ދީން

"ދުވާލަކު ހަތް ފަހަރު ސުވަރުގެ ވެއްދެވުމަށް ދުޢާކޮށްފިނަމަ، އެމީހަކަށް އެދި ސުވަރުގެ ގޮވާނެ"

"ދުވާލަކު ހަތް ފަހަރު ސުވަރުގެ ވެއްދެވުމަށް ދުޢާކޮށްފިނަމަ، އެމީހަކަށް އެދި ސުވަރުގެ ގޮވާނެ"

ﷲގެ ހަޟްރަތުގައި ދުޢާ ދެންނެވުން---

farudhun logo

ފަރުދުން

13 މާރިޗު 2025، 03:00

13 މާރިޗު 2025، 03:00

ޝައްކެއް ނެތެވެ. ދުޢާއަކީ މުސްލިމުންގެ އެންމެ ބާރުގަދަ ހަތިޔާރެވެ. ނިކަމެތި އިންސާނާއަށް ދުނިޔެމަތީގައި ދިމާވާ ދަތި އުނދަގޫތަކުން ސަލާމަތްކުރައްވައި، ރަގަޅު ސިއްޙަތާ ޢާފިޔަތު ދެއްވުމަށް އެދި ދުޢާކުރުމަކީ، އަޅުކަންތަކާ ގާތް މުސްލިމުން އާދަކޮށް ﷲގެ ހަޟްރަތަށް ދަންނަވާ ދެންނެވުންތަކެވެ.

މީގެ އިތުރުން، އިންސާނުން ދުނިޔެއަށް ފޮނުއްވީ ﷲއަށް އަޅުކަން ކުރުމަށް ވީހިނދު، ސުވަރުގެ ހާސިލް ކުރުމަކީ، ދާއިމީ އުފަލާއި ހިންޖެހުން ހާސިލްވާނެ ހަމައެކަނި މަގެވެ.

ކީރިތި ރަސޫލާ صـلّى الله علـيـه وسـلّمގެ ސުންނަތުން ސާބިތުވާ ގޮތުގައި، މީހަކު ދުވާލަކު 7 ފަހަރު އެމީހާ ސުވަރުގެ ވެއްދެވުމަށް އެދި ﷲގެ ހަޟްރަތުގައި ދުޢާ ދަންނަވައިފިނަމަ، އެމީހާ ސުވަރުގެ ވެއްދުމަށް އެދި ﷲ ތަޢާލާއަށް ސުވަރުގެ ދަންނަވާނެއެވެ.

އޭގެ އަނެއްކޮޅުން، ދުވާލަކު 7 ފަހަރު ނަރަކައިން މިންޖުކުރެއްވުމަށް ދުޢާ ދަންނަވައިފިނަމަ، އެމީހަކު ނަރަކައިން މިންޖުކޮށްދެއްވުމަށް މާތް ﷲގެ ހަޟްރަތުގައި ނަރަކަ ދަންނަވާނެކަމަށް މާތް ނަބިއްޔާގެ ސުންނަތުން ސާބިތުވެއެވެ.

އެހެންކަމުން، ސުވަރުގެ ހޯދުމަށާއި، ނަރަކައިން މިންޖުކުރެއްވުމަށް ކޮންމެ ދުވަހަކު ދުޢާ ދެންނެވުމަކީ ވަރަށް މުހިންމުކަމެކެވެ. އަދި މިކަމަށް ދުޢާ ދަންނަވާއިރު، ސުވަރުގޭގެ އެންމެ މަތިވެރި ދަރަޖަ ކަމުގައިވާ، ޖައްނަތުލް ފިރުދައުސް ހާސިލްކުރެއްވުމަށް ﷲގެ ހަޟްރަތުގައި ދުޢާ ދެންނެވުން މުހިންމެވެ.

މިކަމާ ގުޅިގެން ކީރިތި ރަސޫލާ صـلّى الله علـيـه وسـلّمގެ ސުންނަތުން ސާބިތުވާ އަނެއް ކަމަކީ، ސުވަރުގޭގައި 100 ދަރަޖައެއް ހިމެނޭކަމެވެ. އޭގެ ތެރެއިން ޖައްނަތުލް ފިރުދައުސްއަކީ ސުވަރުގޭގެ އެންމެ މަތިވެރިވެގެންވާ ދަރަޖައެވެ.

 

މަސްދަރު:

1446 ވަނަ އަހަރުގެ ރަމަޟާން މަހަށް ޙާއްސަކޮށް ފަރުދުން މީޑިއާއިން ގެނަސްދިން "ބަރަކާތް" ޕްރޮގްރާމް.

އެޕިސޯޑުގެ ޕްރެޒެންޓަރ: އައްޝައިޙާ އަރޫޝާ މާހިރު

މި ލިޔުން ކިޔާލުމުން