ކުޅިވަރު
އެފްއޭއެމްގެ ހިންގާ ޤަވާއިދު އިސްލާޙުކުރުމަށް ފީފާ އާއި ކްލަބްތައް ގުޅިގެން ވޯކްޝޮޕެއް ބާއްވަނީ

އެފްއޭއެމްގެ ލޯގޯ---
ފުޓުބޯޅަ އެސޯސިއޭޝަން އޮފް ދަ މޯލްޑިވްސް، އެފްއޭއެމްގެ ހިންގާ ޤަވާއިދު އިސްލާޙުކުރުމަށް، ފުޓުބޯޅައިގެ މައި އިދާރާ، ފީފާ އާއި ކްލަބުތައް ގުޅިގެން ޙާއްސަ ވޯކްޝޮޕެއް ބޭއްވުމަށް ނިންމައިފިއެވެ.
އަންނަ ހަފްތާގެ އާދީއްތަ ދުވަހު ބޭއްވުމަށް ހަމަޖެހިފައިވާ މި ވޯކްޝޮޕްގެ ދަޢުވަތު 17 ކްލަބަކަށް ފޮނުވާފައިވާކަމަށް، އެފްއޭއެމްގެ ވަގުތީ ޖެނެރަލް ސެކްރެޓަރީ، މުޙައްމަދު ޝުޖާއު ވަނީ ވިދާޅުވެފައެވެ.
މި ވޯކްޝޮޕްގައި އެފްއޭއެމްގެ ހިންގާ ޤަވާއިދަށް ގެނައުމަށް ފީފާއިން ހުށަހަޅާފައިވާ ބަދަލުތައް ކުލަބުތަކާ ހިއްސާކުރުމާއި، ކުލަބުތަކުގެ ޚިޔާލު ހޯދުން ކުރިޔަށްދާނެކަމަށް ވެސް ޝުޖާއު ވަނީ ހާމަކުރައްވާފައެވެ. އެގޮތުން މި ވޯކްޝޮޕްގައި ފީފާގެ ފަރާތުން ދެ ޑެލިގޭޓުންނާއި އޭއެފްސީގެ ފަރާތުންވެސް ދެ ޑެލިގޭޓުން ބައިވެރިވުމަށް ވެސް ވަނީ ހަމަޖެހިފައެވެ.
މީގެ އިތުރުން، މިނިވަންކަމާއެކު މި މަޝްވަރާ ކުރިޔަށް ގެންދިއުމުގެ ބޭނުމުގައި މި ބައްދަލުވުމުގައި ސަރުކާރުގެ އެއްވެސް ބައިވެރިވުމެއް ނޯންނާނެކަމަށް ވެސް ޝުޖާއު ވަނީ ވިދާޅުވެފައެވެ.
ފީފާގެ ފަރާތުން މި ވޯކްޝޮޕްގައި ހަރަކާތްތެރިވާނީ އަޙްމަދު ހައްރާޒުއެވެ. ހައްރާޒަކީ ފީފާގެ ފޯކަލް ޕޮއިންޓެއް ގޮތަށް އެފްއޭއެމްއަށް އިރުޝާދު ދެއްވުމަށް ހަމަޖައްސަވާފައި ހުންނަވާ ފީފާގެ މެންބަރު އެސޯސިއޭޝަން ޑިޕާޓްމަންޓުގެ ސީނިއަރ ގަވަނަންސް މެނޭޖަރެވެ.
ދަޢުލަތުގެ މީޑިއާއަށް ދެއްވި އިންޓަވިއުއެއްގައި ޝުޖާއު ވިދާޅުވިއެވެ.
މިއީ ސީދާ ކުލަބުތަކަށް ވަރަށްފޯކަސްޑް އިންޑިޕެންޑެންޓްކޮށް ގެންދަން ޖެހޭ އެއްޗެއް. އެއީ އެފްއޭއެމްގެ ކަންތައްތަކީ ސީދާ ކުލަބުތަކާއި ގުޅިފައިވާ ކަމަށްވާތީ ސީދާ ފީފާއަކުން ބޭނުމެއް ނުވޭ އެހެން ތާޑް ޕާޓީ މީގެ ތެރޭގައި އިންވޯލްވާކަށް. މި މަޝްވަރާތަކުގައި ކުލަބުތަކުގެ ބަސް ހޯދަން ޖެހޭ ކަމަކަށް ތާޑްޕާޓީ ވައްދައިފިއްޔާމުން އެއީ ރަނގަޅު ގޮތަކަށް ފެއާ ގޮތަކަށް ނުދާނެތީ ފީފާއިން ވަރަށް ބޮޑަށް ސްޓްރިކްޓްލީ އަންގާފަ އޮންނަނީ އެމްއޭއެމް އާއި ކުލަބުތަކާއިއެކީގައި ކްލޯސްޑް ޑޯގައި ކުރިޔަށް ގެންދަން.
ޝުޖާއު ވިދާޅުވީ ހައްރާޒުގެ އިތުރުން ރާއްޖޭގެ ކަންކަމާ ހަވާލުވެ އިންޑިއާގައި ހުންނަވާ ޕްރިންސް ރޫފަސް އާއި އޭއެފްސީގެ މަންދޫބުންވެސް މި ވޯކްޝޮޕުގައި ބައިވެރިވެ އިރުޝާދު ދެއްވާނެ ކަމަށެވެ.