ދުނިޔެ

ދީނީ ފަތުވާދޭ ރޮބޮޓްތަކެއް ޙަރަމްފުޅުގައި ތަޢާރަފްކޮށްފި

ދީނީ ފަތުވާދޭ ރޮބޮޓްތަކެއް ޙަރަމްފުޅުގައި ތަޢާރަފްކޮށްފި

ޝެއިޙް ސުދައިސް، މަނާރު ރޮބުޓުތަކުގެ ވީޑިއޯ ކޯލްގެ ޚިދުމަތް ބޭނުންކުރައްވަނީ، ފޮޓޯ: ސައުދީ ޕްރެސް

farudhun logo

ފަރުދުން

13 މާރިޗު 2025، 11:47

13 މާރިޗު 2025، 11:47

މި އަހަރުގެ ރަމަޟާން މަހާ ދިމާކޮށް، ދީނީ ފަތުވާދޭ ރޮބޮޓްތަކެއް މައްކާގެ މަސްޖިދުލް ޙަރަމްގައި ތަޢާރަފުކޮށްފިއެވެ. 

މި ރޮބޮޓުތަކަށް ނަންދީފައިވަނީ މަނާރުގެ ނަމުންނެވެ. އަދި މި ތަކެތި މަސައްކަތްކުރަނީ އާޓިފިޝަލް އިންޓެލިޖެންސް ނުވަތަ އޭއައިގެ އެހީގައެވެ. މިއީ ޓެކްނޮލޮޖީގެ ބޭނުން ހިފައި ޙަރަމްފުޅަށް ޒިޔާރަތް ކުރާ މުސްލިމުންނަށް ފުރިހަމަ ތަޖުރިބާއެއް ހޯދައިދިނުމަށް، ދެ ޙަރަމުގެ ރިޔާސަތުން ކުރަމުންދާ މަސައްކަތުގެ ދަށުން ތަޢާރަފު ކޮށްފައިވާ ޚާއްސަ ރޮބަޓުތަކެކެވެ.

މި ރޮބޮޓްތައް ރަސްމީކޮށް އިފްތިތާޙުކޮށްދެއްވީ، މަސްޖިދުލް ޙަރަމްގެ އިސް އިމާމު ޝައިޚް އަބްދުއްރަޙްމާން އަލް ސުދައިސްއެވެ. 

މި ރޮބޮޓުތަކާ ގުޅިގެން އިމާމު ޝައިޙް ސުދައިސް ވިދާޅުވީ، މި ރޮބޮޓުތައް ފޯރުކޮށްދޭނީ ރަސްމީ އިދާރާތަކުން ފާސްކޮށްފައިވާ މަޢުލޫމާތު ކަމަށެވެ.

މީގެ އިތުރުން، މީހަކު އޮޅުންފިލުވަން ބޭނުންވާ މަޢުލޫމާތެއް މަނާރު ރޮބޮޓުތަކުގައި ނުހިމެނޭނަމަ، އެ ކަމުގެ ޖަވާބު ހޯދުމަށް މަޝްހޫރު ދީނީ އިލްމުވެރިންނާ ވީޑިޔޯ ކޯލް މެދުވެރިކޮށް ގުޅާލައި ސުވާލުތަކަށް ޖަވާބު ހޯދުމުގެ ފުރުޞަތު ވެސް މަނާރާ ރޮބަޓުން ލިބެއެވެ. 

މި ރޮބޮޓު ފަރުމާކޮށްފައިވާ ގޮތަށް ބަލާލާއިރު، މި ރޮބޮޓުތަކުގެ ޑިޒައިނަކީ މަސްޖިދުލް ޙަރާމާއި ނަބިއްޔާގެ މިސްކިތްކޮޅު، މަސްޖިދުއްނަބަވީގެ ފަރުމާ އަސްލަކަށް ބަލައިގެން ޑިޒައިންކޮށްފައިވާ ރޮބޮޓުތަކެކެވެ. އަދި އެ ރޮބޮޓަށް ގިނަ ބަސްބަހުން ޖަވާބު ދިނުމުގެ ކުޅަދާނަކަން ވެސް ލިބިގެން ވެއެވެ.

ފާއިތުވި އަހަރުތަކުގައި ދެ ޙަރަމަށް ޒިޔާރަތް ކުރާ މީހުންގެ ހިތުގައި އުފެދޭ ދީނީ ސުވާލުތަކަށް ޖަވާބު ދިނުމަށް ބޭނުންކުރާ އުސޫލަށް ވަނީ ބޮޑެތި ކުރިއެރުންތައް އައިސްފައެވެ. މިސްކިތުގައި ތިއްބަވާ ޝެއިޚުން ސުވާލުތައް އަޑުއައްސަވައި ވަގުތުން ފަތުވާ ނެރުއްވި ޒަމާނެއް ވެސް ދިޔައެވެ. އެއަށް ފަހު ފޯނު މެދުވެރިކޮށް ޖަވާބުދޭ ނިޒާމަކަށް އެ ނިޒާމު ބަދަލުވެގެން ދިޔައެވެ. އިންޓަނެޓާއި ޓެކްނޮލޮޖީގެ ކުރިއެރުންތަކާއެކު ދެން ބޭނުން ކުރަން ފެށީ އޮންލައިން ނިޒާމެކެވެ. އަލަށް ތަޢާރަފު ކުރި ރޮބަޓުތަކާއެކު ދީނީ ސުވާލުތަކަށް ފަސޭހަކަމާއެކު ވަގުތުން ޖަވާބު ހޯދުމަށް މި ވަނީ މަގުފަހިވެފައެވެ.

މި ލިޔުން ކިޔާލުމުން

Ads by MSS