ބާއްވަނީ

ޅ. މާފިލާފުށީގައި ޢަސްކަރީ ތަމްރީނުތަކެއް ބޭއްވުމަށް ހަމަޖެހިފައިވާކަމަށް ދިފާއީ ވުޒާރާއިން ބުނެފިއެވެ. 

ދިފާޢީ ވުޒާރާއިން ބުނެފައިވަނީ މިމަހުގެ 16ވަނަ ދުވަހުން ފެށިގެން ޅ. މާފިލާފުށީގައި ޢަސްކަރީ ތަމްރީނުތަކެއް ކުރިއަށް ގެންދިޔުމަށް ހަަމަޖެހިފައިވާކަމަށެވެ. 

ދިފާޢީ ވުޒާރާއިން ބުނެފައިވަނީ، މޯލްޑިވްސް ނޭޝަނަލް ޑިފެންސް ފޯސް، (އެމްއެންޑީއެފް)އިން ކުރިއަށްގެންދިއުމަށް ހަމަޖެހިފައިވާ މި ޢަސްކަރީ ތަމްރީނުތައް ކުރިއަށްގެންދާނީ މި މަހުގެ 16 ވަނަ ދުވަހުގެ 18:00އިން މިމަހުގެ 21 ވަނަ ދުވަހުގެ 23:59އަށް ކަމަށެވެ.

އެ ވުޒާރާއިން ބުނެފައިވަނީ، މި ތަމްރީނުތަކުގައި ބޭނުންކުރާ ފްލެއަރސް ދަތުރުކުރާނީ ޅ. މާފިލާފުށީގެ ވަށައިގެން 200 މީޓަރު ދުރުމިނަށްކަމަށެވެ. އަދި ފްލެއަރސް ދަތުރުކުރާނެ އުސްމިނަކީ 200 މީޓަރެވެ. މި މަހުގެ 9 ވަނަ ދުވަހުން ފެށިގެން ހަތިޔާރާއެކު ސިފައިންގެ ތަމްރީންތަކެއް މާލެ ސަރަޙައްދުގައި ވެސް ދަނީ ކުރިއަށްގެންދަމުންނެވެ.

އަންނަ މަހުގެ 5 ވަނަ ދުވަހުގެ ނިޔަލަށް ކުރިއަށްގެންދާ މި ހަރަކާތް ބާއްވަނީ ހުޅުމާލެ ފުރަތަމަ ފިޔަވައްސާއި ދެވަނަ ފިޔަވަހީގައެވެ.

ދިފާޢީ ވުޒާރާއިން ބުނެފައިވަނީ އެ މުއްދަތުގެ ތެރޭގައި ކޮންމެ އާދިއްތަ އަދި ބުރާސްފަތި ދުވަހެއްގެ ހަވީރު 16:00އިން 18:00އަށް އެ ތަމްރީންތައް ކުރިއަށްދާނެކަމަށެވެ. އަދި ކޮންމެ އަންގާރަ ދުވަހެއްގެ 22:00އިން 1:00އަށް ތަމްރީންތައް ކުރިއަށްގެންދިޔުމަށްވެސްވަނީ ހަމަޖެހިފައެވެ.