ހިމަބިހި ފެތުރިދާނެކަމުގެ ބިރު އޮތުމުން އެމެރިކާގެ 3 އެއާޕޯޓެއް ރެޑް އެލާޓަށް

ހިމަބިހި ޖެހިފައިވާ މީހުންގެ ފަރާތުން ބަލި ފެތުރިދާނެކަމުގެ ބިރު އޮތުމުން އެމެރިކާގެ ބޮޑު 3 އެއާޕޯޓެކަށް ރެޑް އެލާޓް ނެރެފިއެވެ. 

އެގޮތުން އެމެރިކާގައި ރެޑް އެލާޓް ނެރެފައިވަނީ، ވާޖީނިއާގެ ވޮޝިންޓަން ޑަލަސް އިންޓަނޭޝަނަލް އެއާޕޯޓާއި، ލޮސް އެންޖެލިސް އިންޓަނޭޝަނަލް އެއާޕޯޓާއި، ނިއު ޔޯކްގެ ޖޭއެފްކޭ އެއާޕޯޓެވެ. މި ތިން އެއާޕޯޓުގައި ވެސް ބަލި ފެތުރުން ކޮންޓްރޯލް ކުރުމަށްޓަކައި ކަމާބެހޭފަރާތްތަކުން އެކިމަސައްކަތްތައް ކުރައްވަމުން ގެންދާކަމަށް އެ ޤައުމުގެ ނޫސްތަކުން ރިޕޯޓުކުރެއެވެ. އަދި މި އެއާޕޯޓުތައް މިހާރު ވަނީ ހައި އެލާޓަށް ގެނެސްފައެވެ.

ހިމަބިހި އެންމެ ފުރަތަމަ ފެނިފައިވަނީ މި މަހުގެ 3 ވަނަ ދުވަހު ޗައިނާ އެއާލައިންސްގެ ފްލައިޓެއްގައި އައި ކުޑަކުއްޖަކު ގައިންނެވެ. އަދި މިކަމާއި ގުޅިގެން، ނިއުޔޯކްގެ ޖޭއެފްކޭ އިންޓަނޭޝަނަލް އެއާޕޯޓުގައި ހިމަބިހި ފެތުރިދާނެކަމުގެ ބިރު އޮތްކަމަށް ބުނެ، ޞިއްޙީ އޮފިޝަލުން ވަނީ އެކަމުގެ އިންޒާރު ދީފައެވެ. މީގެ ކުރިން، ނިމިދިޔަ ފެބްރުއަރީ މަހުގެ 19 ވަނަ ދުވަހު ސޯލްއިން ފުރައިގެން އައި ކޮރެއަން އެއާގެ ފްލައިޓެއްގައި، ލޮސް އެންޖެލިސް އިންޓަނޭޝަނަލް އެއާޕޯޓަށް އައި ފަސިންޖަރަކު ވެސް ހިމަބިއްސަށް ފައްސިވިކަމަށް އެ ޤައުމުގެ ނޫސްތަކުން ރިޕޯޓުކުރިއެވެ. 

މީގެ އިތުރުން، މި މަހުގެ 5 ވަނަ ދުވަހު ވޮޝިންޓަން ޑަލަސް އިންޓަނޭޝަނަލް އެއާޕޯޓަށް، އިންޓަނޭޝަނަލް ފްލައިޓެއްގައި އައި ފަސިންޖަރަކުވެސް މި ބައްޔަަަށް ވަނީ ފައްސިވެފައެވެ. މިކަމާއި ގުޅިގެން، އެ ދުވަހުގެ ހަވީރު 16:00 އިން ފެށިގެން ރޭގަނޑު 21:00 އާއި ދެމެދު ވޮޝިންޓަން ޑަލަސް އިންޓަނޭޝަނަލް އެއާޕޯޓުގެ ޓާމިނަލް-އޭގައި ތިބި ދަތުރުވެރިންނަށް ބަލި ޖެހިދާނެކަމަށް ޞިއްޙީ  އޮފިޝަލުން ވަނީ އިންޒާރު ދީފައެވެ.

ޞިއްޙީ މާހިރުން މި އިންޒާރު ދީފައިވަނިކޮށް، މި މަހުގެ 7 ވަނަ ދުވަހު މެންދުރުފަހު 15:30 އިން ރޭގަނޑު 19:30 އާއި ދެމެދު މެރީލޭންޑްގެ ޖޯންސް ހޮޕްކިންސް ހޮވާޑް ކައުންޓީ މެޑިކަލް ސެންޓަރު ޕީޑިއަޓްރިކް އިމަޖެންސީ ޑިޕާޓްމަންޓަށް ޒިޔާރަތްކުރި ފަރާތްތަކުން ވެސް ހިމަބިހީގެ އެއްވެސް އަލާމާތެއް ފެނިއްޖެނަމަ އެކަން މޮނިޓާ ކުރުމަށް ޞިއްޙީ މާހިރުން ވަނީ އިލްތިމާސްކުރައްވާފައެވެ.

އެމެރިކާގައި ހިމަބިހި ފެތުރިގެން ދިޔުމާއިއެކު، މި ބަލި ބައިނަލްއަޤްވާމީ ބޮޑެތި އެއާޕޯޓުތަކުގައި ވެސް ފެތުރިގެން ގޮސްދާނެކަމަށް ބިރު އެބަ އޮތްކަމަށް ޞިއްޙީ މާހިރުން ވަނީ ވިދާޅުވެފައެވެ.