ބްރެޒިލްގެ ފުޓުބޯޅައިގެ ރައީސް ހޮވުމަށް ބާއްވާ އިންތިހާބުގައި ވާދަނުކުރުމަށް ރޮނާލްޑޯ ނިންމައިފި

ބްރެޒިލްގެ ފުޓުބޯޅަ ފެޑެރޭޝަނުގެ ރައީސް ހޮވުމަށް ބާއްވާ އިންތިހާބުގައި ވާދަނުކުރުމަށް، އެ ޤައުމުގެ ޖާޒީގައި 98 މެޗު ކުޅެދީފައިވާ އުމުރުން 48 އަހަރުގެ ރޮނާލްޑޯ ނަޒާރިއޯ ނިންމައިފިއެވެ. 

ކޮންފެޑެރޭޝަން އޮފް ބްރެޒިލިއަން ފުޓްބޯލް (ސީބީއެފް)ގެ ރައީސްގެ މަޤާމުގައި މި ވަގުތު ހުރީ އެޑްނާލްޑޯ ރޮޑްރިގޭޒްއެވެ. އޭނާގެ ދައުރު މާރޗު 2026އަށް ހަމަވާއިރު، ކުރިއަށް މިއޮތް 12 މަސް ދުވަހުގެ ތެރޭގައި މި އިންތިހާބު ބާއްވަން ޖެހެއެވެ.

އިންތިހާބުގައި ވާދަކުރުމަށް ނިންމިކަމަށް އިޢުލާން ކުރަމުން ރޮނާލްޑޯ ކުރިން ބުނީ، އޭނާގެ އެ ނިންމުމަކީ ބްރެޒިލްގެ ޤައުމީ ފުޓުބޯޅަ ޓީމަށް ޒަމާނުއްސުރެ ދުނިޔޭގެ ހުރިހާ ހިސާބެއްގައި އޮންނަ ޝަރަފު އަނބުރާ ހޯދުމަށް ބޭނުންވެގެން ނިންމިނިންމުމެއް ކަމަށެވެ. 

ރޮނާލްޑޯ މިހެން ބުނުމުގެ އެއް ސަބަބަކީ، 5 ފަހަރު ވޯލްޑް ކަޕް ކާމިޔާބުކޮށްފައިވާ ބްރެޒިލްއަށް މުބާރާތް ކާމިޔާބު ނުކުރެވޭތާ 20 އަހަރަށް ވުރެ ގިނަ ދުވަސްވެފައިވުމެވެ. އަދި އޭގެ ފަހުން އެ ޓީމު ސެމީ ފައިނަލްއަށް ވެސް ދަތުރުކޮށްފައި ވަނީ 2014 ގައި އެކަންޏެވެ.

އެހެންނަމަވެސް، ކުރިން ބާސެލޯނާ، އިންޓަ މިލާން އަދި ރެއާލް މެޑްރިޑަށް ކުޅެފައިވާ ރޮނާލްޑޯ އިންތިހާބުގައި ވާދަނުކުރުމަށް ނިންމީ، މިހާރުގެ ރައީސް ރޮޑްރިގޭޒްއަށް އޮތް ތާއީދު ފެނުމުންކަމަށް، ސޯޝަލް މީޑިއާގައި އޭނާ ނެރުނު ބަޔާނެއްގައި ވަނީ ބުނެފައެވެ.

އެގޮތުން، ސީބީއެފްގެ 27 ރީޖަނަލް ފެޑެރޭޝަނާ ވާހަކަ ދެއްކުނުއިރު، އެ ތަނުން 23 ފެޑެރޭޝަނަކުން ރޮޑްރިގޭޒް އަލުން އިންތިހާބުކުރުމަށް ބޭނުންވާކަމަށް ހާމަކޮށްފައިވާކަމަށް ރޮނާލްގެ ސްޓޭޓްމެންޓުގައި ވެއެވެ. 

އޭނާ އިތުރަށް ބުނީ، ފެޑެރޭޝަންތަކުގެ ނިންމުމަށް އިޙްތިރާމްކުރާ ކަމަށާއި، ނަމަވެސް ފެޑެރޭޝަން ތަކުން މަޝްވަރާކުރަން ބޭނުން ނުވުމުން ހިތާމަކުރާ ކަމަށެވެ. އެގޮތުން، ބްރެޒިލްގެ ފުޓުބޯޅައަށް ރޮނާލްޑޯ ގެންގުޅޭ ވިސްނުން ވެސް ހުށަހެޅުމުގެ ފުރުސަތު ނުލިބުނުކަމަށް އޭނާ ބުންޏެވެ. 

ރޮނާލްޑޯގެ މި ނިންމުމާއެކު، މިހާރު އޮތްގޮތުން އިންތިހާބުގައި ހަމައެކަނި ވާދަކުރާނީ ރޮޑްރިގޭޒްއެވެ. 

ރޮނާލްޑޯ ވަނީ 1994 އަދި 2002 ގައި ބްރެޒިލްއާއެކު ވޯލްޑް ކަޕް ކާމިޔާބުކޮށްފައެވެ. އަދި އޭނާއަކީ 15 ގޯލާއެކު ދެވަނައަށް ވޯލްޑް ކަޕްގައި އެންމެ ގިނަ ގޯލު ޖަހާފައިވާ ކުޅުންތެރިޔާ ވެސް މެއެވެ.