ޚަބަރު
ސުޕްރީމް ކޯޓުގެ ފަނޑިޔާރުކަމަށް ކުރިމަތިލެއްވީ ނިހާޔަތު އެކަނި
މަރިޔަމް ނިހާޔަތު.
ސުޕްރީމް ކޯޓުގެ ފަނޑިޔާރުކަމަށް ކުރިމަތިލާން ހުޅުވާލުމުން އެ މަޤާމަށް ސިވިލް ކޯޓުގެ ކުރީގެ ގާޒީ މަރިޔަމް ނިހާޔަތު ކުރިމަތިލައްވައިފިއެވެ.
ސުޕްރީމް ކޯޓުގެ ފަނޑިޔާރުކަމުގެ މަޤާމަށް ކުރިމަތިލުމަށް ހުޅުވާލީ އެ މަޤާމުގައި ހުންނެވި ޙުސްނުއްސުޢޫދު އެމަޤާމުން އިސްތިއުފާ ދެއްވުމުންނެވެ.
ޙުސްނުއްސުޢޫދު އެ މަޤާމުން އިސްތިޢުފާ ދެއްވީ އޭސީސީން ޖިނާއީ ތަހުޤީޤެއް ފަށައި ޖޭއެސްސީން ސުޕްރީމް ކޯޓުގެ ތިން ފަނޑިޔާރަކު ސަސްޕެންޑްކޮށްފައި ވަނިކޮށެވެ. އޭގެ ތެރޭގައި ހުސްނުއްސުޢޫދު ވެސް ހިމެނިވަޑައިގަންނަވައެވެ.
މި މައްސަލަ ބަލަަން ފެށުމާއެކު ސުޢޫދު ވަނީ މަޤާމުން އިސްތިއުފާ ދެއްވާފައެވެ. ސުޢޫދުގެ މައްޗަށް މަޤާމުގެ ނުފޫޒު ފޯރުވާ ކަމުގެ ބޮޑެތި ތުހުމަތުތަކެއް ކުރިމަތިވެގެން ދިޔައެވެ.
ސުޢޫދު ފަނޑިޔާރުކަމުން އިސްތިއުފާ ދެއްވުމުން ހުސްވި ފަނޑިޔާރު ކަމުގެ މަގާމަށް ކުރިމަތިލުމަށް ހުޅުވާލިއެވެ. އެކަމުގެ މުއްދަތު ހަމަވީ މިއަދު ހެނދުނު 11 ޖެހިއިރެއެވެ. ވަގުތު ހަމަވިއިރު ކުރިމަތިލެއްވީ ނިހާޔަތު އެކަންޏެވެ.
ނިހާޔަތު ވަނީ ސިވިލް ކޯޓުގެ ގާޒީކަން ކުރައްވާފަ އެވެ. އެންމެ ފަހުން ނިހާޔަތު ހުންނެވީ ޑެޕިއުޓީ ޕްރޮސެކުއުޓާ ޖެނެރަލްގެ މަގާމުގަ އެވެ. އޭގެ ފަހުން މަސައްކަތް ކުރައްވަމުން ގެންދަވަނީ ގާނޫނީ ވަކީލެއްގެ ގޮތުގައެވެ.
