ދުނިޔެ
ފަލަސްތީނުގެ ރެފިއުޖީން ބޭނުންކުރާ ކުޑަ ޓެންޓެއްގައި ސެލޫނެއް ހުޅުވައިފި
ކަވާފިރް ނޫރް/ ފޮޓޯ: އަލްޖަޒީރާ
ފަލަސްތީނުގެ ރެފިއުޖީން ބޭނުންކުރާ ކުޑަ ޓެންޓެއްގައި ސެލޫނެއް ހުޅުވައިފިއެވެ.
ޣައްޒާގެ އިރުމަތީގައި ރެފިއުޖީން ދިރިއުޅޭ ސަރަޙައްދެއްގެ ކުޑަ ޓެންޓެއްގެ ބޭރުގައި އެއީ ސެލޫންކަން އަންގައި ދިނުމަށް، އަތުލިޔުމުން "ކަވާފިރް ނޫރް" (ހެއަރޑްރެސާ ނޫރް) އޭ ލިޔެފައި ވެއެވެ. މި ކުޑަ ޓެންޓުގެ އެތެރޭގައި ތެޅިފައިވާ ލޯގަނޑަކާއި، މަދު މޭކަޕް ސާމާނުކޮޅަކާއެކު މި މަސައްކަތް ފެށި ނޫރްގެ ވާހަކައަކީ، ޣައްޒާގެ ޒުވާނުންނަށް، އެ ފަރާތްތަކުގެ ހުވަފެންތައް ޙަޤީޤަތަށް ހެދުމަށް ކުރިމަތިވެފައިވާ ގޮންޖެހުންތަކާއި، ނޫރްގެ އަޒުމު ވަރުގަދަކަން ދައްކުވައިދޭ ލާމަސީލު މިސާލެކެވެ.
ވަރަށް ހަގު އުމުރުގައި ނަރސިންގ ސްކޫލުން ނޫރް ކެނޑުނީ، ސެލޫން މޭކަޕް އާއި، އިސްތަށިގަނޑު ރީތިކުރުމުގެ މަސައްކަތަށް ކުޑައިރުއްސުރެ ހިތްގޮވަމުން ދިޔަ ގޮވުމަށް އިޖާބަދީ، އެ ދާއިރާއިން ކުރިއަށްދިޔުމަށް ގަސްތުކޮށްގެނެވެ.
އަހަރެމެންގެ ވަށައިގެންވާ ބިރުވެރިކަމަށް ނިމުމެއް ނާދޭ. މޭކަޕް ސެލޫނަކަށް އައިސްލުމަކީ ވަށައިގެންވާ ހިއްދަތިކަންތައްތައް ތަޙައްމަލްކުރުމަށް ކުޑަ ލުޔެއް ލިބިގެންދާނެ ކަމެއް.
އަލް ޖަޒީރާ ނިއުސްއަށް މަޢުލޫމާތުދެމުން ނޫރް ބުނެފައިވެއެވެ.
އަޅުގަނޑުމެން ވެސް ތުންފަތުގައި ކުލަކޮޅެ ޖައްސައިލައިގެން، ލޮލާއި ބުމައިގައި އަނދުން އަޅައިލައިގެން ބޭރަށް ނުކުންނަނީ، ކޮންމެހެން މީހުންނަށް ދެއްކޭކަށް ނޫނެއްނޫންތޯއެވެ. ރީތި ވެލަނީ، އެ ރީތިވެލުމުގެ ސަބަބުން އަމިއްލަ ނަފްސަށް ލިއްބައިދޭ އުފަލާއި ހިންހަމަޖެހުން ހޯދުމަށް ނޫންތޯއެވެ؟ ހަމުގެ ކުލައާ ގުޅޭ ގަހަނާ އާއި، މޭކަޕް ސާމާނު ހޯދަނީ، ދުވަހީ ދިރިއުޅުމުގައި އަމިއްލަ ނަފްސަށް އޮންނަ އިތުބާރު އިތުރުކޮށްލުމަށް ނޫންތޯއެވެ. މި ލައްޒަތު، ޣައްޒާގެ ރައްޔިތުންނަށް ފޯރުކޮށްދިނުމަކީ ނޫރްގެ މައިގަނޑު މަޤްސަދެވެ.
އަޅުގަނޑު މަސައްކަތްކުރާނަން ކުޑަ ހިންހަމަޖެހުމެއް، ކުޑަ އުފާވެރިކަމެއް އަޅުގަނޑުގެ ގާތަށް މޭކަޕް ކުރަން އަންނަ ބޭފުޅުންނަށް ހޯދައިދެވޭތޯ. އަލުގަނޑުގެ މައިގަނޑު އަމާޒަކީ، މިތަނުން ނުކުމެގެންދާ އަންހެނުން ދަނީ، ކުޑަކޮށް ނަމަވެސް، އައިއިރަށްވުރެ އުފާވެފަ، އައި އިރަށްވުރެ ހިންހަމަޖެހިފަވާ ބަޔަކު ކަމުގައި ހެދުން.
ނޫރް ބުނެފައިވެއެވެ.
