އަމިއްލަ ފަރާތްތަކުން އޮޕަރޭޓްކުރާ ފެރީތަކަށް ހެންވޭރު ޓާމިނަލް ހުޅުވާލައިފި

އަމިއްލަ ފަރާތްތަކުން އަތޮޅު ތެރެއާއި މާލެއާ ދެމެދު އޮޕަރޭޓްކުރާ ފެރީ ލޯންޗުތަކަށް ހެންވޭރު ފެރީ ޓާމިނަލް ހުޅުވާލައިފިއެވެ.

އެމްޓީސީސީން ހާމަކޮށްފައިވާ ގޮތުގައި، ހެންވޭރު އަދި ހުޅުމާލެ ފެރީ ޓާމިނަލް ބޭނުންކުރަން ޝައުގުވެރިވާ ފަރާތްތަކުން އެކަމަށް އެދި ހުށަހެޅުމަށް ހުޅުވާލުމުން،  ތިން އަތޮޅަކަށް ފެރީގެ ޚިދުމަތްދޭ ހަތް ފަރާތަކުން ވަނީ ޝައުގުވެރިކަން ފާޅުކޮށްފައެވެ. 

އެގޮތުން، ފެރީ ޓާމިނަލް ބޭނުންކުރުމަށް ޝައުގުވެރިކަން ފާޅުކޮށްފައިވަނީ އދ އަތޮޅާއި ކ އަތޮޅާއި ބ އަތޮޅަށް ދަތުރުކުރާ ފެރީ ތަކެކެވެ.

ޓާމިނަލް ބޭނުންކުރަން ޝައުގުވެރިކަން ފާޅުކޮށްފައިވަނީ:

• އދ: ފެންފުށި، މާމިގިލި، ދިއްދޫ
• ކ: މާފުށި، ގުރައިދޫ، ގުޅި، ގާފަރު، ކާށިދޫ
• ބ: ތުޅާދޫ، ހިތާދޫ، ގޮއިދޫ، ފެހެންދޫ، ފުޅަދޫ

ލޯންޗްތަކަށް ހެންވޭރު ފެރީ ޓަރމިނަލުން ޚިދުމަތް ފޯރުކޮށްދޭން ފެށުމާ ގުޅިގެން އެމްޓީސީސީގެ ސީއީއޯ ޑެޕިއުޓީ ކޮމިޝަނަރ އޮފް ޕޮލިސް ރިޓަޔަރޑް އަޙްމަދު ސަޢުދީ ވިދާޅުވީ، ހެންވޭރު ފެރީ ޓާމިނަލަކީ ހުޅުލެއަށާއި ކްރޮސްރޯޑަށް ދަތުރުކުރާ ފެރީތައް ކައިރި ކުރާތަނެއް ނަމަވެސް، އަތޮޅުތަކުގެ ލޯންޗްތަކުގެ ޝެޑިއުލްތަކާ އެއްގޮތަށް، އެ ފެރީތަކަށް ވެސް ޓާމިނަލް ބޭނުން ކުރެވޭނެ އިންތިޒާމު ހަމަޖައްސައިދެއްވާނެކަމަށެވެ. 

މި ބަދަލާއެކު، ހެންވޭރު ޓާމިނަލް ބޭނުންކުރާނެ ފަރާތްތައް ގިނަވާނެތީ، ހުރިހާ ފަރާތްތަކުން ސަލާމަތީ ކަންކަމަށް ފަރުވާތެރިވުމަށް ވެސް ސަޢުދީ އެދިވަޑައިގެންފައި ވެއެވެ.

އެމްޓީސީސީގެ ފަރާތުން އިތުރަށް ހާމަކޮށްފައިވާ ގޮތުގައި، ދުވާލަކު 15 ފެރީއަށް މި ޓާމިނަލް ބޭނުން ކުރުމުގެ ފުރުސަތު ލިބޭނެއެވެ. އަދި އެއީ ގާތްގަނޑަކަށް 2،000 ފަސިންޖަރުންކަމަށް އެ ކުންފުނިން އަންދާޒާކޮށްފައި ވެއެވެ. 

މި ޚިދުމަތް ރޭވިފައިވާ ގޮތަށް ބަލާއިރު، ހެންވޭރު ޓަރމިނަލުން އެއްފަހަރާ 5 ލޯންޗަށް ކައިރި ކުރެވޭނެ ޖާގަ ހަމަޖައްސާނެއެވެ. އަދި ހުޅުމާލޭ ފެރީ ޓަރމިނަލުން އެއްފަހަރާ 3 ލޯންޗަށް ކައިރި ކުރެވޭނެ ޖާގަ ޚާއްސަކޮށްފައިވާކަމަށް އެމްޓިސީސީން ވިދާޅުވެއެވެ. 

މީގެ އިތުރުން ކޮންމެ އުޅަނދަކަށްވެސް އެ އުޅަނދު ޖެޓީއަށް ލަފާ ހިސާބުން ފެށިގެން ފުރުމާއި ދެމެދު 30 މިނެޓުގެ ވަގުތެއް ލިބޭނެކަމަށާއި ދަތުރުވެރީން ޓަރމިނަލަށް އައިސް ފުރުމާއި ދޭތެރޭ މަޑުކޮށްލުމަށް ޚާއްސަ ސަރަހައްދެއް ޓަރމިނަލް ތެރޭ އިންތިޒާމުކުރެވޭނެކަމަށް އެމްޓީސީސީން ވިދާޅުވެއެވެ. އަދި ދަތުރުވެރީންގެ ފަސޭހައަށްޓަކައި ޓަރމިނަލްގެ ފާޚާނާ ޚިދުމަތް އަދި ބޯފެން ލިބުމުގެ އިންތިޒާމްވެސް ހަމަޖައްސާނެކަމަށް އެ ކުންފުނިން ވިދާޅުވެއެވެ.

ހަމައެއާއެކު، މި ޙިދުމަތް ބޭނުންކުރާ ފަރާތްތަކުގެ ޚިޔާލާއެކު، ކުރިޔަށް އޮތް ދުވަސްތަކުގައި ޚިދުމަތުގެ ފެންވަރު ރަގަޅުކުރުމަށް އިތުރަށް މަސައްކަތް ކުރާނެކަމަށް އެމްޓީސީސީން ވަނީ ހާމަކޮށްފައެވެ.

ހެންވޭރު އަދި ހުޅުމާލެ ފެރީ ޓާމިނަލް ލޯންޗު ފެރީ އޮޕަރޭޓް ކުރާ އެންމެންނަށް ހުޅުވާލާލަން ނިންމި ނިންމެވުމަކީ ރައީސް ޑރ. މުހައްމަދު މުއިއްޒު ނިންމެވި ނިންމެވުމެކެވެ. މި ނިންމެވުމަކީ އަތޮޅު ތެރެއިން ދަތުރުކުރާ އާންމު ރައްޔިތުންނަށް ކުރިމަތިވާ ތަކްލީފު ކުޑަ ކުރެއްވުމުގެ ގޮތުން ނިންމެވި ނިންމެވުމެއްކަމަށް ވަނީ ހާމަކުރައްވާފައެވެ.