ސިޔާސީ ބޭނުމަށް ޕާޓީގެ ނަމުގައި ޞައްޙަނޫން މެސެޖުތައް ފޮނުވުން ފަދަ ދަށުދަރަޖައިގެ ޢަމަލުތައް ކުށްވެރިކުރަން: ޕީއެންސީ

ސިޔާސީ ބޭނުމަށް އެ ޕާޓީގެ ނަމުގައި ސައްޙަ ނޫން މެސެޖުތައް ފޮނުވުންފަދަ ދަށުދަރަޖައިގެ ޢަމަލުތައް ހަރުކަށި އިބާރާތުން ކުށްވެރިކުރާކަމަށް, ވެރިކަންކުރާ ޕާޓީ ޕީޕަލްސް ނޭޝަނަލް ކޮންގްރެސް، ޕީއެންސީން ބުނެފިއެވެ.

ޕީއެންސީން ނެރުނު ބަޔާނެއްގައި ބުނީ، އެ ޕާޓީގެ ނަމުގައި "ޕާޓީގެ ބޭނުމަށް މަޢުލޫމާތުތަކެއް ހޯދުމަށް" ކަމަށް ބުނެ މެސެޖުތަކެއް ދައުުރުކުރަމުންދާ މައްސަލަ އެ ޕާޓީގެ ސަމާލުކަމަށް އެކިފަރާތްތަކުން ގެނެސްފައިވާ ކަމަށެވެ. 

މި ކަމާއި ގުޅިގެން ޕީއެންސީން ބުނީ، އެ ޕާޓީގެ ބޭނުމަށް ރަށްރަށުން އެއްވެސް މަޢުލޫމާތެއް ހޯދާނަމަ އެކަން ކުރާނީ ސީދާ ޕާޓީގެ ސްޓިއަރިންގ ކޮމިޓީތަކަށް ޕާޓީގެ މައިއިދާރާއިން ނުވަތަ ޕާޓީގެ ރަސްމީ ޙައިސިއްޔަތެއް އޮތް ފަރާތަކުން ގުޅައިގެން ނުވަތަ އެކަމަށް ކަނޑައެޅިފައިވާ ޕާޓީގެ ރަސްމީ ޗެނަލެއް މެދުވެރިކޮށް ކަމަށެވެ. އަދި މިފަދަ ކަންކަމަށް ގުޅާ ގުޅުންތަކުގައި ބޭނުންކުރާނީ ޕާޓީގެ ނަމުގައި ހުންނަ ނަންބަރުތައްކަމަށް އެ ޕާޓީން ބުނެއެވެ. މީގެ އިތުރުން، އެސްއެމްއެސްގެ ޒަރިއްޔާއިން އެއްވެސް މަޢުލޫމާތެއް ހޯދުމަށް ޕާޓީގެ ރަސްމީ އިދާރާއިން ނޭދޭނެކަމަށްވެސް އެ ބަޔާނުގައި ވަނީ ބުނެފައެވެ.

ޕީއެންސީން ބުނީ، މިހާތަނަށް ފާހަގަކުރެވިފައިވާ އެ ބާވަތުގެ މައްސަލަތައް ދިވެހި ފުލުހުންގެ ޚިދުމަތަށް ހުށައަޅައިގެން ބަލަމުންދާކަމަށެވެ. އަދި ސިޔާސީ ބޭނުމަށް ޕީއެންސީގެ ނަމުގައި ސައްޙަނޫން މެސެޖުތައް ފޮނުވުން ފަދަ ދަށު ދަރަޖައިގެ އަމަލުތައް ހަރުކަށި އިބާރާތުން ކުށްވެރިކުރާކަމަށް އެ ޕާޓީން ނެރުނު ބަޔާނުގައި ވަނީ ބުނެފައެވެ. ހަމަ އެހެންމެ، މިދަފަ ޢަމަލުތައް ހިންގަމުންދާ ފަރާތްތަކުން އެކަން ވަގުތުން ހުއްޓާލުމަށް އެ ޕާޓީން ވަނީ ގޮވާލާފައެވެ.

 ޕީއެންސީން ވަނީ އެފަދަ ސައްޙަނޫން މެސެޖުތަކަށް އިޖާބަ ނުދިނުމަށާއި، އެފަދަ މެސެޖެއް ލިބިއްޖެނަމަ ވަގުތުން ޕާޓީގެ ރަސްމީ އިދާރާތަކަށް އެކަން އެންގުމަށް ޕާޓީގެ މެންބަރުންނާއި ޢާންމު ރައްޔިތުންގެ ކިބައިން އެދިފައެވެ. އަދި އެ ޕާޓީން އަބަދުވެސް މަސައްކަތް ކުރަމުންދާނީ ތެދުވެރިކަމާއި އިޙްލާސްތެރިކަމާއެކު ރައްޔިތުންނަށް ޚިދުމަތް ކުރުމަށްކަމަށްވެސް އެ ބަޔާނުގައި ވަނީ ފާހަގަކޮށްފައެވެ.